Macitilo 24 - Mapangano Alomba 1923

¹ ZIKAPITE nsiku zisano mkuru wa ansembe Ananiya efwika, na ŵambi akuru na chilongosola muyake zina lake Tertullo; naŵo echiyomlululira mmbili mlandu wa Paulo.

² Nipo akaitiwe Tertullo eyambomsimikizya echiti, Pakuti kuli mweo tunkala mtendere ngawo, na poyondolola kwanu viipa vuleshewa ku mtundu uyu,

³ tuzomerezya nako mvyonse na mmalo monse noyamika, mwe Felike mwaŵomvwika.

⁴ Lomba nisamuŵevyani, napapata mtimvwile malizu a kandusu posisikanya kwanu.

⁵ Pakuti timfwanga uyu muntu ni chinkanga, notwangisya ŵantu mwa Ayuda ŵonse a mvyaro vyonse, na chipimfya wa chipatuko cha Anazarayo.

⁶ Wamene soti esakochenda chipupilo, ni pitimkata: tichiti timpingule mwa dango lasu.

⁷ Sembe Lusiya chilolo echizomsompola kwa mpamvu mmanja ŵasu,

⁸ noŵapanga ŵomsimikizya aze kuli mweo; pali ŵeve mngaziŵe pomkonsinsha mweka ivi vyonse vutumsimikizya navyo.

⁹ Na Ayuda ezomerezyana pomsimikizya, kunenesya kuti ni vyendi.

¹⁰ Nipo mmbili akamcheuzye kuti alaŵire Paulo eyasuka, Poziŵa kuti mwankala chipingula wa mtundu uyu virimika vinyinji nulikanila motemwa:

¹¹ pakuti mngaziŵe kuti nte kupula nsiku kumi na ziŵiri penichiyolambila ku Yerusalemi:

¹² naŵo aliyonifwanga mchipupilo nususyana na ŵantu kano kunyesya liumba mitima, kano mmasunagoge, kano umo mmunzi.

¹³ Soti sangazomerezye kwanu vintu vyakunisimikizya navyo.

¹⁴ Sembe ichi nuchisokolola kwanu, chakuti mwa Njira yakutula chipatuko ni mnumtumikila Mlungu wa ausu wasu, nozomera vyonse viri mdango na vilulembewe mwa aŵirizi:

¹⁵ panili na chigomezyo kwa Mlungu, chakulolera aŵa soti, chakuti paze paŵe kuzyuka kwa ŵolungama na ŵosalungama.

¹⁶ Pali ichi nane soti nupimpilila nakuŵa na chikumbutima chosapontera Mlungu na ŵantu nsiku zyonse.

¹⁷ Lomba vikapitepo virimika vinyinji nichizotwala vyabule ku mtundu wangu, na nsembe:

¹⁸ mkutwala ivi enifwanga wowamyiwa mchipupilo, ntenenze na chinyonganyonga kano na chiwawa: lomba enzemo Ayuda ŵambi a mu Asiya,

¹⁹ amene nkasa angati ali pano pa menso panu nonisimikizya, kati ana mlandu nane.

²⁰ Pambi aŵa nalaŵire ŵeka viipa vyechifwana penipanama pa nsaka,

²¹ sembe lizu ili limo linikuwa penipanama paŵo, Zya mlandu wozyuka kwa akufwa ni zinusimikizyiwa kwanu lero.

²² Sembe Felike, poziŵisya wino zya Njira iyi, eŵasimpika echiti, Apo pati aze Lusiya chilolo nize nitende mlandu wanu.

²³ Naye emuuzya kenturiyo kuti amsunge nomchitira paweme, asaŵalesya anansi ŵake kumtumikila.

²⁴ Lomba pavuli pa nsiku ziyake Felike echiza pamo na Drusilla mkazi wake, enze Muyuda; emuita Paulo nomumvwa zya mvwano wa mwa Kristo Yesu.

²⁵ Naye penzolulula vya chilungamo na malilesyo nopinguzi ukuza Felike echita chintente chikuru noyasuka, Nkoya lomba; nikazoŵona nsita iweme nikuite uze kwangu.

²⁶ Echetekera soti kuti Paulo ampe ndalama, ni pechimuita kaŵirikaŵiri nolaŵirana naye.

²⁷ Lomba vikasile virimika viŵiri Porkiyo Festo epyana Felike; naye posakoŵatemwesya Ayuda Felike emsiya Paulo mnsinga.