Macitilo 10 - Mapangano Alomba 1923

¹ ENZEPO muyake pa Kaisariya zina lake Korneliyo, kenturiyo wa mpingo woitiwa wa Italiya,

² muntu wolambila nomuyopa Mlungu pamo na chiŵanza chake chonse, eŵapa ŵantu vyabule vinyinji nomlomba Mlungu nsiku zyonse.

³ Wamene uyu eŵona mmensompenya pasweta nga ni zuŵa lati senda malaika wa Mlungu oloŵa kwake nomnenera, Korneliyo.

⁴ Naye pomlolesisya noyopa echiti, Ni chinji, Asikuru? Enena naye, Masengero ŵako na vyabule vyako vukwera kwa chilukano pa menso pa Mlungu.

⁵ Lomba tuma ŵantu ku Yoppa akaule Simoni, zina liyake Petro:

⁶ onkala mwa Simoni wopuka mikupo, ng'anda yake iri mmbali mwa chimana.

⁷ Nipo akafumemo malaika elaŵira naye eita alumbwana aŵiri a pa ng'anda pake na linjolinjoli lolambila Mlungu la aŵo enzomlindilila;

⁸ naye akaŵalululire vyonse eŵatuma ku Yoppa.

⁹ Lomba mmawa mwake penzekuya ulwendo waŵo nopanamila ku munzi, Petro ekwera pa mtenje wa ng'anda kusenga, nga ni zuŵa pa mutu:

¹⁰ naye echimvwa njala nosaka kulya: sembe pamene penzoteŵeta kwimzila nga ni kukomoka;

¹¹ eŵona kumulu kwazuliwa na choulilamo chakuti chuseluka nga ni chinyula chikuru, chosishiwa na mapembe ŵane ku charo:

¹² mwenze mitundu yonse ya nyama zya mendo ŵane, na vyokalaŵa vya pa charo, na tuni twa mlulezi.

¹³ Na lizu limzila, Ima, Petro; paya ulye.

¹⁴ Sembe Petro echiti, Nte teti, Asikuru; pakuti nikaliyolyapo kantu konse katyala na kosali.

¹⁵ Nipo lizu limzila soti pakaŵiri, Chamene Mlungu chakutuŵisya usachichisya chatyala.

¹⁶ Ichi chichitika katatu: lomba pano choulilamo icho chiuliwa kuya kumulu.

¹⁷ Lomba Petro penzokaikila mu mtima zya mensompenya ŵechiŵona mfundo yake ni vinji, ŵonani, ŵantu ŵetumiwa na Korneliyo akakonshe ng'anda ya Simoni epanama pa chilyango,

¹⁸ eŵirikizya nokonsha kano Simoni, zina liyake Petro, onkala apo.

¹⁹ Lomba Petro penzoŵalingilila mensompenya Mzimu emnenera, Ŵona, ŵantu atatu okusaka.

²⁰ Lomba ima usike, uye naŵo pamo wosakaika kantu: pakuti naŵatuma ni neo.

²¹ Nipo Petro esikira ku ŵantu aŵo echiti. Ŵonani, ne nine umusaka: chikomo ni chinji chimwazila?

²² Naŵo ŵechiti, Korneliyo kenturiyo, muntu wolungama nomuyopa Mlungu, ana mbili iweme ku mtundu wonse wa Ayuda, euzyiwa na malaika wozila atume kumuitani ku ng'anda kwake na kumvwa malizu ŵanu.

²³ Teti eŵalovya mkati noŵapa malo. Mmawa mwake euka echiya naŵo pamo, na akwaŵo ŵambi a ku Yoppa empelekezya.

²⁴ Nipo mmawa mwake eloŵa mKaisariya. Naye Korneliyo enzoŵalindila, esilolonganika akwaŵo na viuza vyake vyendi.

²⁵ Nipo yenzepo kuti Petro eloŵa, naye Korneliyo emtenderezya novunama mnkonde mwake nomlambila.

