Joshua 3 - KITABU KITAKATIFU

Avandu va Isiraeli vaambuka mugera gwa Jorodani

¹ Lidiku lialonda ku, Joshua harara na vandu vosi va Isiraeli vavuuka mugambazuri, nivatura hokososa ha Akakia, ni vazia kolomba hokososa ha mugera gwa Jorodani nivakilinda kwambuka mugera.

² Inyima wa madiku gavaga, aviimiliri vavitira hokososa

³ nivavolera avandu, “Lwa muloraa avasaalisi vandu vi ihiiri ya Levi nivagingi lisandugu lie Lilagana lia Yahova Nyasaye winyu, muturi hokososa muvalonde.

⁴ Kigira mukikiri kuduuka ku hano, valamumanyia inzira ya mulonda ku. Navuzwa mutisuundi ahimbi ni Lisandugu lia malago mba, muve ahimbi ikilomita ndala inyima walio kazozo.”

⁵ Joshua yavolera avandu, “Mwitakase aveene, kigira mugamba Yahova alakola vilolekizu hagati hinyu.”

⁶ Maku yavolera avasaalisi, “Mugiingi lisandugu lia malago mutange kwambuka imbiri wa vandu.” Vaavugura Lisandugu lia malago ni vakora ndio.

⁷ Yahova yavolera Joshua, “Aga ngola kalunu galakola avandu vosi va Isiraeli vatange kuhaana luyali ku ivi kuli musaza munene, kandi valamanya ndi Inzi mbeeye harara niivi kuli ndaali harara na Musa.

⁸ Volera avasaalisi vaginga Lisandugu lia malago ndi lwa vaduuka ku lujinga lwa mazi ga Jorodani, vazie kusingira mu mugera.”

⁹ Maku Joshua yavolera avandu va Isiraeli, “Hambi muhuliri amakuva ga Yahova Nyasaye winyu yenya kovora.

¹⁰ Lwa muva nimuzia imbiri kuvatulira, alakunga vandu va Kanaani, vandu va Hiti, vandu va Hivi, vandu va Perezi, vandu va Girigashi, vandu va Amori na vandu va Jebusi. Munyi mulamanya ligali ndi Nyasaye oveeye mwoyo aveeye hagati hinyu,

¹¹ lwi Lisandugu lia malago ga Yahova wi lirova liosi liambuka mugera gwa Jorodani imbiri winyu

¹² mutovole avasaza likomi na vaviri mulala kutura mu vuli ihiiri ya Isiraeli.

¹³ Lwa Avasaalisi vaginga Lisandugu lia malago lia Yahova wi lirova liosi vaseena virenge viavo mu mazi, mugera gwa Jorodani gulasingira kogenda; na amazi gaturaa iluhia galavuunga kitumi lovega lulala.”

¹⁴ Kunangwa lwa avandu vosi vasambula hokososa ukwambuka mugera gwa Jorodani, avasaalisi avagingaa Lisandugu lia malago vimiliri kuzia imbiri wavo.

¹⁵ Kalunu mugera gwa Jorodani gwizuraa ligali zing'inga ziosi zie ligesa. Nonoho lwa vasaalisi vaginga Lisandugu lia malago vaduuka ku mugera gwa Jorodani ni virenge viavo nividiira mu mazi,

¹⁶ amazi gasulungutaa kutura iluhia gasingira kogenda. Gavuunga kitumi lovega lulala, ihale ligali, hi lidaala lia langwa Adamu, iliveeye ahimbi na Zarezani. Amazi gasulungutaa kuzia munyanza yu Munyu gasingira. Kunangwa avandu zana yavo vaambuka ni vazia kolovega lundi, ku lujinga lwa Jeriko.

¹⁷ Avasaalisi vagingaa Lisandugu lia malago gia Yahova vasingira vudinyu ku marova amuumu hagati hu mugera gwa Jorodani avandu va Isiraeli vavitira ho ku marova amuumu, kuduuka lwi ihiiri yoosi yambuka.