Macitilo 23 - Mapangano Alomba 1923

¹ LOMBA Paulo pololesisya ansaka echiti, Akwasu, nunkala pa menso pa Mlungu na chikumbutima chiweme mpaka na lero kumo.

² Nipo mkuru wa ansembe Ananiya esuzula aŵo ŵenze pafupi naye kumnyata pakanwa.

³ Pamene apo Paulo enena naye, Mlungu akunyate, we chipupa chotuŵishiwa: kansi unkala kunipingula mwa dango, nouzya ninyatiwe kosusya dango?

⁴ Nipo aŵo opanama pafupi echiti, Umpuvula kansi mkuru wa ansembe wa Mlungu?

⁵ Paulo echiti, Niliyoziŵa, akwasu, kuti ni mkuru wa ansembe: pakuti kwilembewa, Usamnena viipa mkuru wa ŵantu ŵako.

⁶ Lomba Paulo akaziŵe kuti chitwa chimo ni Asaduki na chiyake ni Afarisayo ekuwa pa nsaka, Akwasu, nine Mfarisayo, mwana wa Afarisayo: zya chilolero chozyuka kwa akufwa ni zinupinguliwa.

⁷ Lomba akanene tetyo yenzepo ntota pa Afarisayo na Asaduki: na liumba lipambana.

⁸ Chikomo Asaduki akuti kuzyuka paliye, na malaika, na mizimu: sembe Afarisayo ozomera vyonse viŵiri.

⁹ Lomba chenzepo chiwawa chikuru: ŵambi alembi ŵene Afarisayo epanama nosusyana kuti, Situŵona kaipa mmuntu uyu: nga kati mzimu wilaŵira naye, kano malaika?

¹⁰ Nipo pekenzepo kalekano kakuru chilolo, poyopa angampezule Paulo vizovizo, chiŵapanga manjolinjoli asike nomsompola pakati paŵo na kuza naye mu linga.

¹¹ Usiku wake Asikuru epanama pali yeve nonena, Nkazika mtima: pakuti nga ni umo muwanichitira untoni mu Yerusalemi tetyo ni muuti ukachitile untoni na ku Roma.

¹² Lomba kukache Ayuda echita fwingo, elilapizya kuti tisalya kano kumwa mpaka timpaye Paulo.

¹³ Enzepo kupula makumi ŵane echita chiŵembu ichi.

¹⁴ Naŵo echiza kwa akuru a ansembe na kwa akuruakuru echiti, Talilapizya njazi ikuru yasalaŵa kantu mpaka timpaye Paulo.

¹⁵ Teti lomba mweo pamo na ansaka mkachiuzye chilolo kuti chisike naye kwanu nga musakopingula wino mlandu wake: nase pakaliyekuza tankalilatu kumpaya.

¹⁶ Sembe mulisa wa Paulo echimvwa chiŵembu chaŵo, echiyoloŵa mu linga nomuuzya Paulo.

¹⁷ Paulo naye eliitira umo wa akenturiyo echiti, Nkoyani na mlumbwana uyu ku chilolo; paali na malizu ochiuzya.

¹⁸ Teti emuula na kuya naye ku chilolo echiti, Paulo uyo womangiwa waniita kwake noniuzya nize naye mlumbwana uyu kwanu, ana malizu olaŵira namwe.

¹⁹ Nipo chilolo chimkata kwanja chichiya padera nomkonsha kunsei, Ni chinji chiusakoniuzya?

²⁰ Naye echiti, Ayuda apangana kumsengani kuza naye Paulo mailo ku nsaka, nga musakokonsinsha wino zyake.

²¹ Namwe msanaka naŵo: pakuti omuŵendamila ŵala kupula makumi ŵane, alilapizya kusalya na kusamwa mpaka pati ampaye: lomba aluŵikiletu, nololera chipango chanu.

²² Teti chilolo chimsuzula mlumbwana aye nompanga kuti, Usauzya muntu kuti waniziŵisya ivi.

²³ Lomba chiliitira akenturiyo aŵiri na kuti, Patulilani kaŵera manjolinjoli myanda iŵiri ŵaye mpaka ku Kaisariya, na aakavaro makumi asano na aŵiri, na amafumo myanda iŵiri, pa nsita yakatatu yosiku:

²⁴ nalete soti nyama zyokwerapo Paulo, na kuya naye nompanilila kwa Felike mmbili.

²⁵ Nacho chilemba kalata koteti:

²⁶ Klaudiyo Lusiya ku mmbili wozila Felike mtende.

²⁷ Uyu muntu ekatiwa na Ayuda, enze pafupi nopaiwa naŵo penizako na manjolinjoli nompokesya, penichimvwa kuti ni Muroma.

²⁸ Nane posakoziŵa chikomo chechimsimikizya nisika naye ku nsaka yaŵo.

²⁹ Nimfwanga osimikizyiwa na makonsho a dango laŵo, ntenze na mlandu wowamila kufwa kano kumangiwa.

³⁰ Apo pechiniuzya kuti paŵe chiŵembu chompangila uyu muntu, lomba pano ni panumtumizya kwanu, noŵapanga ŵomsimikizya naŵo azamkanikizye pa menso panu.

³¹ Teti manjolinjoli umo mchiŵapangila emuula Paulo echiya naye usiku ku Antipatri.

³² Lomba mmawa mwake esiyana naŵo aakavaro akamfwisye, naŵo ewerera ku linga.

³³ Ŵeve pechifwika ku Kaisariya empa mmbili kalata ako nompeleka Paulo soti kuli yeve.

³⁴ Akakapende ekonsha, Wafuma mcharonji? Nipo pechiziŵa kuti ni wa ku Kilikiya

³⁵ echiti, Ninene mlandu wako pati aze ayako a mlandu naŵo: naye epanga kuti asungiwe mng'anda ya nsaka ya Herode.