Macitilo 20 - Mapangano Alomba 1923

¹ PAVULI posila chiwawa Paulo eŵaita asambili noŵachinsa, nolailana naŵo noimapo kuya ku Makedoniya.

² Akapite pa vitwa ivyo noŵachimulisya efwika ku Hellene.

³ Naye akankaleko myezi itatu, na chiŵembu chipangiwa cha yeve na Ayuda penzosaka kuya mu wato ku Suriya, echita nzeru zyopitila njira ya ku Makedoniya.

⁴ Naŵo empelekezya mpaka ku Asiya Sopatro wa ku Bereya, mwana wa Purro, na mwa Atessalonika Aristarko na Sekundo, na Gayo wa ku Derbe, na Timoti, na a mu Asiya Tukiko na Trofimo.

⁵ Lomba aŵa etangula, enzotilindila pa Trowa.

⁶ Nipo tiloŵa mu wato noimapo pa Filipi pavuli pa nsiku zya mitanda iliye chizamba noŵazila ku Trowa masiku asano; kwitiswera masiku asano na aŵiri.

⁷ Pa siku loyamba la pa wiki petenzolongana kusuna mtanda Paulo eŵaŵirizyira, echiti aime mmawa mwake; etemwerera kulaŵira kwake mpaka pakati posiku.

⁸ Yenzemo misaniko inyinji mchipinda cha pamulu mwenzolongane.

⁹ Lomba enzonkala pa mbolyo mlumbwana muyake zina lake Utuko, wokusila tulo tovufya; pamene Paulo pechikatisya kuŵirizya pombuwila na tulo ekulumukira pansi kufumila ku chipinda cha pamulu ngako, naŵo ŵemuula wakufwa.

¹⁰ Naye Paulo esika emuundamila nomfukatila na kuti, Msachita zungo; pakuti moyo wake ukali tyala.

¹¹ Nipo akakwere nousuna mtanda na kulya nolaŵira naŵo nsita ikuru, mpaka kucha, efumapo.

¹² Naŵo echiza naye mlumbwana wamoyo nomyalalikiwa kwene kantu.

¹³ Lomba seo titangula noloŵa mu wato kuya ku Asso, kwamene kwitipangwa kumuulilamo Paulo: pakuti epanga teti, echiti ayende yeka pasilya.

¹⁴ Petichinguzya pa Asso timuulilamo nofwika ku Mitulene.

¹⁵ Poimako kwamene mu wato tichiza mmawa mwake poteezyana na Kiyo, na mmawa mwake tifwika nozyokera pa Samo, na mmawa mwake tifwika ku Mileto.

¹⁶ Chikomo Paulo epingula kupitilila pa Efeso asachenjerekwa mu Asiya; pakuti enzoyendesya, kati kukamkumika, kuti akaŵe pa Yerusalemi siku la Pentekote.

¹⁷ Kufumila pa Mileto etuma ku Efeso, eliitira akuru a eklezya.

¹⁸ Naŵo akamzile eŵanenera, Muziŵa mweka, chitatikile siku loyamba linikandamo mu Asiya, umo mnenzonkalila namwe nsita yonse,

¹⁹ kumtumikila Asikuru na masisikanyo ŵonse na misozi na mayezyo ŵeniponera na viŵembu vya Ayuda:

²⁰ mwakuti niliyochirimuka pomkundululilani kantu kali konse kowamila, nomsambizyani pasweta soti mnanda na mnanda,

²¹ kwachitira untoni Ayuda na Ahellene womyarukira Mlungu mitima nomzomera Asikuru wasu Yesu Kristo.

²² Lomba, ŵonani, nikuya womangiwa mu mzimu ku Yerusalemi, wosaziŵa ivyo viti vikaniponere kulakwa:

²³ sembe kuti Mzimu Mtuŵa onichitira untoni mminzi yonse wakuti vyomangira na matamano vunilindila.

²⁴ Lomba neo sinuchisya moyo wangu kuŵa kantu, nga ni wotemweka na neo, sembe kuti nikasilizye makani ŵangu na utumiki ula winipokera kwa Asikuru Yesu, woichitira untoni evangelo ya chawanzi cha Mlungu.

²⁵ Lomba, ŵonani, nuziŵa kuti mweo monse, mnenzoyendayenda mwanu kouyeruzya ufumu, simti muŵone soti chinso changu.

²⁶ Teti numchitirani untoni lero lino wakuti niliye mlandu pa mlopa wa ŵonse.

²⁷ Pakuti niliyochirimuka pomkundululilani vyopangwika vyonse vya Mlungu.

²⁸ Chenjerani mweka na ku mkusi wonse, mwamene mwechimuŵikani Mzimu Mtuŵa kuŵa achilolesya, muŵetere eklezya ya Mlungu yechisita na mlopa wake mwine.

²⁹ Nuziŵa kuti nikazoimapo mimbulu yozingwisya ize iloŵe mwanu yosalekelela vitekwa;

³⁰ na mwa mweo mweka ni mwati azauke ŵantu, nolaŵira malimiaŵiri akuti aŵaŵenzye asambili aŵakonke.

³¹ Chikomo choteti iŵani tuni, nokumbuka kuti kwa virimika vitatu sinileka usiku na mzuŵa kumsokani monse na misozi.

³² Lomba numsungisyani kwa Mlungu na ku lizu la chawanzi chake, chila chukuma kumlunduluzyani nompani upyani ula mwa ŵonse ŵotuŵishiwa.

³³ Sinikumbwila chera chituŵa kano chisweta kano vyovwala vya muntu ali wonse.

³⁴ Muziŵa mweka kuti aŵa manja enichitila vinisoŵa na aŵo ŵenze nane pamo.

³⁵ Mvintu vyonse nimpani mlingo umti moyavyirako ŵolenda pokata milimo tetyo, nokumbuka malizu ŵala a Asikuru Yesu, umo mwechinenera mwine, Kupa kushukisya kupula kupokera.

³⁶ Lomba akanene teti efukama pansi nolomba pamo na aŵo ŵonse.

³⁷ Naŵo elila ngako nomzyeŵetera pa mkosi wa Paulo nomfyonta,

³⁸ kusinginikira ngakongako lizu lanena lakuti sati amuŵone soti chinso chake. Naŵo empelekezya ku wato.