Macitilo 12 - Mapangano Alomba 1923

¹ LOMBA nga ni pa nsita ila Herode mfumu etambika manja ŵake kuzingwisya ŵambi a mu eklezya.

² Naye empaya Yakobo mkuru wa Yohana na chinkalammanja.

³ Nipo akaŵone kuti kwitemwesya Ayuda eyangizyapo kumkata Petro soti. Enze masiku a mitanda iliye chizamba.

⁴ Naye akamkate emuŵika mkambolimboli, emsungisya ku mipingo ine ya manjolinjoli ŵane ŵane amlindilile; echiti amfumizye ku ŵantu pavuli pa Pasaka.

⁵ Teti Petro esungiwa mkambolimboli: sembe eklezya yenzompapatilila kwa Mlungu kokakasya.

⁶ Nipo pechisaka Herode kumfumizya, usiku wamene uyo Petro enzelele pakati pa manjolinjoli aŵiri womangiwa na manjerenjende aŵiri: achilindila naŵo pa mulyango enzosunga kambolimboli.

⁷ Nipo ŵonani, malaika wa Asikuru epanama mnkonde mwake, na kuŵala kwisanikira chipinda chenzomangiwemo: naye emnyata Petro mchitumba mwake nomuusya kuti, Uka luŵilo. Na manjerenjende efopoka pa manja ŵake.

⁸ Malaika enena naye, Vwala nyula, umange nkwaŵilo zyako. Naye echita tetyo. Emuuzya, Koloŵeka mwinjira wako, unikonke.

⁹ Naye efuma nomkonka; aliyoziŵa kuti nchendi chachitika na malaika, lomba elinga kuti eŵona mensompenya.

¹⁰ Naŵo akapule polindilila poyamba na pakaŵiri efwika ku chilyango cha chera chulola ku munzi; chizulika cheka, naŵo efuma notanguzyana pa njira imo; lomba pano malaika emsiya.

¹¹ Nipo Petro akayanzamuke echiti, Lomba nuziŵa chendi kuti Asikuru watuma malaika wake nonipuzumusya pa kwanja kwa Herode, na pa chilolero chonse cha mtundu wa Ayuda.

¹² Apo akalukane echiza ku ng'anda ya Mariya anyina a Yohana zina liyake Marko, kwenzolongana anyinji nolomba.

¹³ Pechikunta pa chisasa cha pa mulyango msimbi echizoitaŵa, zina lake Roda.

¹⁴ Akaziŵe lizu la Petro ntezulapo pa mulyango chikomo chosangalala, lomba eutukila mkati euzya kuti Petro alipeneme pa mulyango.

¹⁵ Naŵo emnenera, Wafunta weo. Sembe yeve enenesya kosakaika kuti nchendi. Naŵo ŵechiti, Ni malaika wake.

¹⁶ Sembe Petro enze kakuntilo: nipo akazulepo emuŵona nozizwa.

¹⁷ Sembe yeve eimya kwanja kuti amyalale, noŵalululira umo Asikuru mwamfumizya mkambolimboli. Echiti, Mkamuuzye Yakobo ivi na akwasu. Naye eima echiya kumbi.

¹⁸ Lomba kukache kwenze kavyunguvyungu kakuru kwa manjolinjoli kakuti Petro waya kuni.

¹⁹ Nipo Herode akamsake kosamfwanga eŵakonsesya achilindila notetula kuti ŵapaiwe. Naye efuma mu Yudaya esikila ku Kaisariya noswako.

²⁰ Lomba emnyesya mtima ngako ŵala ŵa ku Turo na Sidoni: ŵemzila na mtima umo, naŵo akamyanisye Blasto mkuru wa ng'anda ya mfumu, esaka mtendere, pakuti charo cha mfumu ni chenzochizya charo chaŵo.

²¹ Nipo pa siku la chipango Herode evwala minjira yofumu, enkala pa chilimba chopinguzi noŵalongosolera malizu a nsaka.

²² Naŵo ŵantu ekuwa echiti, Ni lizu la Mlungu, nte la muntu yai.

²³ Lomba pano apa malaika wa Asikuru emkoŵera, pakuti ntempa Mlungu mchinzi: elyewa na vikusi nosindika mzimu.

²⁴ Sembe lizu la Mlungu likula nopaka.

²⁵ Nipo Barnaba na Saulo efuma mu Yerusalemi akasilizye mulimo waŵo, ewerera noula Yohana zina liyake Marko kuya naŵo pamo.