२ तीमोथेउ 1 - ॱलोवा1 मास्यीका येशुगी नाङ हो़गीन छेगी धाम्चा च्योक्रे, को़न्क्षोकगी थुकोङ थोक्ने, मास्यीका येशुगी कुछाप ङा पाउलुने, 2 ङी चेवे भु तीमोथेउला, याप को़न्क्षोक धाङ होरी चोवो मास्यीका येशुने, थुक्जे धाङ ॱङीङजे धाङ श्यीदे भाबास्योक। धेपाला तेन्पो धेयेगी सेमस्युक 3 ङी ङीन-छेनगी ॱमो़लामला, ख्यो़ला च्योई ढेन्सो़ झ्यीदी घाङला, ङा को़न्क्षोकला थुक्जेक्षे श्यी़लीहो़क। ङी धाङबी फामा च्योक्रे, खोङबाला ङा स्येराप शाङपोगी थोक्ने श्याप्ची श्यी़लीहो़क। 4 ख्यी़ छीमाक ढेन्दी घाङला, ङा घाटोगी खाङयेगी क्षीला, ङा ख्यो़ला थुक्येला ॱमीच्यीकी दो़दीहो़क। 5 ख्यी़ धेपा ढाङपोगी ढेन्सो़ ङाला झ्युजुङ। धेपा दे एम्मा ख्यी़ ईबी लोईस धेनी ख्यी़ आमा ईहुनीकेगी नाङदु हो़गीनगो, ख्यी़ नाङदुवा दुक ॱनेरी ङाला यीच्चे तेन्पो हो़क। 6 होझ्येरी ङी ख्यी़ खाला लाक्पा श्याक्ती, को़न्क्षोकने ख्यो़ला थोप्था ॱनाङज्यीनगी मे दे सो़री श्याक्येला, ङा ख्यो़ला ढेन्सो़ ॱलाङाहीन। 7 घीझ्येरी ॱनाना को़न्क्षोकगी होराङला ॱङीङ च्युङागी सेम्ङी मेन्दा, नी़थु धाङ झाम्पा धाङ राङ छो़ शीम्गीनगी सेम्ङी ॱनाङ हो़तालाक। 8 होझ्येरी होरी चोवोगी पाङपो तेरये धाङ खोङबागी चो़न्पा, ङी क्षीला ङोजा माझ्यी। हीना को़न्क्षोकगी नी़थुगी थोक्ने, ताम्शाङगी क्षीला ङीमुला दुक्ङेलगी गेनगो खुर। 9 खोङबागी होराङला थारपा जेदी धेनी धाम्पा झ्युङयेला होरी लेगागी मेन्दा, खोङबाराङगी थुकोङ धाङ थुक्जेगी थोक्ने होराङला भो़ जेपालाक। थुक्जे दे नी एम्मा कावा ॱमाचुक एन्लाराङ, मास्यीका येशुगी गोने होराङला ॱनावालाक। 10 धेनी होरी क्याम्गो़न मास्यीका येशुगी फेप्सुने थुक्जे दे, धान्दा ॱङो़न्दु जेपालाक। धेनी खोङबागी छीवाला चामे जेदी, ताम्शाङगी गोने थामेपे छेसोक धाङ छीवा मेपे छे सावो जेपालाक। 11 दे ताम्शाङगी क्षीलाराङ ङा क्षो़ सेटाक झ्यीगीन, धाङ कुछाप धाङ ॱलोपो़न च्यीक को़वाहीन। 12 दी झ्येरी ङा हुरे दुक्पु ङ्याङाहीन। हीना ङी सी़ खाला धेपा झ्यीगीनगो, ङाला स्येये झ्येरी ङा ङोमेछा। याङ ङाला च्योगीनगो होदे ङीमा थुक्पे खोङबा राङगी ॱरुङगीलाक ॱनेरी, ङाला दुङा घीया मीदुक। 13 मास्यीका येशुगी नाङ हो़गीन धेपा धाङ झाम्पागी गोने, ख्यो़ ङाने घोरकीन ॱलापच्या धेन्पाक्या तेन्पो ॱरुङ च्यीक। 14 ख्यो़ला चोचा गेन शाङपोगो, होरी नाङ श्युक्कीन धाम्पे थुक्ङीगी गोने ॱरुङ। 15 एशीयारु हो़गीन घीरी धाङ होदे खोक्ने फुगेलोस धाङ हेरमोगेने ॱङीउगी, ङाला पाङगीनगो ख्यो़ला स्येये हो़तालाक। 16 चोवोगी ओनीसीफोरुगी नाङमीला थुक्जे शीयास्योक घीझ्येरी ॱनाना खी़ ङाला थेङ माङक्षे सेमस्युक पारजुङ धेनी ङा चो़न्पा हीन्गीनगोला ङोजा माझ्येजुङ। 17 हीना खो रोमला ॱलेप्ती, ङा ॱमाङेगीन थुक्पे ॱङीरी झ्येरी ङाला चावालाक। 18 चोवोगी ङीमागोला खोङबागी खोला थुक्जे शीयास्योक। धेनी एफीसुरु खी़ ङाला श्यी़गीन श्याप्तोक घीरी, ख्यो़ला घामोमा स्येये हो़तालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.