Macitilo 19 - Mapangano Alomba 1923

¹ NIPO yenzepo peenze Apollo pa Korinti Paulo akapule charo cha milundu efwika ku Efeso nofwanga asambili ayake:

² naye eŵanenera, Kansi mwimpokera Mzimu Mtuŵa pemwizomera? Echiti kwake, Yai, chukanga kumvwa sitichimvwa kuti alipo Mzimu Mtuŵa.

³ Echiti, Nga mwibatiziwa mchinji? Naŵo ŵechiti, Mu ubatizo wa Yohana.

⁴ Nipo Paulo echiti, Yohana ebatiza nobatizo woyaruka mitima, kulaŵira na ŵantu kuti amzomere uyo ati aze pavuli pake, ni Yesu.

⁵ Lomba akamvwe ichi ebatiziwa mzina la Asikuru Yesu.

⁶ Naye Paulo akaŵasintilile manja ŵake Mzimu Mtuŵa eŵazila, naŵo elaŵira mvilaŵiro nolosya.

⁷ Ŵonse ŵala ŵenze nga ni analume kumi na aŵiri.

⁸ Lomba eloŵa msunagoge nolaŵira kwa mkanka myezi itatu, kukonshana noŵeteka mvyofumu wa Mlungu.

⁹ Sembe ŵambi pechiliyumisya mitima nonyanyaizya, ponena viipa vya Njira iyo pa menso pa liumba, epatukana naŵo noŵapatusya asambili, kukonshana nsiku zyonse mosambilila mwa Turano.

¹⁰ Ichi chenzepo virimika viŵiri; tetyo ŵonse ŵonkala mu Asiya ni pechilimvwa lizu la Asikuru, Ayuda na Ahellene.

¹¹ Mlungu echita vyampamvu vyosakumika na manja a Paulo:

¹² tetyo kwa alwele ni pekwiuliwa kufuma pa muŵili wake tumicheka na mikunguru, na matenda eŵaleka, na mizimu iipa ifuma.

¹³ Sembe Ayuda ayake soti ŵoyendayenda, ŵofumya viŵanda, etunamila kutomola pa aŵo ŵenze nayo mizimu iipa zina la Asikuru Yesu, echiti, Numlapizyani mwa Yesu wakuŵirizya Paulo.

¹⁴ Lomba enzepo ŵana asano na aŵiri a chite Skeva, Muyuda, mkuru wa ansembe, amene enzochita teti.

¹⁵ Nipo mzimu uŵipa wiyasuka noŵanenera, Yesu numziŵa, na Paulo numziŵa; nga mweo nimwe ŵani?

¹⁶ Naye muntu uwenzemo mzimu uŵipa eŵagudukira noŵapulamo ŵonse aŵiri noŵakanga, ni pechimankuka umo mnanda chintaku nolasiwa.

¹⁷ Ichi chiziŵikwa ku ŵonse, Ayuda na Ahellene, onkala pa Efeso; na mwezo wiŵakata ŵonse, na zina la Asikuru Yesu lichinzikiwa.

¹⁸ Naŵo anyinji ŵala ozomera echiza, esokolola nolongosola machitilo ŵaŵo.

¹⁹ Nte atonto a ŵala enzochita mayere akalonganike mabuku ŵaŵo echizoŵashoka pa menso pa ŵonse; ependa chitema chake efwanga ni ndalama makumi asano kupasya na myanda kumi.

²⁰ Teti lizu la Asikuru likula na mpamvu nopulamo.

²¹ Lomba vikasile ivi Paulo echita nzeru mu mzimu mwake akapite pa Makedoniya na Akaya zyakuya ku Yerusalemi echiti, Pavuli poyako nikaŵoneko na ku Roma.

²² Nipo akatume ku Makedoniya aŵiri a ŵala omtumikila, Timoti na Erasto, yeve yeka esalila mu Asiya kwa nsita.

²³ Nga ni pa nsita ila penze chiwawa chikuru cha Njira iyo.

²⁴ Pakuti muntu muyake zina lake Demetriyo, masiri wofula, wamene eyenga tuŵimba twa lambo twa Artemi, ni penzoshukiramo abobo na makweo anyinji.

²⁵ Eŵalonganika, pamo na amasiri a mulimo uyo, echiti, Akwasu, muziŵa kuti chuma chasu chufuma ku mulimo uyu.

²⁶ Namwe muŵona na kumvwa kuti nte pa Efeso peka, sembe nga ni pa Asiya ponse, uyu Paulo oŵeteka nopatusya anyinji, nonena kuti ntiili milungu iyo yuchitiwa na manja.

²⁷ Tuyopa nte kuti uyu umasiri wasu upepuliwe weka, sembe soti kuti chipupilo cha mlungu mwanakazi mkuru Artemi chichishiwe chatyala, na kuti asishiwe pokuru wake, uyo wakulambila a mu Asiya monse na mvyaro vyonkalamo ŵantu.

²⁸ Naŵo akamvwe teti echipya mitima ngako ekuwa echiti, Mkuru ni Artemi wa ku Efeso.

²⁹ Lomba munzi wizula kapiringupiringu: naŵo eutukiramo na mtima umo mnanda yosoŵeramo akakate Gayo na Aristarko, a ku Makedoniya, a ulwendo wa Paulo.

³⁰ Nipo Paulo pechiti aloŵe mwenze ŵantu asambili ntemzomezya.

³¹ Ŵambi naŵo akuru a mu Asiya pakuŵa viuza vyake etuma kwake nompapatira asalitwala mnanda yosoŵeramo.

³² Teti ŵambi ekuwa chakuti, ŵambi chakuti: pakuti liumba lenzopokoserana; winji siwiziŵa chikomo chechilonganira.

³³ Lomba emfumya Alesandro mliumba, Ayuda ni emsalula. Naye Alesandro echeuzya na kwanja esakolikanila ku ŵantu.

³⁴ Lomba pamene pechiziŵa kuti ni Muyuda ŵonse na lizu limo nga ni nsita ziŵiri ekuwa, Mkuru ni Artemi wa ku Efeso.

³⁵ Pamene mlembi wa ku munzi akamyalalike liumba echiti, Mwa ku Efeso, kansi ni ŵani asaziŵa kuti munzi wa Efeso ni wolindila chipupilo cha Artemi mkuru na kalango ako kepona pansi kufumila ku Zeu?

³⁶ Teti poŵona kuti ivi sivingakanike momyalala nosachita kantu ka kasampu.

³⁷ Chikomo mwaza naŵo aŵa ŵantu asali anyalufwimbi a vya mvipupilo kano omchitira mlungu wasu mwanakazi msikila.

³⁸ Kati Demetriyo na amasiri ali naye pamo ana mlandu na muntu zilipo nsaka na anduna: nasimikizyane.

³⁹ Sembe kati musaka kantu kambi nakanenewe ku nsaka yopingula.

⁴⁰ Pakuti seo chendi talikolomolera mlandu na chiwawa cha lero, pachisali chikomo: nase pa ichi sitingalulule zyongano ili.

⁴¹ Naye akanene teti esuzula maumba.