Macitilo 13 - Mapangano Alomba 1923

¹ LOMBA ŵenzepo pa Antiyokiya, mu eklezya yenze palapa, aŵirizi na asambizi, Barnaba, na Sumeoni woitiwa Mfipa, na Lukiyo wa ku Kurene, na Manayeni elelewa pamo na Herode mfumu, na Saulo.

² Penzomtumikila Asikuru nolitana vyakulya Mzimu Mtuŵa echiti, Munipatulile Barnaba na Saulo ku mulimo unuŵaitirako.

³ Pamene apo akalitane vyakulya nosenga noŵasintilila manja eŵasuzula.

⁴ Teti ŵeve posuzuliwa na Mzimu Mtuŵa esikila ku Selukiya; kufumila kwamene kula echiya mu wato ku Kupro.

⁵ Apo peŵenze pa Salami eliŵirizya lizu la Mlungu mmasunagoge a Ayuda: enze naye Yohana mtumiki waŵo.

⁶ Naŵo akapule chitunda chonse kuza na ku Pafo efwanga muntu wa mayere, muŵirizi wa wenye, Muyuda, zina lake lenze Bar‐Yesu;

⁷ wamene enze pamo na mmbiri Sergiyo Paulo, muntu wa nzeru. Wamene uyu eliitira Barnaba na Saulo, nosaka kumvwa lizu la Mlungu.

⁸ Sembe Eluma ula wa mayere (pakuti lizu lake luteti polongosolewa) enzoŵasusya, esakompatusya mmbili pa mvwano.

⁹ Sembe Saulo, niye oitiwa soti Paulo, wozula Mzimu Mtuŵa emlolesisya

¹⁰ echiti, We uluzule chiŵepeko chonse na kaŵiŵe konse, we mwana wa muŵepeki, we chitinka wa viweme vyonse, kansi sulekoluvisya njira zyolungama zya Asikuru?

¹¹ Lomba ŵona, kwanja kwa Asikuru kuli pali weo, nawe uŵe mpofu wosaŵona zuŵa kwa nsita. Lomba pano apa chimponera chizungu na chimfinzi; naye enzopundisila nosaka womtangulila.

¹² Pamene apo mmbiri akaŵone chachitika ezomera, pozizwa na mayeruzyo a Asikuru.

¹³ Lomba Paulo na chikunka chake eima mu wato pa Pafo efwika ku Perga wa ku Pamfuliya: na Yohana epatukana naŵo ewerera ku Yerusalemi.

¹⁴ Sembe ŵeve efumila pa Perga epitilila nofwika ku Antiyokiya wa ku Pisidiya, eloŵa msunagoge zuŵa la sabata nonkala pansi.

¹⁵ Nipo pavuli popenda dango na aŵirizi akuru a sunagoge etuma kwaŵo kuti, Akwasu, kati muli nalo lizu lochinsa ŵantu laŵirani.

¹⁶ Pamene apo Paulo epanama echeuzya echiti, Mwaŵantu mwa Israeli, namwe mumuyopa Mlungu, teyani matu.

¹⁷ Mlungu wa mtundu uyu Israeli esalula ausu wasu noŵakwezya ŵantu penzozuŵaila mcharo cha Egupto: na kwanja kotumpula eŵafumya mwamene mula.

¹⁸ Nipo nga ni nsita ya virimika makumi ŵane enzoŵatumbatila mmalambo.

¹⁹ Naye apo akacheneke mitundu isano na iŵiri mcharo cha Kanane eŵapa charo chaŵo akachipyane nga ni virimika myanda ine na makumi asano:

²⁰ pavuli pa ivi eŵapa achipingula kuza na kwa Samwele muŵirizi ula.

²¹ Pamene apo ŵesenga mfumu: naye Mlungu eŵapa Saulo mwana wa Kishi, muntu wa mtundu wa Benjamini, nsita ya virimika makumi ŵane.

²² Nipo akamfumyepo epanamika Davide kuŵa mfumu yaŵo, wechichitira soti untoni wakuti, Namfwanga Davide, mwana wa Yesse, muntu wa pa mtima wangu, uyo ati azachite vyonse vinupangwa.

²³ Mu mbuto ya uyu Mlungu kwa chipango eŵaletera Israeli Mpuzumushi, ni Yesu;

²⁴ apo Yohana akatanguloŵirizya pakaliyekuza yeve ubatizo woyaruka mtima ku ŵantu ŵonse ŵa Israeli.

