Joshua 17 - KITABU KITAKATIFU

Kivala Chahevwa Inusu yi Ihiiri ya Manase Madioli wu mugera gwa Jorodani

¹ Kedonye chi kivala ekeveeye imadioli wu mugera gwa Jorodani chahaanwa ku valala ku vandu vi ihiiri ya Manase, muyaayi wukutanga wa Josefu. Makiri baba wa Gileadi yaali muyaayi wukutanga wa Manase, kandi yaali mulwaani wi liihi muluviliri ligali. Kunangwa Joshua yaali niyamuha kivala cha Gileadi na Bashani maziambiri, iviali ivugwi wu mugera gwa Jorodani.

² Kivala keveeye imadioli wu mugera gwa Jorodani chahaanwa ku vandu vi ihiiri ya Manase: ku Abiezeri, Heleki, Asirieli, Shekemu, Heferi na Shemida. Yava vosi vaali visukululwi vayaayi va Manase, muyaayi wa Josefu; kandi vaali vimiliri vi zihiiri ziavo.

³ Zelofehadi yaali muyaayi wa Heferi. Heferi yaali muyaayi wa Gileadi. Gileadi yaali muyaayi wa Makiri naye yaali muyaayi wa Manase. Zelofehadi si yaali ku nu muyaayi mba. Navuzwa yaali na vakana vatano, na amita gaavo gaali Mahila, Noa, Hogula, Milika, na Tiriza.

⁴ Vazia ku musaalisi Elieza, kandi ku Joshua, muyaayi wa Nuni nu ku aviimiliri, nivavoora, “Yahova yalaga Musa akohe, harara na viiko vikisaza viitu, kidieli chi kivala keve miandu jietu.” Kunangwa kuli Yahova yaali nalagi vahevwa kivala harara na aviiko vikisaza vaavo.

⁵ Yiki nicho chagira Manase nanyoora vidieli likomi vie kivala komeeda ku vivala via Gileadi na Bashani kolovega lwi Ivugwi wa Jorodani,

⁶ kigira visukululwi veve vikikaana harara nivisukululwi veve vikisaza vahevwa kivala, kivala cha Gileadi chahaanwa ku visukululwi viatigala viosi via Manase.

⁷ Kivala cha Manase chaduuka kutura Asheri kuduuka Mikimezazi, Ivugwi wa Shekemu. Lwako lwavita kuzia Isavaalu komeeda ku vandu vamenya ha En Tapua.

⁸ Kivala chakumberiza Tapua chaali cha Manase, navuzwa lidaala lia Tapua, ku lwako liali lia kisukururwi cha Efuraimu.

⁹ Kunangwa lwako lwasulunguta kuzia kuduuka ku mugera gwa Kana. Madaala manene agaveeye isavaalu wu mugera zana gaali ga Efuraimu, kali niiva gaali mu kivala cha Manase. Lwako lwa Manase lwazizagilira kuzia kolovega lwa Ivaale wu mugera kandi nigohera hi inyanza ya Meditareniani.

¹⁰ Efuraimu yaali kolovega lwisavalu, na Manase naava Ivaale; ni inyanza ya Meditareniani nayo niiva kuli lwako lwa imadioli. Asheri naye yaali ku lovega lwa imadioli wa Ivaale, ihiiri ya Isakari nayo niiva lwako lwa Ivugwi wa Ivaale.

¹¹ Mugati mwi vivala via zihiiri zia Isakari na Asheri, Manase yaali na madaala manene ga Bezishani, Ibuleamu, Dori liali kunyanza, Endori, Tanaki, na Megido harara na madaala gagakumbiriza.

¹² Avandu va Manase, kali ndio, sivali vanyara kukunga ligali avandu vamenya mu madaala manene yago mba, kunangwa vandu va Kanaani vazizagilira komenya mu.

¹³ Kali lwinyima, lwa vandu va Isiraeli vaagwa avizingulu ligali, navuzwa vaniga vandu va Kanaani vavayinziliri. Navuzwa kali ndio sivakuunga vandu va Kanaani vatuli mukivala yicho ligali mba.

Zihiiri zia Efuraimu ni Madioli wa Manase vateva avameede kivala kindi

¹⁴ Visukululwi va Josefu vateva Joshua, “Kigira ki okoheeye vuzwa kidieli kilala chi kivala keve miandu jietu? Kunyi koveeye avanyingi ligali kigira Yahova yakugasiza kunyi.”

¹⁵ Joshua yativura, “Niiva muveeye avanyingi ligali, kuva agiligali ndi kuli ndio na ikivala chivigulu cha Efuraimu kegehi ligali, muzie mwenyoolere milimi jiveeye ja vandu va Perezi na vandu va Refaimu, kandi mutimuli nukwilimira yo aveene kivala.”

¹⁶ Vaativura, “Kivala chivigulu sikeveeye kenene ikinyala kuduuka kunyi mba, navuzwa vandu va Kanaani vamenyi mu kivala chi vilelemo na mavoona, vaveeye na amagare gu vulwani agalombwa kutura ku kivia, vombi avamenyi mu lidaala linene lia Bezi Shani harara na madaala galio agalikumberiza, kandi yavo vosi avamenyi mu livona lia Jezireeli.”

¹⁷ Joshua yavolera zihiiri zia, Efuraimu ni Madioli wa Manase, “Muveeye ligali avandu vanyingi mu zihiiri zienyu, na ku kivuni yicho, muveeye nizinguru ligali. Mulava ligali nividieli kuvita kilala.

¹⁸ Ndamuha kivala chivigulu, kali niiva keveeye mulitu. Mulakitimula nukukivugula keve chienyu kutura kundulu kwolovega lulala kuduuka kolovega Lundi. Mulakuunga vandu va Kanaani vosi, kali nivava nivaveeye ligali na magare givivia kandi nivaveeye avandu vizingulu ligali.”