फीलीप्पीपा 4 - ॱलोवापाउलुगी खाता धाङ सेमस्युक ॱनाङवा 1 होझ्येरी ङी पी़नक्याओ, ङा खेक्याला चीदुङ झ्यीदीहो़क धेनी खेक्याला ढेन्दी हो़क। खेक्या ङी घाटो धाङ चो़पेन च्योक्रे हीन। धेनी चेवे रोवाक्याओ, देरेराङ झ्येरी चोवोगी नाङ तेन्पो ॱनेती धो़क। 2 ङा युओदीया धाङ सीन्तीके ॱङीउला, चोवोगी नाङ सेम्बा थी़न्दी धो़क, ॱनेरी श्योवा पुलाहीन। 3 धेनी ङी धेन्पे लेरोक, ख्यी़याः दे केमी ॱङीउला रोवा झ्यी ॱनेरी, ङा श्युवाहीन। घीझ्येरी ॱनाना खुङ ॱङीउगीयाः ताम्शाङगी लेगाला, ङीमुला कीलेमेस धाङ ङी लेरोक श्येम्माक्यामुला काल्ले ग्याप हो़तालाक। खुङ घीरीगी मीङ छेसोकगी धेप नाङला छी़ हो़तालाक। 4 खेक्या चोवोला तेन्दी, नाम्हीना घाटो झ्यी। ङा धाब्ले ॱनाहीन, घाटो झ्यी। 5 खीकी च्यो़पा ॱङ्यामच्युङ हो़गीनगो, मी घीरीला स्येरु च्युक। चोवो फेप्ये हीन्गीनगो ङ्येदुक। 6 घीन्गी थोकला दुङा माझ्यी हीना ॱनेछु घीरीला, काटीन क्षे श्यी़री ॱमो़लाम धाङ श्योवागी थोक्ने, खेक्याला घो़गीन घीरी को़न्क्षोकला श्यी़। 7 धेनी मीक्याई साम्लोलाराङ मेगीन, को़न्क्षोकगी श्यीदेगी खेक्याई सेम धाङ साम्लोला, मास्यीका येशुगी नाङ ॱरुङा जेगीलाक। 8 थाला पी़नक्याओ, खेक्या धेन्पा घी हीन्गीन धाङ कुरती घी हीन्गीन धाङ ढाङपो घी हीन्गीन धाङ चाङमा घी हीन्गीन धाङ चेवा थोप घोगीन, घी हीन्गीन धाङ घुस्यापक्षे घी हीन्गीन धेनी शाङा धाङ तो़पा थोप घोगीन रे हो़गीन, दो़नक्याला साम्लो तोङ। 9 खेक्याई ङाने घी ज्याङगीन धाङ खेलेन झ्यीगीन धाङ ङेन्गीन धाङ थोङगीन लाबक्या, राङगी मीछेला लाक्लेन झ्यी। धेनी श्यीदेगी को़न्क्षोक खेक्यामुला श्युक्वा जेगीलाक। फीलीप्पीपाक्याला थुक्चीक्षे श्युवा 10 धान्दा युन्रीङा च्यीक स्याम्ने, खेक्याई ङी कोरला सेम्डा याङदी झ्यीगीनगोला, ङा चोवोगी नाङ ॱमीच्यीकी ङ्यामो घी हो़क। खेक्या ङी क्षीला, ॱङोन्नेगी सेम्डा झ्यीदालाक हीना खेक्याला घुकाप माजोरपालाक। 11 ङाला ॱमेछाङगीन झ्युरी, ङा देरे ॱनामेन घीझ्येरी ॱनाना ॱनेछु घारे हीन्ना, होदेला सेम्बा च्यो़री धेयेगो ङी ज्याङहो़क। 12 ॱमेछाङगीन झ्युङगीन धाङ मेछो़ली झ्युङगीनगो घारे हुङालाक ॱनेरी, ङाला स्येयेहो़क। धेनी ढागीन हो़ना याङना तोक्ना धेनी मेछो़ली याङना ॱमेछाङगीनला छोवा क्याना, देरे ॱनेछु घारे हीन्ना याङना घीरीला सेम्बा च्यो़येगी साङवागो, ङी ज्याङहो़क। 13 ङाला तोपस्युक ॱनाङगीनगी गोने, ङी घीरी झ्यी थुक्वा। 14 घीहीन्ना ङी दुक्ङेलला खीकी रोवा झ्येरी, घा झ्येजुङ। 15 धेनी खे फीलीप्पीपाक्याराङ स्येलालाक, ङा ताम्शाङ स्येयेगी गोमा ङीमाक्याला माकेडोनीयाने डोवाराङ, तेरये धाङ लेन्येगी लेगाला खेक्या माना, श्येम्मा क्षो़छोक सी़याः ङाला रोवा माझ्ये। 16 घीझ्येरी ॱनाना ङा थेसालोनीकेरु हो़ताराङ, खेक्याई थेङ च्यीकने माङा ङाला घो़गीनगो कुरजुङ। 17 ङा खीकी ॱङेन्बागी रेवा झ्यीदामेन हीना खीकी तेरकीनगोला, झ्यीलाप माङा रास्योक ॱनेरी, ङा दो़दीहो़क। 18 ङाला थोप घोगीनने माङा घीरी थोप्हो़क। धेनी ईपाप्रोदीतोने खेक्याई कुरका ॱङेन्बागो थोप्ती, धा धान्दा ङाला घीरी छाङगीन हो़क। धेनी होदे ॱङेन्बा नी, ढीस्यीमगी क्षो़पा च्योक्रे को़न्क्षोकगी डुङदु थुक्ङेउ धाङ थुक ॱनुमा जे थुक्कीन दुक। 19 धेनी ङी को़न्क्षोकगी खेक्याई घो़गीन घीरी, मास्यीका येशुगी ढाङमेगी शीजे थोक्ने ॱनाङा जेगीलाक। 20 होरी को़न्क्षोक धाङ यापला, ग्युने ग्युन्दु शीजे हुङास्योक। आमेन। थामे छाम्डी 21 मास्यीका येशुगी नाङ धाम्पे मी घीरीला, ङी छाम्डी श्यी़। धेनी ङीमुला हो़गीन पी़नक्याई, खेक्याला छाम्डी श्यी़क। 22 खेक्याला धाम्पे मी घीरीगी धेनी ॱमीक्सेदु केसारगी फोडाङदु हो़गीनक्याई, छाम्डी श्यी़क। 23 चोवो येशु मास्यीकागी थुक्जे, खीकी सेमला ॱनेलास्योक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.