Joshua 23 - KITABU KITAKATIFU

Limoloma lia Joshua liu kumaliriza

¹ Inyima wi ing'inga indambi, Yahova yahaana ku vandu va Isiraeli ovososi kutura ku avasigu vaavo avavakumbiriza. Ku ing'inga yeyo, Joshua yaali musakulu ligali,

² kunangwa, yalanga harara avandu vosi va Isiraeli kutura mu zihiiri ziosi zia Isiraeli avakulundu, aviimiliri, avakalagi na vanene vaavo. Ahene yaho yavoola, “Inzi mbeeye musakulu ligali, na ndamenyi mihiga minyingi.

³ Mumali kolola vindu viosi vuli kilala via Yahova Nyasaye wiitu amali kokora ku zihiiri yizi ziosi kigira munyi. Yahova Nyasaye winyu uwamulwaanila.

⁴ Mali kuhaana ku zihiiri zienyu kivala choosi kuva miandu kutura ku mugera gwa Jorodani kolovega lwi Ivugwi kuduuka kunyanza nene ya Meditareniani kolovega lwi Imadioli. Kivala chi zihiiri ziosi icha mumali kuguuta mu vwimiliri vwange, kandi cha kukikiri kuguuta.

⁵ Yahova Nyasaye winyu alakola avasigu vinyu kwirana inyima zimbiru kutura imbiri winyu. Alavakunga lwa muva nimuzizaa imbiri kuvatangilira. Mulavugula kivala chavo, kuli Yahova Nyasaye winyu amali kumusuuviriza.

⁶ Kunangwa muve avagulu kuhulira kandi kokora goosi aga Musa yang'oda mu kitabu chiche chi Lilaga. Mutagirung'ana nokoleka likora lilago kali lilala mba,

⁷ kandi mutahambani na vandu vizihiiri yava avatigara hagati hinyu, anoho kutala amita ga vanyasaye vaavo, anoho kutumikira amita yago mu liesuuha mba, mutasigamiri avanyasaye yavo mba. Mutinama imbiri wavo kuvasaala mba.

⁸ Muvogono yivwo, muve avasuuvirifu ku Yahova, kuli mwaveyange kuduuka lero.

⁹ Yahova umali kukunga zihiiri zinene kandi zie zinguru, kutura imbiri winyu na sihaveeye ho numundu ku vasigu vinyu uwasingira kulwaana munyi mba.

¹⁰ Mulala ku munyi anyala kukunga avandu elefu ndala, kigira Yahova Nyasaye winyu niyie ulwaaniraa munyi, kuli yamusuuviriza.

¹¹ Mwilindi vulahi aveene, muyanze Yahova Nyasaye winyu.

¹² Nimuvula kuva avasuuvirifu nukuhambana ni zihiiri zikitigaye hagati hinyu na muleetane navo,

¹³ muve nilimanya ndi, Yahova Nyasaye winyu sialazizagilira kukunga zihiiri yizi ziituli lwa muvingilira mba. Nitali, valava uvuhiimwa ku munyi kuli mutego, anoho ovogo kandi vuzunu kuli kevogo cho lokova, ku migongo jinyu anoho amafwa mu zimoni zienyu. Vindu viukutihiza yivi vilazizagilira kwekoleka ku munyi kuduuka lwa mudiva kutura mu kivala kilahi yiki cha Yahova Nyasaye winyu yamuha.

¹⁴ “Kalunu mbeeye ahimbi kukuza. Vulii mulala ku munyi amanyi mu mwoyo gwigwe kandi roho gwigwe ndi Yahova Nyasaye winyu umali kuhaana ku munyi vosi vindu vilahi via yamusuuviriza. Vuli lisuuvirizwa lia yalomba limali kuduukizwa; sihaveeyeho ni iliayavula kutwekiza kali kilala mba.

¹⁵ Navuzwa kuli yalinda vuli lisuuvirizwa lia yalomba ku munyi, nandio aladuukiza vuli litihiza.

¹⁶ Niiva simulalinda lilagana lia Yahova Nyasaye winyu yalaga munyi mulindi, kandi niiva mu latumikira nukusigamira avanyasaye vandi, maku alamuha amageri mu vutima vwivwe, alamuha amageri, na alamudiviza ligali. Muturi mu kivala kilahi yiki icha amali kuhaana ku munyi.”