Matayo 3 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Kitu na’etu Yoane diaki Batisilepi di dre alizo mando ngi aṅbodrina Yudana, dre tazo, ki di,

² Mi kala amiki togo; mataya bu adea dre adrele añi dise.

³ Dia nidi akodi e, Yesaya, nabi e, tandu tara’a, ki di, Dia alo di ni kuli ngalepi aṅbodrina di, ki di, Mi kolede Mirini lati lizo di, Mi ko’o adini lati geagea.

⁴ Yoane ni tandi dre kamelibi asozo, dre kini ’izo i kipi, adini nga ñale di tombi e, apesu be.

⁵ Dia dreki afozo Yerusalemilese, dia Yuda adea ase o̱ei, dia la’u o̱ei Yoradene ase kuru dii e be adi vuna.

⁶ Adi dre aiiki abatisizo yi andre Yoradenena, aii dre aiiki takonji a’ura’a.

⁷ Adi kono dia bi dii Farusii e, Sadoke niiki ketona di dreki alira’a ai ta abatisimo adease, adi dre tazo aiidre, ki di, Mi anjia ni adea, adi ta midre ni ya mi kolapa lawa acalepi velero di ase di?

⁸ Tai nidise, mi ko’a lo’wa kicoale tai diaki togo alazo di se:

⁹ Mi kotusu ami lena nitini ko, ki di, Iburaimu amaki ata e: ma dre tale amidre dise, Nzambe kicoa anjimva tinga Iburaimudre kira nii ase.

¹⁰ Ñanomvano i dre kubalu dozo fa tiva gazo, tai nidise a ga fe o̱ei alepi tani ko dii dele, dre dezo aci a.

¹¹ Ma batisi mi yise togo alazo dise pati: akodi alilepi ma vuse di amba akodi iriñi mana di ruse, ma su akodi kamuka do ko: akodi abatisi ami Teri Lolose, acise be:

¹² akodi ndakpa be i dreka, adi dre ai aṅborodri ledezo tawase; adi kolomvo ai ña kerona, dre kuyi zazo aci i dre kicoale adrale ko dise.

¹³ Velero Yesu ali Galilayalese Yoradenena Yoane vuna, akodi kobatisiro adi.

¹⁴ Yoane le adi logale, dre tazo, ki di, su mi dre ama batisizo, mi dre alizo ma vuna ya?

¹⁵ Yesu dre ta akozo tale, dre tazo adidre, ki di, Ñanomvano mi koka’i ta nididre: kadre nitini di su ama ko’o ta piri dii akele o̱ei. Velero akodi ka’i adidre.

¹⁶ Drañano Yesu, a kobatisi adi dre di, afo yi ase dre, mi no ka, bu njida adidre, adi dre Teri Nzambe adea nozo asira’a, kobola tini, alira’a i vuna;

¹⁷ mi no ka, kuli dre tazo bualese, ki di, Akodi ama mva tašila di e, Ma adre lenzele asa we.