Macitilo 11 - Mapangano Alomba 1923

¹ LOMBA apostolo na akwaŵo enze mu Yudaya echimvwa kuti Mitundu nayo ilipokera lizu la Mlungu.

² Naye Petro akafwike ku Yerusalemi ŵala ŵenze a chisirimuko ekanyana naye

³ echiti, Mwiloŵa ku ŵantu ŵosasirimuka na kulya naŵo.

⁴ Lomba Petro eyamba kwalululira mzikonkelana echiti,

⁵ Nenze mmunzi wa Yoppa nenzosenga Mlungu: lomba mkukomoka niŵona mensompenya, choulilamo chakuti chusika, nga ni chinyula chikuru chosishiwa kufumila kumulu na mapembe ŵane; chichiza pali neo.

⁶ Apo nikachilolesisye nichilingilila noŵona nyama zya pa charo zina mendo ŵane, na vilwani, na vyokalaŵa na tuni twa mlulezi.

⁷ Nichimvwa soti lizu lichiti kuli neo, Uka, Petro; paya ulye.

⁸ Lomba nichiti, Nte teti, Asikuru: pakuti kantu katyala kano kosali kakaliyoloŵe mkanwa mwangu.

⁹ Lomba lizu liyasuka pakaŵiri kufumila kumulu, Icho chakutuŵisya Mlungu usachichisya chatyala.

¹⁰ Ichi chichitika katatu, nipo vyonse vikokewa soti kuya kumulu.

¹¹ Pamene apo ŵonani, ŵantu atatu epanama pa ng'anda itenzemo, etumiwa kuli neo kufumila ku Kaisariya.

¹² Mzimu eniuzya kuya naŵo pamo kosachita salu. Naŵo aŵa akwasu asano na umo enipelekezya; nase tiloŵa mng'anda ya muntu uyu:

¹³ naye etiuzya umo mwechimuŵonera malaika alipeneme mng'anda mwake akuti, Tuma ku Yoppa, ukamuite Simoni, zina liyake Petro;

¹⁴ wamene azakuuzye malizu auti uzopuzumuke naŵo, weo na chiŵanza chako chonse.

¹⁵ Nipo penitatikolaŵira Mzimu Mtuŵa eŵaponera ŵeve, nga ni seo pa chiyambi.

¹⁶ Nane nilikumbuka lizu la Asikuru kuti enena, Yohana chendi enzobatiza na manzi; sembe mweo mze mbatiziwe na Mzimu Mtuŵa.

¹⁷ Teti kati Mlungu eŵapa ŵeve mtulo umo nga ni mwechipera seo nase, petizomera pa Asikuru Yesu Kristo, nga neo nenze ŵani kuti nimsusye Mlungu?

¹⁸ Naŵo akamvwe ivi emyalala nomchinzika Mlungu kuti, Teti Mlungu oŵapa a Mitundu naŵo kuyarukira mitima ku moyo.

¹⁹ Teti ŵala echulunganyiwa ng'ondo chikomo cha mazuzyo ŵeuka pa mlandu wa Stefano eyila mpaka ku Foinike na Kupro na Antiyokiya, ŵosalilaŵira lizu ku ali ŵonse sembe kwa Ayuda ŵeka.

²⁰ Lomba ŵenzepo ŵambi ŵa aŵo, a ku Kupro na Kurene, amene pechiza ku Antiyokiya elaŵira soti kwa a Chihellene, noŵirizya Asikuru Yesu.

²¹ Kwanja kwa Asikuru kwenze naŵo pamo, nawo winji wizomera nomyarukira Asikuru.

²² Mbirikisi yaŵo imvwika mmatu a eklezya yenze mu Yerusalemi: naŵo etuma Barnaba aye mpaka ku Antiyokiya.

²³ Naye akafwike noŵona chawanzi cha Mlungu esangalala, noŵachimula ŵonse kuti ayumilile mmitima nosungana na Asikuru:

²⁴ pakuti enze muweme nozula Mzimu Mtuŵa na mvwano: naŵo ŵantu anyinji eyangizyiwa kwa Asikuru.

²⁵ Nipo eima echiya ku Tarso kuyosaka Saulo:

²⁶ akamfwange echiza naye ku Antiyokiya. Nipo yenzepo kuti chaka chamsuma ŵenzolongana pamo mu eklezya nosambizya ŵantu anyinji; naŵo asambili eteyewa Akristo potatika pa Antiyokiya.

²⁷ Lomba mmasiku aŵa aŵirizi efuma ku Yerusalemi kusikila ku Antiyokiya.

²⁸ Epanama umo zina lake Agabo elosya mwa mzimu kuti pa charo chonse chonkalamo ŵantu paze paŵe chilala chikuru: chila chenzepo pa nsiku zya Klaudiya.

²⁹ Nipo asambili, ali wonse umo mwechikumira, epanga nzeru zyotumizya vyoyavya kwa akwaŵo ŵonkala mu Yudaya:

³⁰ chamene chechichita soti novitumizya kwa akuruakuru pa manja a Barnaba na Saulo.