फीलीप्पीपा 3 - ॱलोवाली़ला क्षा माश्याक 1 ङी पी़नक्याओ, चोवोगी नाङ घाटो झ्यी। खेक्याला च्योई लाब दे धाब्ले ढीक्येला, ङा ॱना ॱमीसी़न्दा। धेनी दे खेक्याई ॱरुङक्योपगी क्षीला लाक। 2 की च्योक्रे मीक्या धाङ लेगा ङेन्पा झ्यीगीनक्या धाङ पाउ चेगीनक्याने जेम्दी धो़क। 3 घीझ्येरी ॱनाना को़न्क्षोकला थुक्ङीने ॱङीङकुर झ्यीगीन धाङ मास्यीका येशुगी नाङ, ङोम्सो झ्यीगीन धेनी ली़ला क्षा मेश्याक्कीन होराङक्याराङ, धेन्पा पाउ चेगीनक्या लाक। 4 घीहीन्ना ङा ङाराङला ली़ला क्षा श्याक्घोयेगी दो़न्दाक हो़क। मी च्यीकगी राङगी ली़ला क्षा श्याक्येगी दो़न्दाक हो़क ॱनेरी साम्ना, ङाला ॱयोल्ले माङा दो़न्दाक हो़क। 5 ङा केरी ङीमा ग्येपागोला पाउ च्येपालाक। धेनी ङा ईस्राएलगी मीरीक, बेन्यामीनगी ग्युपा धेनी ईब्रीपा मीरीकक्याई नाङने ईब्रीपा ॱङोन्नेगो धेनी क्षो़ठीमला क्षा श्याक्ना ङा फारुसीपा, 6 धेनी क्षो़ला स्युक्क्षे चीगीनला ताना, ङा नी क्षो़छोकला दुक्पु ताङगीन धेनी क्षो़ठीम नाङगी ढाङतेनगी कोरला ॱनाना, ङा क्यो़न मेगीन मी च्यीक हीन। 7 हीना ङी क्षीदु फेन थोक्वा घाजो़ हो़गीन घीरी, मास्यीकागी दो़न्दु दे घीरी ग्योङ हीन्गीन, ङी चीवी। 8 देचो़ च्यीगा मेन्दा, मास्यीका येशुला ङी चोवो हीन ॱनेरी, ङो स्येयेगी देरे चाक्षे लाबगी दोङदु, श्येम्मा घीरी ङा ग्योङ चीलाहीन। खोङगी क्षीदु ङी घीरी ॱलो़ तावी धेनी होदे घीरी ङी झोरा चीलीहो़क। दे नी, ङा मास्यीकागी झ्युङास्योक ॱनेरी लाक। 9 धेनी ङा खोङगी नाङ ॱने थुवास्योक। क्षो़ठीमला तेन्दी झ्युङगीन, ङी ङाराङगी ढाङतेन मेन्दा हीना धेपागी थोक्ने, को़न्क्षोकने थोप्कीन ढाङतेन दे, ङी मास्यीकाला धेपा झ्येरी थोप्पालाक। 10 ङी दो़पा नी, मास्यीकाला ङोस्येये धाङ खोङ छीवाने ॱलार सो़न्पो झ्युङगीनगी नी़थु स्येये लाक। धेनी खोङगी ङ्याङगीन दुक्ङेल च्योक्रे ङ्याङये धाङ खोङ ढोङगीन च्योक्रे ढोङये, 11 धेनी घाने ॱहाला झ्युङ थुप्ये हो़ना, ङा छीवाने ॱलार सो़न्पो लाङ थुक्वास्योक ॱनेरी रेवा हो़क। ॱमीक्यु डुप्येगी कोर 12 ङी दे घीरी एन्दुरु थोप्साहो़क याङना ङा याङदाक्पा झ्युसाहो़क ॱनेरी, ॱनामेन हीना दो़न घीन्गी क्षीला मास्यीकागी ङाला शीमा जेपाले, होदे शीम्येला राङ ङा काल्ले ग्याप्ती डी़हो़क। 13 पी़नक्याओ, ङी दो़न घीरी शीम्साहो़क ॱनेरी ॱमेसाम्हो़क। हीना ङा घी झ्यीदीहो़क ॱनाना, ग्यापला सोसासा दो़नक्या ज्येदी, दोङला हो़गीन दो़नक्याला स्युक ग्याप्ती, 14 मास्यीका येशुगी नाङ को़न्क्षोकगी नाम्खे श्यीङखामने, भो़पा ज्यागा थोप्येगी क्षीला, ङा ॱमीक्यु देला स्युक ग्याप्ती डी़हो़क। 15 धा होराङ सेम्ङीने ॱनाटो ॱङेङ्याक्याई सेम्बा च्यीक झ्युङु। धेनी दो़न रीङगाला खेक्याई साम्लो श्येम्मा हो़ना, को़न्क्षोकगी होदेगोवाः खेक्याला सावो तो़न जेगीलाक। 16 धेनी को़न्क्षोकगी होराङला सावो ॱङो़न जेजागोला च्यीगा तेन्ती, होराङ मीछे पी़घो़। 17 पी़नक्याओ, ङाला पे श्याक्ती मीछे पी़ धेनी हीकी मीछेला खेक्याई थोथा पे च्योक्रे, मीछे पी़गीनक्याला श्यीप्ता झ्यी। 18 घीझ्येरी ॱनाना ङी एम्मा दे मीक्याई कोरला आरुङ माङा ॱनेहो़क धेनी धान्दा ॱमीक्क्षु तारी, ङा धान्दा ॱनाहीन, खुङक्या मास्यीकागी ग्याङस्यीङगी डा च्योक्रे मीछे क्याली। 19 खुङक्याई मीछेगी था नी तोरस्यीक लाक धेनी खुङक्याई ल्हागो, खोरी फोवा लाक धेनी खोरी ङोछाला खुङक्याई शीजे हो़तालाक। धेनी खुङक्याई सेम जीक्तेनगी दो़नक्याला क्षाः लाक। 20 हीना होरी फायु नी, नाम्खे श्यीङखाम लाक। धेनी होदेने फेप्ये हीन्गीन क्याम्गो़न चोवो येशु मास्यीकाला, होराङ घुक्ती धेतालाक। 21 धेनी घीरी खोङबा राङगी वाङ होकदु जे थुक्कीन नी़थुगी राङ, होरी थापक्योवा ली़ला खोङबाराङगी शीजेगी कुली़ च्योक्रे ग्युरा जेगीलाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.