Macitilo 2 - Mapangano Alomba 1923

¹ LOMBA pelichiza siku la Pentekote ŵenze ŵonse pa malo pamo.

² Nipo wifuma mungwe kumulu kovurumukizya nga ni mkukumo wa chinkuka chikuru, izula ng'anda yonse iŵenzemo.

³ Eŵaŵonekera malulimi oyaŵanikana, nga ni a mulilo; winkala pa aŵo umo umo.

⁴ Naŵo ŵonse ŵezula Mzimu Mtuŵa, eyambolaŵira na vilaŵiro vimbi umo Mzimu mwechiŵalaŵirisyira.

⁵ Lomba pa Yerusalemi penzonkala Ayuda, ŵochinzika Mlungu, kufumila ku mitundu yonse iri pansi pa lulezi.

⁶ Pamene pewimvwika mungwe uyu winji wa ŵantu wilongana nozuvikazuvika, ali wonse poŵamvwa ŵenzolaŵira mchilaŵiro chake.

⁷ Naŵo ŵonse ŵenzododoma nozuzuka ŵechiti, Ŵonani, kansi ŵonse aŵa olaŵira nta Galilaya?

⁸ Tikumvwa syani ali wonse mchilaŵiro chake chitivyalikwa nacho?

⁹ Aparti na Amedi na Aelami, na aŵo onkala mMesopotamiya, mu Yudaya na mKapadokiya, mPonto na mu Asiya,

¹⁰ mFrugiya na mPamfuliya, mu Egupto na mvitwa vya Libiya vya ku Kurene, na alwendo ŵofuma ku Roma niŵo Ayuda na ŵoyaruka kumo,

¹¹ Akrete na Aarabu, tuŵamvwa olaŵira mvilaŵiro vyasu vikuru vya Mlungu.

¹² Naŵo ŵonse ŵezuzuka nokanganya, enenana umo na muyake, Kansi ni chinji ichi?

¹³ Sembe ayakene echita nchululila enena kuti, Aŵa akuta mvinyu.

¹⁴ Lomba Petro epanama pamo na ŵala kumi na umo etumpula lizu lake eŵakundululila kuti, Mwanalume mwa Yudaya na mweo monse munkala pa Yerusalemi, nachiziŵikwe ichi kwanu, teyani matu ku malizu ŵangu.

¹⁵ Aŵa aliyokolwa, umo mmwalingira, pakuti lomba likaliyokwera zuŵa;

¹⁶ sembe ili ni lila linenewa mwa ula muŵirizi Yoweli;

¹⁷ Kuze kuŵe mmasiku ŵosililila, akuti Mlungu, Nize nipungulile Mzimu wangu pa miŵili yonse: Ninga azalosye ŵana ŵanu analume na anakazi, Alumbwana ŵanu azaŵone vizwezwe, Na akuru ŵanu azalote maloto:

¹⁸ Inde, pa akapolo ŵangu na pa vituntulu vyangu mmasiku ŵala Nize nipungulilepo Mzimu wangu; naŵo azalosye.

¹⁹ Nize nilangizye vyozizwisya mlulezi mmulu, Na viziŵikwilo pa charo cha pansi; Mlopa na mulilo na mpuye wa chusi:

²⁰ Zuŵa lize lisanguke kuŵa mfinzi, Na mwezi kuŵa mlopa, Palikaliyekuza siku la Asikuru, Lila likuru loziŵikwa:

²¹ Kuze kuŵe kuti ali wonse ati azaliite zina la Asikuru azapuzumushiwe.

²² Mwanalume mwa Israeli, imvwani aŵa malizu: Yesu wa ku Nazarete, muntu efuma kwa Mlungu nolumbishiwa kwanu na vyampamvu na vizwezwe na viziŵikwilo, vyechichita Mlungu mwa yeve pakati panu, nga ni umo mmuziŵira mwaŵene;

²³ mwimpachika wamene uyu nompaisya na manja a ŵantu amisusya, apo akapunziwe mwechipangira Mlungu nzeru noziŵilatu:

²⁴ wamene wechiusya Mlungu pechima gulula vyoŵaŵa vya imfwa: pakuti ntekwikumika kuti akatiwe nayo.