²⁵ Penzosilizya Yohana makani ŵake echiti, Mulinga neo nne ŵani? Ntenili wamene. Lomba ŵonani, akuza pavuli pangu muyake, unisawamila neo kuzimangulula nkwaŵilo zya mmendo ŵake.

²⁶ Akwasu, mwaŵana mwa mbuto ya Abrahamu, namwe mumuyopa Mlungu, kuli seo kutumiwa lizu lopuzumushi uyu.

²⁷ Chikomo aŵo onkala mu Yerusalemi na akuru ŵaŵo, pasamziŵa yeve kano malizu a aŵirizi ŵopendewa masabata ŵonse ni pechiŵasilizya pompa yeve mlandu.

²⁸ Naŵo chukanga aliyofwanga chikomo chompaira elomba kwa Pilato kuti apaiwe.

²⁹ Nipo akasilizye vyonse vilembewa vyake emsaula pa chimuti nomuŵika pa msitu.

³⁰ Sembe Mlungu emuusya kwa akufwa:

³¹ enzoŵaŵonekera nsiku zinyinji aŵo efuma naye ku Galilaya kuya ku Yerusalemi, amene lomba ni ntoni zyake ku ŵantu.

³² Nase tumleterani makani aweme a chipango chichitika kwa ausu wasu,

³³ akuti Mlungu echisilizya chamene chila ku ŵana ŵasu mkumuusya Yesu; nga ni mkwilembewera msalmo lakaŵiri, Niwe Mwana wangu, lero lino nakuvyala.

³⁴ Nipo zyomuusya kwa akufwa wosawerera soti koŵola elaŵira teti, Nize nimpeni vyashuko vyozila nogomezyeka vya Davide.

³⁵ Pakuti echiti soti msalmo liyakene, Simngampe Wozila wanu kuŵola.

³⁶ Pakuti Davide pavuli pechitumikila nzeru zya Mlungu pa luko lwake eyona tulo noŵikiwa kwa amausu wake noŵola:

³⁷ sembe uyo wechiusya Mlungu aliyoŵole.

³⁸ Teti nachiziŵikwe kwanu, akwasu, kuti mwa uyu muŵirizyiwa kwanu kulekelewa kwa viipa:

³⁹ na pa yeve ali wonse ozomera ochishiwa wolungama pa vyonse vila vyasachishiwapo wolungama pali vyeve pa dango la Musa.

⁴⁰ Chifukwa choteti mochenjera chingamzileni icho chinenewa mwa aŵirizi;

⁴¹ Ŵonani, mwa mperu, mzizwe nozimaika; Pakuti nuchita mulimo mnsiku zyanu, Mulimo umti mkanozomera peka patonto, kati muntu akamlululilani.

⁴² Naŵo penzofuma epapatira kuti aŵa malizu aŵirizyiwe kwaŵo sabata likuza.

⁴³ Lomba akafundumuke a msunagoge anyinji Ayuda na ŵoyaruka ŵolambila eŵakonka Paulo na Barnaba: amene elaŵira naŵo noŵayumilizya kunkalilila mchawanzi cha Mlungu.

⁴⁴ Nipo sabata lichiza wilongana nga ni munzi wonse kumvwa lizu la Mlungu.

⁴⁵ Sembe Ayuda akaŵaŵone maumba echita tima novikanikizya vinenewa na Paulo notukana.

⁴⁶ Naŵo Paulo na Barnaba elaŵira kwa mkanka echiti, Kwiwamila kuti lizu la Mlungu liŵirizyiwe kwanu poyamba. Poŵona kuti mweo mulikaŵizya nolichisya mweka kusawamila moyo wosasila, ŵonani, tuyarukira kwa a Mitundu.

⁴⁷ Pakuti Asikuru etipanga teti echiti, Nakuŵika kuŵa msaniko wa Mitundu, Uŵe upuzumushi ku malekezyo a mvyaro.

⁴⁸ Nipo a Mitundu pechimvwa esangalala nolilemekezya lizu la Mlungu; naŵo ŵonse amene eikiwira futira ku moyo wosasila ezomera.

⁴⁹ Na lizu la Asikuru likumana mchitwa icho chonse.

⁵⁰ Sembe Ayuda eŵapimfya anakazi ŵolambila ŵomvwika na ŵantu ŵoziŵikwa a mmunzi, eŵausyira mapitikisyo Paulo na Barnaba noŵataya kunja kwa mipaka yaŵo.

⁵¹ Naŵo eŵakunkumulila lukungu la mmalwayo ŵaŵo nofwika ku Ikoniya.

⁵² Naŵo asambili ezula chimwemwe na Mzimu Mtuŵa.