Macitilo 15 - Mapangano Alomba 1923

¹ ŴAMBINE esikirako kufumila ku Yudaya esambizya akwaŵo echiti, Kati mkakanosirimuka mwa msango wa Musa simngapuzumuke.

² Pamene Paulo na Barnaba akasusyane nokonshana naŵo kwene kantu, akwaŵo etetula kuti Paulo na Barnaba na ayake a ŵeve ŵaye ku Yerusalemi kwa apostolo na akuruakuru zya ntota iyi.

³ Teti ŵeve, a mu eklezya eŵapelekezya, epula pa Foinike na Samariya nolulula umo a Mitundu mwakuyarukira mitima: eŵatemwesya ngako ŵonse akwaŵo.

⁴ Nipo akafwike ku Yerusalemi epokelelewa na eklezya na apostolo na akuruakuru, nolulula vyonse vyechichita Mlungu pamo naŵo.

⁵ Euka ŵambi a chipatuko cha Afarisayo aŵo ezomera echiti, Ni chowamila kwasirimula noŵauzya kulisunga dango la Musa.

⁶ Naŵo apostolo na akuruakuru eungana kuyeruzyana zya uyu mlandu.

⁷ Lomba pepenze makonshano anyinji Petro epanama noŵanenera, Akwasu, muziŵa kuti kale Mlungu esalulamo mwa mweo kuti pakanwa pangu a Mitundu ni pati alimvwe lizu la evangelo nozomera.

⁸ Mlungu wamene oziŵa mitima eŵaŵonesya untoni poŵapa ŵeve Mzimu Mtuŵa nga ni umo mwetipera seo;

⁹ aliyochita salu pali seo na ŵeve, mkutuvya mitima yaŵo na mvwano.

¹⁰ Nga lomba mumyezyeranji Mlungu, pamsakoŵika lupanda pa mkosi wa asambili litikangotwala ausu wasu na seo?

¹¹ Lomba tugomezya kuti tikapuzumuke na chawanzi cha Asikuru Yesu nga ni ŵeve.

¹² Pamene apo liumba lonse lenze nuu: eteyera matu Barnaba na Paulo olulula viziŵikwilo na vyozizwisya vyechichita Mlungu mwaŵo kwa a Mitundu.

¹³ Nipo pechimyalala ŵeve Yakobo eyasuka echiti, Akwasu, teyani matu kuli neo:

¹⁴ Sumeoni walulula mwechiyonzyera Mlungu a Mitundu poyamba, kwapatulilamo zina lake ŵantu.

¹⁵ Malizu a aŵirizi ozomerezyana na ichi; umo mkwilembewera,

¹⁶ Pavuli pa ivi nize niwere, Nochimanga soti chimsasa cha Davide chichiwa; Nane nize nimange soti pa chiza pake, Nochipanamika:

¹⁷ Kuti ŵantu ŵosalapo amsakesake Asikuru, Na a Mitundu yonse alutuliwa pali ŵeve zina langu,

¹⁸ Akuti Asikuru, wamene oziŵisya ivi chitatikile pechiyamba charo cha pansi.

¹⁹ Teti ni panupingula kuti tisavufya a Mitundu amene omyarukira Mlungu;

²⁰ sembe kuti tiŵalembere aŵoleka tulango tofifya na kachenche na vyonyongolola na mlopa.

²¹ Pakuti Musa chitatikile mmaluko a chombalimbi ali naŵo mminzi yonse ŵomuŵirizya, pakupendewa malizu ŵake umo mmasunagoge masabata ŵonse.

²² Pamene apo kwiŵatemwesya apostolo na akuruakuru pamo na eklezya yamsuma kusalulamo ŵantu mliumba laŵo noŵatumizya ku Antiyokiya pamo na Paulo na Barnaba; niŵo Yuda woitiwa Barsaba, na Sila, ŵantu ŵoziŵikwa mwa akwaŵo:

²³ elemba teti noŵatuma kuti, Apostolo na akwasu akuru kwa akwasu a mMitundu a ku Antiyokiya na Suriya na Kilikiya mtende:

²⁴ Petichimvwa kuti ŵambi efumila kwasu emuŵevyani na malizu nopumvya mitima yanu, atiliyekupa tetulo;

²⁵ kwatitemwesya pakuŵa na mtima umo kusalula ŵantu noŵatumizya kwanu pamo na ŵotemweka ŵasu Barnaba na Paulo,

²⁶ ŵantu ekaŵalalila moyo waŵo pa zina la Asikuru wasu Yesu Kristo.

²⁷ Teti ni patatuma Yuda na Sila ati azamuuzyeni ŵeve vyamene ivi na pakanwa.

²⁸ Chikomo kwamtemwesya Mzimu Mtuŵa na seo kusamtwikani mtolo wolema kupula ivi vyowamila;

²⁹ vyakuti moleka vyopupila ku tulango na mlopa na vyonyongolola na kachenche; kati mwakulilesya pa ivi mwakuchita paweme. Tasila seo.

³⁰ Naŵo akasuzuliwe esikila ku Antiyokiya; lomba akalilonganike liumba ekapeleka kalata.

³¹ Ŵeve akakapende esekelela pochinsa kwa kene.

³² Nipo Yuda na Sila pakuŵa aŵirizi ŵeve soti eŵachimula akwaŵo na malizu anyinji noŵakosesya.

³³ Naŵo akasweko kwa nsita esuzuliwa pa mtendere na akwaŵo kuwerera ku eŵatuma. [

³⁴ Lomba kwimtemwesya Sila kusalako.]

³⁵ Sembe Paulo na Barnaba enkalave mu Antiyokiya, kusambizya noliŵirizya lizu la Asikuru pamo na ayakene anyinji naŵo.

³⁶ Akapitepo masiku Paulo emnenera Barnaba, Natiwerere lomba nosondera akwasu a mminzi yonse itenzoŵirizyamo lizu la Asikuru, tikaŵone mankalilo ŵaŵo.

³⁷ Lomba Barnaba epangwa kumuula pamo naŵo Yohana soti, zina lake Marko.

³⁸ Sembe Paulo ntelinga ni chiweme kumuula naŵo pamo wamene eŵasiya nowerera pa Pamfuliya, paliye kuya naŵo ku mulimo.

³⁹ Lomba penze ntota ikuru, tetyo ni pechipatukana umbi na muyake, na Barnaba emuula Marko pamo naye, noima mu wato kuya ku Kupro;

⁴⁰ sembe Paulo esalula Sila noimapo, posungikiwa na akwaŵo ku chawanzi cha Asikuru.

⁴¹ Naye epita pa Suriya na Kilikiya kwakosesya maeklezya.