²⁵ Chifukwa Davide enena zyake, Nilola Asikuru mmenso mwangu maŵero; Pakuti ali ku kwanja kwangu kwendi ningasung'unzike:

²⁶ Ni pewitemwa mtima wangu, na lulimi lwangu lwisangalala; Eya, muŵili wangu nawo uzomange chifuto chake pogomezya:

²⁷ Chikomo simti msiye moyo wangu mu Hade, Kano kumpeleka Wozila wanu aŵone maŵolero.

²⁸ Mwiniziŵisya njira zya moyo; Mze munizuzye nseko poŵapo kwanu.

²⁹ Mweo mwakwasu, nipinge namwe kosapwerera zya mkuru wa kale Davide zyakuti echifwa noŵikiwa, na mtupa wake uli pasu kuza na lero.

³⁰ Teti pakuŵa muŵirizi noziŵa kuti Mlungu emlapizya njazi yakuti azapyanike pa chilimba chake wa mwa chotwala cha muluunda mwake;

³¹ yeve elosya ichi, elaŵira zyouka soti kwake Kristo, zyakuti aliyosiiwe mu Hade, na muŵili wake uliyoŵole.

³² Uyu Yesu Mlungu emuusya, nase tonse nise ntoni zyake.

³³ Teti paluimyiwe ku kwanja kwendi kwa Mlungu nopokera kwa Awisi chipango cha Mzimu Mtuŵa wapungulila ichi chimuŵona nochimvwa.

³⁴ Pakuti Davide aliyokwera kumulu yai: sembe mwine echiti, Asikuru enena na Asikuru ŵangu, Nkala weo kwanja kwangu kwendi,

³⁵ Mpaka penti nituchisye tupondo twako kuŵa msamilo wa malwayo ŵako.

³⁶ Teti chiŵanza chonse cha Israeli nachuziŵa ngako kuti Mlungu emchisya yeve Asikuru na Kristo, wamene uyu Yesu wimwipachika.

³⁷ Lomba pamene pechimvwa echontewa mitima eŵanenera Petro na apostolo ayakwene, Akwasu, tichitenji?

³⁸ Petro echiti kwaŵo, Yarukani mitima nobatiziwa mweo monse mzina la Yesu Kristo kolekelewa kwa viipa vyanu, ninga mpokere mtulo wa Mzimu Mtuŵa.

³⁹ Pakuti ichi chipango chiri kwanu na ku ŵana ŵanu na ku ŵonse ali patali, ŵonse amene Asikuru Mlungu wasu ŵati aitire kwake.

⁴⁰ Naye eŵonesya untoni na malizu ayakene anyinji, eŵachimula echiti, Mulipuzumusye pa luko luno lopetamapetama.

⁴¹ Nipo amene ŵala epokera malizu ŵake ebatiziwa: eyangizyiwa siku lamene lila ŵantu nga ni myanda makumi atatu.

⁴² Naŵo ŵenze kankalilo mmayeruzyo a apostolo na mkuyanjana kwaŵo, mkusuna mtanda na mmalombero.

⁴³ Nipo ŵonse echita mwezo: vyamazuzu navyo na viziŵikwilo vinyinji vichitiwa na apostolo.

⁴⁴ Naŵo ŵonse ezomera enze pamo, enze navyo vyonse vyosanzya;

⁴⁵ esitisya vyenze navyo na chuma chaŵo noviyaŵira ŵonse, nga ni umo ali wonse mvimsoŵera.

⁴⁶ Nsiku na nsiku enzokoselela na mtima umo mchipupilo nosuna mtanda kwaŵo, nopoka vyakulya kosangalala na mitima yendi,

⁴⁷ komlumba Mlungu na kuŵa nacho chisomo ku ŵantu ŵonse. Asikuru naye eŵayangizizya nsiku zyonse ŵala enzekuti apuzumushiwe.