Matayo 4 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Velero Teri dri Yesu aṅbodrina dre, teri konji murungu di kolitiro adi.

² Adi koga nga ñase re di, kitu ñadiri, ngaci ñadiri be di, velero tebiri adre adini o.

³ Teri dia litilepi di dre alizo, dre tazo adidre, ki di, Mi adre Nzambeni Mva di, mi kofe tai kira nii dii dre kogoro adrele ambataro.

⁴ Adi dre ta akozo tale, ki di, A tisidre, ki di, Mundia kadre lidriru ambatase alokodia ko, aii kadre lidriru tai o̱ei afolepi Nzambe tise diise.

⁵ Velero teri konji murungu di do adi ba murungu lolo di na; i dre adini bazo jodri yekalu dri,

⁶ dre tazo adidre, ki di, Mi adre Nzambeni Mva di, mi kode vudri, i dre tisile dise, ki di, Adi kofe ami tandu ai malaikadre: Aii dreki ami dozo aii dreka, Mi kocoaro ami pa kiraru ko.

⁷ Yesu dre tazo adidre, ki di, A tisidre todia, ki di, Mi koliti Yehova ami Nzambe ko.

⁸ Velero teri konji murungu di dri adi kira murungugu drina, dre mataya o̱ei vo adea tadazo adidre aiiki utukufu be;

⁹ Adi dre tazo adidre, ki di, Nga nii dii o̱ei ma kofe midre, mi de vudri di, ama ledezo.

¹⁰ Yesu dre tazo adidre, ki di, Mi koli ningase, Setani, i dre tisile dise, ki di, Mi kolede Yehova ami Nzambe, mi dre adini tai ozo alokodia.

¹¹ Dra teri konji murungu di ta’i adi; mi no ka, malaika alida dre tai ozo adise.

¹² Dra adi dre yizo a do Yoane fele dre, i li nolese Galilayana;

¹³ I dre Nazareta ta’ira’a, adi dre alizo mole Kapanaumana adrelepi yitapara laga di a, Zebulunani kofula, Nafatali be:

¹⁴ Yesaya nabiro dia tai a ko’oro akele i dre tara’a, ki di,

¹⁵ La’u Zebuluna adea, la’u Nafatali adea be, lati yi murungu adea na, Yoradene ta’ana, Galilaya dia‐šuru adea,

¹⁶ Mundia adrelepi tinimvana dii No ngadra murungu di dre, Aii, dia lirilepi vo e, lindri dra adea be dii dre, Ngadra afodre aiidre.

¹⁷ Vese nadise Yesu ba tandu mando ngizo di, dre tazo, ki di, Mi kala amiki togo, mataya bu adea dre adrele añi dise.

¹⁸ Dre tecira’a yitapara Galilaya adea lagase, i no adrupii iri dii, Simona a zi Petero, Anderea adrupia be, kimba bera’a yi murunguna; aii dreki adrele kosia belepi diiro dise.

¹⁹ Adi dre tazo aiidre, ki di, Mi kali ma vuse, ma kalaro ami dia belepi diiro.

²⁰ Drañano aii dreki kimbaki ta’izo, dreki lizo adi vuse.

²¹ Dre lira’a dalese i no adrupii iri azina dii, Yakobo Zebedayani mva Yoane adrupia be, kaluṅbana Zebedaya atana be, aiiki kimbaki bera’a; i dre aiiki zizo.

²² Drañano aii dreki kaluṅba ta’izo, atana be, dre lizo adi vuse.

²³ Yesu dre lizo Galilaya ase o̱ei kurukuru, ta tadara’a aiiki sinagogona mando mataya adea ngira’a dre dia tedrizo, dra konji toa dii ase o̱ei, dra toa dii ase o̱ei dia keto a.

²⁴ Adini rubi dre la’uzo Suria ase o̱ei: aii dreki dia drafulepi o̱ei dii e, dia dra konji toa dii dre rule dii e, dia dra dre ole asuale toa dii be, dia teri konji dre rule dii, dia agilili dre ole dii, dia dra dre ole abili dii dozo i vuna; adi dre aiiki tedrizo.

²⁵ Dia lezolepi bi dii dre alizo adi vuse, Galilaya lese dii e, Dekapoli lese dii e, Yerusalemilese dii e, Yuda lese dii e, Yoradene ta’ana lese dii be.