²⁶ Sembe Petro emuusya echiti, Panamani; na neo nane nne muntu.

²⁷ Naye penzolaŵira naye eloŵa efwanga anyinji alulongane:

²⁸ eŵanenera, Mweo mweka muziŵa kuti nti chozomereka ku muntu Muyuda kulikungumizya kano kuzila ku muntu wa mtundu umbine; lomba Mlungu enilangizya nisatula ali wonse watyala kano wosali:

²⁹ chifukwa chake ni penichiza kosanyanyaizya apo peniitiwa. Teti nukonsha, Mwiniitiranji?

³⁰ Korneliyo echiti, Zyapitapo nsiku zine kuza na nsita ino nenzoisunga mwangu nsita yosenga ya zuŵa likati senda; nipo ŵonani, muntu epanama pantanzi pangu na vyovwala vyenze ngwee,

³¹ echiti, Korneliyo, lombero lako lumvwika na vyabule vyako vukumbukiwa pa menso pa Mlungu.

³² Teti tuma ku Yoppa uliitire Simoni, zina liyake Petro; onkala mwa Simoni wopuka mikupo mmbali mwa chimana.

³³ Ni penituma kwanu; namwe mwachita paweme pamwaza. Teti tonse tiri pano lomba pa menso pa Mlungu timvwe vyonse vyechimsuzulilani Asikuru.

³⁴ Nipo Petro epambanula kanwa echiti, Lezee naziŵa kuti Mlungu aliye salu:

³⁵ sembe mmitundu yonse uyo omuyopa nochita vyolungama ni wozomereka kwake.

³⁶ Lizu lila lyechitumizya ku ŵana a Israeli, loŵirizya makani aweme a mtendere mwa Yesu Kristo (uyo ni Mwine wa ŵonse)—

³⁷ lila lizu limuziŵa mweka, limvwika pa Yudaya ponse, kuyambila pa Galilaya pavuli pa ubatizo wechiŵirizya Yohana;

³⁸ ni la Yesu wa ku Nazarete, lakuti Mlungu emzoleka Mzimu Mtuŵa na mpamvu: wamene enzozungulila noŵachitira ŵantu viweme nopozya ŵonse ŵozuzika na muŵepeki; pakuti Mlungu enze naye pamo.

³⁹ Nase nise ntoni zya vyonse vyechichita mchitwa cha Ayuda na mu Yerusalemi; wamene soti wechipaya nompachika pa chimuti.

⁴⁰ Lomba Mlungu emuusya siku la mazo, nompa kuŵonekera pasweta

⁴¹ nte ku ŵantu ŵonse sembe ku ntoni zisaluliwa kale na Mlungu, ni kwa seo tichilya na kumwa pamo naye pavuli pechizyuka kwa akufwa.

⁴² Etipanga kuŵirizya ku ŵantu nochita untoni wakuti uyu ni wamene ula eikiwa na Mlungu aŵe Chipingula wa amoyo na akufwa.

⁴³ Uyu ni wechichitira untoni aŵirizi ŵonse, wakuti mzina lake ali wonse omzomera azapoke kulekelewa kwa viipa.

⁴⁴ Lomba Petro akalulaŵira malizu aŵa Mzimu Mtuŵa eŵaponera ŵonse elimvwa lizu.

⁴⁵ Naŵo a chisirimuko amene ezomera ezuzuka, ŵonse echiza na Petro, pakuti pa mitundu nayo pepunguliwa mtulo wa Mzimu Mtuŵa.

⁴⁶ Chikomo eŵamvwa ŵolaŵira mvilaŵiro nomzizya Mlungu. Pamene apo Petro eyasuka,

⁴⁷ Kansi muntu angatane manzi asabatiziwa aŵa, amene apoka Mzimu Mtuŵa nga ni seo?

⁴⁸ Naye etetula kuti abatiziwe mzina la Yesu Kristo. Pamene apo empapatira kuswako masiku ŵambi.