Matayo 5 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Dre dia lezolepi diiki nora’a adi dre mbazo kira drina: dra adi dre lirizo vudri di, dia akodi tayilepi dii aliki i vuna:

² adi dre ai ti njizo dre ta tadazo aiidre, dre tazo, ki di,

³ Ari adre dia lemerero teri na diiki o ni: mataya bu adea dre adrele aiikia dise.

⁴ Ari adre dia tiza balepi diiki o ni: i dre aiiki tindrile dise.

⁵ Ari adre dia amaliro diiki o ni: aii dre vo dole dise.

⁶ Ari adre dia adrelepi tebiri be dii o ni, dre lovo tai piri adea ozo: aii dre pile dise.

⁷ Ari adre dia ta kini olepi diiki o ni: aii dre ta kini dole dise.

⁸ Ari adre dia adrelepi togo taratara be diiki o ni: aii dre Nzambeni nole dise.

⁹ Ari adre dia larurulepi diiki o ni: i dre aiiki zile Nzambeni mva dise.

¹⁰ Ari adre dia o ni a fo aiiki mi dre ta piri ole dise: mataya bu adea dre adrele aiikia dise.

¹¹ Ari adre amiki o ni mundia kolawa amidre di, dre amiki mi fozo di, dre takonji toa o̱ei diiki tazo amiru kinzose, mase.

¹² Mi kolenze, ari kadre amiki o ambani: amiki nga buna di dre adrele murungu dise: ngoro nitini aii dre nabi adrelepi ami dridri diiki mi fole dise.

¹³ Mi adre te’i vo adea: te’ini kini koti asa dre di, a koba ado nga ya di lana kogoro adrele te’iro? Ñanomvano velero a di be te’i nidi adre tani ngase tejia ko, mundia be vudri dre tozo pase.

¹⁴ Mi ngadra vo adea. A kicoa ba murungu adrelepi rovo dri di zu ko.

¹⁵ Mundia turu tala bale kanji nduna ko, ba aiiki tala fadri, dre kozo mundia o̱ei adrelepi jona diise.

¹⁶ Ngoro nitini mi ko’o amiki ngadra kole dia mise, aii konoro amiki tai tani ole dii, dre utukufu fezo amiki Ata buna di dre.

¹⁷ Mi kotusu tai ko, ma ali torati e, ta nabikia dii be tiza: ma ali tai nii tiza ko, ma ali tai nii o akele.

¹⁸ Ma dre tale amidre pati dise, Ta camva tisile di kolavu torati ase tejia ko, a o tai o̱ei akele ka, vo e bu be, lavu ndo.

¹⁹ Tai nidise, dia angodiya togi alo camva di galepi re di, dre mundia tadazo ole nitini, a kozi akodi cadi mataya bu adea na: dia angodi ya togi olepi di, togi tadalepi di be, a kozi akodi murungu mataya bu adea a.

²⁰ Ma dre tale amidre dise, amiki ta ole piri di lavu ta ole piri di dia ta‐tisilepi dii adea, Farusii be ko di, mi kosi teji mataya bu adea lena ko.

²¹ Mi yidre a ta dia kiono dii e dre, ki di, Mi kofu dia drale ko; dia angodi ya dia fulepi drale di, kako ta tale dia tavo talepi di dre:

²² ma dre tazo amidre, dia angodi ya adrelepi kumba o ai adrupiru di ako ta dia tavo talepi di dre: dia angodi ya “Raca” talepi ai adrupidre di, ako ta dia rukebelepi vura ta diidre; dia angodi ya Mi azaza, talepi di, a kicoa be akodi Geyena na.

²³ Kadre nitini di mi adre ami nga fele di fe drakira kandra, tai dre agazo ami lena nale ami adrupi adre tai be i lena miru,

²⁴ mi kota’i ami nga fele drakira kandra di nale, mi dre ami lati dozo, dridri mi go adrele adrupiro ami adrupi be, velero mi kali ami nga fele di fe.

