Nehemia 2 - KITABU KITAKATIFU

Nehemia azizaa Jerusalemi

¹ Mu mweli gwa Nisani, mu muhiga gwa sirini gwi liamiiha liu mwami Aritasakises, lwa yaali nalizaa, ndamuhilira iwaini. Ndali ningikiri kuva ku novovereri imbiri weve maziambiri mba.

² Kunangwa mwami yandeva, “Kigira ki oveeye novovereri mu moni mumwo? Sioveeye mulwaye mba, Kunangwa kuduuka vove ovovereri vwu mumwoyo.” Maku ndaali nuvuti ligali,

³ na ndamuvolera, “Mwami ahindiri mihiga ni mihiga! Kigira ki mburi kuva novovereri lwi lidaala linene, ilia avaguuga vange vayavirwa mu, liveeye amang'anye na ivirivwa vialio viamala kusambwa numuliru?”

⁴ Mwami yandeva, “Ni kindu ki cha wenyaa?” Maku ndaasaara ku Nyasaye wu mwigulu,

⁵ ma nimbolera mwami, “Niiva ivi omwami uyanziziywi niinzi kandi uyanzi kongolera ilienya liange, mwaza yaanza oleke nzie mu kivala chi Ivuyuda, mu lidaala linene uwa avaguuga vange vayavirwa, kunangwa nduki kwumbaka lidaala linene yilio vuhia.”

⁶ Maku mwami, nu mukali weve niyikaye ahimbi kuye yandeva, “Logendo lulwo lulavugula ing'inga yili, na nuwirane ing'inga ki?” Kunangwa gayaanziza ku mwami kunduma; kunangwa ndamuvolera ing'inga ya nzirana.

⁷ Ndavolera mwami kandi, “Niiva gayanzikaa ku mwami, leka mbeevwe zibarwa zia mbilira avamihi vi kivala keveeye imadioli wu mugera gwa Efurate mbagonye valeke nzie Ivuyuda ni mirembe.”

⁸ Kandi ndaateva mbeevwe ibarwa yindi mbiliri Asafu, mulindi wu militu ju vwami, imulagaa aduuki kumba misaala nombe vikongo vie virivwa vie imbinga ikingaa Litembeli kandi via madigi gi lidaala linene kandi vie inyumba yainze komenya mu. Mwami yamba viosi via ndateeva mbeevwe, kigira Nyasaye yaali harara niinzi.

⁹ Mwami yatuma valala ku vatumikiri veve avanene vi liihi kandi muganda gwa vasikari avaniina ku zibarasi harara niinzi, kandi ndalomba logendo kuzia imadioli wu mugera gwa Efurate. Wene yeyo ndahaana zibarwa ziu mwami ku avamihi.

¹⁰ Navuzwa Sanibalati, kutura mu lidaala lia Bezi-horoni, na Tobia, munene mu kivala cha Amoni, vahulira ndi mundu umali kuuza kuyinzilira avandu va Isiraeli vaduuki kugasizwa, vavihilirwa ligali kuvita kegero.

¹¹ Ndaziza niduuka Jerusalemi, na ku madiku gavaga

¹² sindavolera mundu kali mulala aga Nyasaye wange yaali naviiki mu mwoyo gwange ngolere Jerusalemi mba. Maku mu vudiku hagati, ndaavuuka, ninzia ichova, nimbuguyi vakekeeke ku avumuganda gwange. Ibunda ya ndanina ku nigwo mutugu gwa kwavugula gweng'ine.

¹³ Vwali nivukiri vudiku lwa ndatula mu lidaala linene kuvitira mu kirivwa chi Livona ku lovega lwi imadioli kandi ninzia isavaalu kuvitira ha kidaho cho Goyoka kuduuka ku kirivwa cha Mandu. Lwa ndangendaa, ndahenzeriza amadigi gi lidaala linene agasambuka kandi ni virivwa viononywa numuliru.

¹⁴ Maku kolovega lwi Ivugwi lwi lidaala linene ndazia Ivaale kuduuka ku kirivwa chi kidaho kandi ku Lidavalia liu mwami. Ibunda ya ndaali niniini ku, siyaali inyala konyoora uvwiyangu vwu kuvitira mu mba.

¹⁵ Kunangwa ndasulunguta kuduuka mu livona lia Keduroni kandi ninzizagilira kuzia, nimbenzeriza lidigi liasasuguka. Maku ndiranira ku ninzira ndalanzere ya ndatulira ku, inzirana mu lidaala linene kuvitira mu kirivwa chi Livona.

¹⁶ Sihaali ho numulala ku vanene vikivala yicho avamanya uwa ndaali anoho icha ndaali ningoli mba. Kandi sindaali nimboye ku ikindu choosi ku Avayuda vache vange mba, avasaalisi, aviimiliri, avanene anoho mundu wundi woosi uva navugilira kuyinzira naye mu miyinzi yigi.

¹⁷ Navuzwa kalunu ndavavolera, “Muloraa ikivi cha koveeye mu, kigira Jerusalemi liveeye mang'anye, na ivirivwa vialio viamala kusambwa mumuliru. Gendi kwumbake vuhia madigi gi lidaala linene na koherizi zisoni zietu.”

¹⁸ Na ndavavolera kuli Nyasaye yaali harara ninzi kandi kuli yangoonya, kandi gu mwami yaali naamboleye. Vaativura, “Gendi kutange liumbaka vuhia!” Na vetegeka kutanga miyinzi milahi yiji.

¹⁹ Lwa Sanibalati, Tobia nu Muarabu walangwa Geshemu, vahulira aga kwaali nikolohizaa kokora, vakosekeliza kandi vakolegeliza nivavoora, “Munyi muganaganaa mukolaaki? Munyi muzizaa kwibaala ku Mwami?”

²⁰ Ndaativura, “Nyasaye wu mwigulu ala kokoonya. Kunyi koveeye avatumikiri veve, na kuziiza kutanga uvwumbaki. Navuzwa munyi simuveeye ku nikidieli anoho vulungi kwenya miandu mu Jerusalemi mba, kandi simuveeye ni lisanga mu miima jalio mba.”