Macitilo 18 - Mapangano Alomba 1923

¹ PAVULI pa ivi eima pa Atene, efwika ku Korinti.

² Efwangako Muyuda chite zina lake Akula, mtundu wake ni Mponto, efuma lomba pano ku Italiya, pamo na mkazi wake Priskilla, pakuti Klaudiyo eŵauzya ŵonse Ayuda afumemo mu Roma: naye eŵazila;

³ pakuŵa a umasiri umo enkala naŵo pamo, naŵo epotola; pakuti umasiri waŵo wenze wotima mahema.

⁴ Naye enzokonshana msunagoge masabata ŵonse nosakoŵeteka Ayuda na Ahellene.

⁵ Sembe pechifwika Sila na Timoti kufumila ku Makedoniya lizu ilo limkakamizya Paulo, eŵachitira untoni Ayuda wakuti Yesu ni Kristo.

⁶ Naŵo pechikanilila nochita msiyakuŵi eivurumura minjira yake nonena naŵo, Mlopa wanu uŵe pa mitu yanu mweka; neo niliye mlandu: chitatikile lomba nakuya kwa a Mitundu.

⁷ Naye eima kwamene kula noloŵa mnanda ya chite zina lake Tito Yusto, wamene emlambila Mlungu, nanda yake yenzomangizyane na sunagoge.

⁸ Nipo Krispo mkuru wa sunagoge ezomera pa Asikuru pamo na chiŵanza chake chonse; na Akorinti anyinji pechimvwa ezomera nobatiziwa.

⁹ Nipo Asikuru emnenera Paulo usiku mmensompenya, Usayopa; nkonena, usamyalala:

¹⁰ pakuti neo nili nawe pamo; palive muntu ati azakuukile kukulasa: chikomo nili naŵo ŵantu anyinji muno mmunzi.

¹¹ Naye elalukamo chirimika chimo na myezi isano na umo, kulisambizya lizu la Mlungu mwa ŵeve.

¹² Lomba pamene Galliyo peenze mmbili wa Akaya Ayuda emuimila Paulo na mtima umo, echiya naye ku chilimba chopingula

¹³ echiti, Uyu muntu oŵenzya ŵantu kumlambila Mlungu kosusya dango.

¹⁴ Lomba Paulo pesakoimya pakanwa Galliyo eŵanenera Ayuda, Kati ukaŵa mlandu wa viipa kano kaŵiŵe kaipa, mwa Yuda, sembe namzomerezyani:

¹⁵ sembe kati akaŵa makonsho a malizu na mazina na dango lanu mwaŵene, pingulani mweo mweka; sinupangwa neo kupingula milandu iyi.

¹⁶ Naye eŵautusya pa chilimba chopingula.

¹⁷ Nipo ŵonse emkata Sostene, mkuru wa sunagoge, nomnyata pantanzi pa chilimba chopingula. Naye Galliyo echenda ivi vyonse.

¹⁸ Paulo akankalemo nsiku zinyinji pavuli pa ivi elailana na akwaŵo, noimapo mu wato kuya ku Suriya, enze naye pamo Priskilla na Akula; naye emeta mpala mKenkreya, pakuti elapa.

¹⁹ Ŵefwika ku Efeso, naye eŵasiya kulakwa: sembe yeve yeka eloŵa msunagoge nokonshana na Ayuda.

²⁰ Apo pechimsenga kunkala naŵo nsita ikuru ekana;

²¹ lomba polailana naŵo echiti, Nimuwerereni soti akapangwa Mlungu, nipo eima ku Efeso mu wato.

²² Naye akafume mu wato pa Kaisariya, echiyoilonjera eklezya nosikira ku Antiyokiya.

²³ Akasweko kwa nsita eimako, epita pa charo cha Galatiya na Frugiya mminzi mminzi, kwakosesya asambili ŵonse.

²⁴ Lomba echiza ku Efeso Muyuda muyake woitiwa Apollo, mtundu wake ni wa ku Alesandriya, wolongosola kwa nzeru; enze na mpamvu ya pa malembo.

²⁵ Uyu eyeruzyiwa mnjira ya Asikuru; na mtima wake pewenze na ntina enzolaŵira nosambizya wino vintu vya Yesu, eziŵa ubatizo wa Yohana weka:

²⁶ naye eyambolaŵira kokaŵalala msunagoge. Sembe pemumvwa Priskilla na Akula emuulila kwaŵo nomlululira wino njira ya Mlungu.

²⁷ Nipo pechiti nitaukire ku Akaya akwaŵo emchinchilisya noŵalembera asambili kuti amlondere: naye akafwike eŵayavya ngako amene ŵala ezomera mchawanzi:

²⁸ pakuti eŵakanikizya Ayuda kwene kantu pa menso pa ŵantu, nolangizya mmalembo kuti Yesu ni Kristo.