Matayo 6 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Mi kolama ta ngale mi ko’oro amiki ta ole piri di mundia mise aii konoro: kadre nitini nga amiki Ata buna di dreka amise yokodo.

² Tandu nidise mi ko’o amiki tai kinikini di, mi kovo ngunga mi kandra ko, ngoro dia togo iri dii o tai sinagogona dii, latii ase dii tini, mundia kobaro utukufu aiiru. Ma ta amidre pati, Aii doki aiiki nga dre.

³ Mi ko’o tai kinikini di, mi ko’o ami dreka liji dre di nile ko ado tai ya ami dreka drigulese dre ole di:

⁴ ami tai kinikini di kadrero liaro: amiki Ata tai vo adea liaro di nolepi di kofe nga amidre.

⁵ Dra mi dre ngozo Nzambe kandra di, mi kadre dia togo iri dii tini ko: aii dre lele adrele ngole Nzambe kandra sinagogona dii, latii dre rukusura’a dii mundia konoro aii. Ma ta amidre pati, Aii doki aiiki nga dre.

⁶ Mi kongo Nzambe kandra di, mi koši ami jo adrelepi jona di lena, mi kase ami joti ka, mi kongo ami Ata adrelepi liaro didre, ami Ata tai vo adea liaro di nolepi di dre nga fezo amidre.

⁷ Mi dre ngora’a Nzambe kandra, mi kota ta tako dia‐suru di tini ko: aii dreki tušule dise a koyi aiiki tai, aiiki tai tale bi diise.

⁸ Tai nidise, mi kadre aii tini ko: amiki Ata buna di dre nile dridri dise, ado nga ya mi dre lele dise, mi dre ngora’a adi kandra di.

⁹ Tandu nidise mi kongo Nzambe kandra ngoro nitini: Amaki Ata buna di, A koba ami ru lolo.

¹⁰ Ami mataya kali. A ko’o vudri ngoro mi dre lele di tini, i dre ole buna di tini.

¹¹ Mi kofe amadre nga ñale di kitu nise.

¹² Mi kotiza ami mari ama drekase, ngoro mundia adrelepi amaki mari be ama dre tizale di tini.

¹³ Mi kodri ama lizo vo dia litizo di lena ko, mi kopa ama teri konji anda drekase.

¹⁴ Mì dre diaki takonji tizale dise di, amiki Ata buna di kotiza amikia indi.

¹⁵ Mi dre diaki takonji tizazo ko di, amiki Ata buna di kotiza amiki ta konji ko indi.

¹⁶ Tai azi be, mi koga nga ñale di re di, mi kadre ngoro dia togo iri dii tini mibale tizaro di be ko, aii dreki aiiki mibale ole adrele tani mundia mise ko dise, mundia konoro aii adre nga ñale ga re. Ma ta amidre pati, Aii doki aiiki nga dre.

¹⁷ Mi, mi koga nga ñale di re di, mi koli ami dri dose, mi dre ami mibale jizo.

¹⁸ Mundia konoro mi adre nga ñale di ga re ko, ami Ata adrelepi liaro di konoro: ami Ata tai vo adea liaro di nolepi di kofe nga midre.

¹⁹ Mi kosu nga ru vudri amise ko, vo ambarapa dre nga ñazo di, kindri dre nga mbezo di, vo dia dre nga fuzo kuguzo di:

²⁰ mi kusu nga ru buna amise, vo ambarapa der nga ñazo di a ko, vo kindri dre nga mbezo di a ko, vo dia dre nga fuzo kuguzo di a ko:

²¹ ami nga vo ni a mi dre lele di dre adrele dise ami togo kadre indi.

²² Tala rumva adea mikisia e: tandu nidise ami mikisi kadre alo di ami rumva titi kadre ngadraro gale bi.

²³ Ami mikisia kadre konji di, ami rumva titi kadre tinimvaro gale bi. Tandu nidise ngadra adrelepi ami a di tinimva e di, tinimva a ni we angini ya!

²⁴ Dia alo kicoa adrele adremakandraro bwana iri diise teji ko: adi dre alo di lele ko dise, dre azina lezo di; adi dre trozo alo diru, dre azina voazo voavoa. Mi kicoa adrele adremakandra Nzambe adearo, adremakandra nga adearo indi ko.

²⁵ Tandu nidise ma ta amidre, Amiki togo ko’o ta kuku amiki lidrise ko, ado nga ya mi koña, ado nga ya mi komvu; amiki togo ko’o ta kuku amiki rumvase ko indi ado bongo ya mi kaso. Amba lidri nga ñale di ruse ko ya? Amba rumva bongo di ruse ko ya?

²⁶ Mi ko no aria bu adea, aii riki ngakisia ko, aii loaki laña ko, aii lutu nga kerona ko; amiki Ata buna di dre nga fezo aiidre ñale. Amba amiki lagi we aiikia di ruse ko ya?

²⁷ Dia angodi ya amiki ketona kicoa mbale ami drise kuru ta togo ozo kuku dise ya?

²⁸ Mi o ta kuku bongo asole dise adose ya? Mi kotusu ta fefo amvona di dre mbazo di ami lena; aii oki azi ko, aii jaki gotona faru ko:

²⁹ ma ta amidre teji Solomo, akodia utukufu titi be, adre asole bongose di ngoro aii di tini ko.

³⁰ Nzambe dre mbi amvona adrelepi andru tudru a ba furuna di asozo ngase nitini di, amba tai nidi i dre bongo fele amidre asole di ruse ko ya, A ami ta ka’ile ca di be?

³¹ Amiki togo ko’o ta kuku ko, tara’a ki di, Ma koña ado nga ya? Ma komvu ado nga ya? Ma kaso ado bongo ya?

³² Dia‐šuru dreki tai niiki ndale o̱ei dise; amiki Ata buna di, dre nile mi dre adrele nga niiki lele dise.

³³ Mi konda adini mataya e, adini ta ole piri di be, i dre ngae niiki fezo o̱ei amidre.

³⁴ Tandu nidise amiki togo ko’o ta kuku tai tudru diise ko: tai tudru diise ko’o tai kuku ai tandise. Takonji kitu alo dise kicoa kitu nadise.