²⁵ Mi koka’i ami kariba ni tai dre mbelembele, mi dre lira’a lati ase akodi be di; ngale ami kariba kofe mi dia tavo talepi di dre, dia tavo talepi di kofe mi poroto dreka, i dre mi bazo bagojona.

²⁶ Ma ta amidre pati Mi kafo nalese tejia ko, mi fe senge o̱ei ka.

²⁷ Mi yidre a tadre, ki di, Mi kokamvo dia ko.

²⁸ Ma ta amidre, Dia angodi ya toko nolepi lovo konjise di, are kamvo tai ole akodi be ai togona dre.

²⁹ Ami mikisia drigulese dre mi ozo dele di, mi kongi, mi kobe mi vulese; amba ta tani midre mikisia alo di ami ruba adea tiza, ta i dre ami ruba bezo titi Geyenana di ruse.

³⁰ Ami dreka drigulese dre mi ozo dele di, mi koga, dre bezo mi vulese; amba ta tani midre dreka alo di ami ruba adea tiza, ta i dre ami ruba bezo titi Geyenana di ruse.

³¹ A tadre indi, Dia angodi ya ai toko ta’ilepi di, kofe waraga toko ta’izo di adidre:

³² ma ta amidre dia alo ai toko ta’ilepi ta dia mo ako di kamvole dise alokodia, o akodi gole adrele dia momo kamvoni: dia angodi ya akodi molepi di, a kota’i akodi di, o ta dia momo kamvozo di.

³³ Mi yidre a ta dia kiono dii dre, ki di, Mi kakiña mi kinzose ko, mi ko’o tai midre ami akiñazo di Nzambedre:

³⁴ ma dre tazo amidre, Mi kakiña mi tejia ko: mi kakiña mi buse ko, bu dre adrele kiti‐mokonzi Nzambe adea dise.

³⁵ Mi kakiña mi vose ko indi, vo dre adrele akodi pandu dise; mi kakiña mi Yerusalemise ko, adi dre adrele ba murungu Mokonzi murungu adea dise.

³⁶ Mi kakiña mi ami drise ko indi, mi dre kicoale dribi alo di ole adrele kemve ko dise, kini ko dise.

³⁷ Mi ko’o ami kuli adre, Ai’i, Ai’i; Koko, koko; tai azina angodi ya lavu tai nii afo teri konji di ase.

³⁸ Mi yidre, a tadre, ki di, Mi si ama mi dre, ma kosiro ami mi ma ti, mi si ama si dre, ma kosiro ami si ma ti:

³⁹ ma ta amidre, ki di, Mi kofuro dia konji di be ko: dia angodi ya ami kobojo drigulese di salepi di, mi kala kobojo azi di akodiadre.

⁴⁰ Dia alo di le lile mi be vura taise, dre ami koti dozo, mi koka’i akodi kodoro ami bongo azi di be.

⁴¹ Dia angodi ya o mi lumbase mi koliro lati ase yi alo di ase, mi koli lati ase yi iri dii ase akodi be.

⁴² Mi kofe nga dia ami ti zilepi didre, mundia lelepi nga dole mi drekase marise di, mi dre ami amvo alazo akodi vulese ko.

⁴³ Mi yidre, a tadre, ki di, Mi kole ami bapi, mi kole ami kariba ko.

⁴⁴ Ma dre tazo amidre, ki di, Mi kole amiki kariba, mi kongo Nzambe kandra mundia amiki mi folepi diise;

⁴⁵ Mi kadrero mva amiki Ata buna di adea; akodi dre ai kitu ole afole dia konji diidre, dia tani diidre be dise, dre kozia muzo dia ta olepi piri dii, dia ta olepi piri ko dii be dre.

⁴⁶ Mi dre mundia amiki lelepi dii lele dise di, amiki nga angua ya? Atelonii o tai nidi teji ko ya?

⁴⁷ Mi dre amiki adrupii kamuzo drekase alokodia, amiki tai lavu dia arukabakia ta angini ya? Suru o tai nidi tejia ko ya?

⁴⁸ Tandu nidise, mi kogo avele aveave di tini ngoro amiki Ata buna di dre avele di tini.