१ तीमोथेउ 3 - ॱलोवाक्षो़छोकगी तातोक्पाक्या 1 “क्षो़छोकगी तातोक्पा झ्युङङी दो़गीनगी, ले शाङा च्यीक दो़दालाक” ॱनागीन लाब दे ॱलो खेलादुक। 2 होझ्येरी क्षो़छोकगी तातोक्पागो क्यो़न्जुक घीया मेगीन धाङ केमी च्यीकगी ख्योवा, साम्लो थोङा, छो़ शीम्गीन धाङ याराप शाङा धाङ डो़न्बो सुयेला घागीन धेनी ॱलोपो़न झ्यीयेला खेवा हो़गीन, 3 धेनी क्षाङदुवा मेगीन, चुक्वा मेगीन हीना श्यीवा हो़गीन धेनी चो़पा मेग्याप्कीन धाङ ॱङुला ॱमेक्षाक्कीन हुङ घो़गुलाक। 4 खो राङगी टुवाक्याला घीरीने यारापगी थोक्ने, खाला ङेन्पो शो़री राङगी नाङमीला घामोमा क्योङ घोगीलाक। 5 घीझ्येरी ॱनाना राङगी नाङमीला क्योङ ॱमेस्येगीनगी, को़न्क्षोकगी क्षो़छोक घाङगी झ्येरी क्योङ थुक्कीले? 6 खो धेपाला साम्बा ग्युरवा मी हुङये मेतालाक घीझ्येरी ॱनाना खो पोवा केरी धी़कगी क्षेपा नाङला ल्हीम थुप्कीलाक। 7 फीदी मीक्यागी तादाङदुवा, खो शाङा हो़गीनगी ङेन्डा हुङघो़गीलाक। देरे मेन्ना खो ङोजा धाङ धी़कगी ॱङीपला छी़येगी ङेन्का हो़तालाक। क्षो़छोकगी श्याप्तोक्पाक्या 8 क्षो़छोकगी श्याप्तोक्पाक्या याराप धाङ खा ॱङी मेगीन धाङ क्षाङ माङा थुङङी मेदो़गीन धाङ ॱङुला ॱहाम्बा मीझ्यीगीन हुङघो़गीलाक। 9 खुङक्या धेपागी साङवागोला स्येराप शाङपोगी थोक्ने, ॱरुङ घोगुलाक। 10 एन्ला होदेक्याई छो़ता झ्यी धेनी क्यो़न ॱमाफोक्पा थो़न्ना, खुङक्याला क्षो़छोकगी श्याप्तोक्पा झ्येरी लेगा झ्यीरु च्युक। 11 खुङक्याई केमीक्या होझ्येरीराङ याराप धाङ ठामा मीझ्यीगीन धाङ साम्लो थोङा धाङ घीरीला ढाङपो हुङघो़गीलाक। 12 क्षो़छोकगी श्याप्तोक्पागो केमी च्यीकगी ख्योवा हुङ घोगीलाक धेनी राङगी टुवाक्या धाङ नाङमीक्याला घामोमा क्योङगीन हुङ घोगीलाक। 13 श्याप्तोक्पा झ्युरी श्याप्तोक घा पुगीनक्याला, राङला घुस्याप थोप्कीलाक धेनी मास्यीका येशुगी थोक्ने धेपाला ॱलोतेक्षे थोप्कीलाक। धेपागी साङवा 14 ङा ख्यी़चारु ग्योवा हुङयेगी रेवा झ्येरी, ख्यो़ला दे ॱलापच्याक्या ढीयाहीन। 15 हीना ङा फी राक्ना, खीकी सो़न्पो को़न्क्षोकगी नाङला च्यो़पा घारे झ्यीघोयेगो, स्येला झ्यीयेगी क्षीला ढीक्पी। नाङ दे नी, सो़न्पो को़न्क्षोकगी क्षो़छोक धाङ धेन्पा ॱङीगी कावा धाङ ॱमाङस्यी हीन। 16 क्षो़सेमगी साङवा ॱमीच्यीकी ॱहालेवा दुक ॱनेरी, हेक्या खे लेन्दाहीन। खोङबा नी ली़ला ॱङो़न, थुक्ङीगी ॱनामदाक्पा तो़न। नाम्खे भाङछेनक्याई खोङबाला ज्याल, मीरीक नाङला खोङ नी डाक, जीक्तेनदु खोङबाला धेपा झ्ये, शीजेगी थोक्ने नाम्खे श्यीङखामला फाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.