Matayo 28 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Kitu Sabiti adea o ta akezo di, nga ba ndu wale poso a’ulepi dridri di acadre añi, Maria Magadala e, Maria azina di be aliki mogo no.

² Mi no ka, kidikidi murungu di kaiya vo dre; malaika Miri adea dre asile bualese dise, dre alizo, dre kira lilizo bu tise, dre lirizo drina.

³ Akodi mibale ngoro bulagulagu tini, akodi bongo kemve ngoro taluji tini:

⁴ dia ta lamalepi dii dreki liazo akodini roro a, dreki gozo adrele ngoro dia dralepi dii tini.

⁵ Malaika dre ta akozo, dre tazo tokodre, Mi koro nga ko: ma dre nile dise, mi are Yesu, i dre kipale di ni nda.

⁶ Akodi nole yokodo; akodi dre ngale dise, ngoro i ta tale di tini. Mi kali, vura Miri dre aiyizo di no.

⁷ Mi koli mbele, dre dia ai tayilepi dii tazo, ki di, Adi ngadre dra ase; mi no ka; adi dre lizo ami dridri Galilayana; mi kono adi nale: mi no ka, ma ta amidre dre.

⁸ Aii dreki njizo mbele mogolese, tiri e ari murungu di be; dreki razo tai fe dia adini tayilepi dii dre.

⁹ Mi no ka, Yesu dre rukusuzo aii be, dre tazo, ki di, Ari o̱ei be. Aii dreki alizo, dreki akodi pa ruzo, dreki akodi ledezo.

¹⁰ Dra Yesu ta aiidre, Mi koro nga ko: mi koli dre ama adrupii ngozo aii konjiro Galilayana: aii dreki ama nozo nale.

¹¹ Aii dreki lira’a arukaba dia lamalepi diikia ketona ali ba murungu di na dreki koani dridri dii tai acalepi dii tazo o̱ei.

¹² Aii kokeberu maliga e be dre di, dre ta tazo, aii fe parata we tukutukudre,

¹³ dre tazo, ki di, Mi no ka, Dia akodi tayilepi dii alidre ngacise dreki akodi kuguzo, ama dre aiyira’a.

¹⁴ Tai nidi ca miri togi talepi dini bibale na di, ama ko’o akodi togo tai ni ka’i, amiki togo ko’oro ta kuku ko.

¹⁵ Kadre nitini aii doki parata, dreki tai ozo ngoro i dre tadale aiidre ditini: i dre ta nidi tazo la’ule Yudakia ketona, tai nidi be ñanomvano.

¹⁶ Dia tayilepi mudri‐dri‐alo dii dreki lizo Galilayana, kira anda Yesu dre tale aiidre di dri.

¹⁷ Aii kono adi dre di, aii tandi adi kandra dre: arukaba dre ka’izo ko.

¹⁸ Yesu dre alizo aii vuna, dre tazo, ki di, A fe mi lanjilanji madre ngae bu a dii se, vudri diise o̱ei dre.

¹⁹ Tai nidise mi koli, dreki dia‐suru oei ozo dia tayilepi diiro, aiiki batisi ru Ata adease, ru Mva adease, ru Teri Lolo adease:

²⁰ dre tadazo oei aiidre, ta ma dre togi tale amidre dii, aii ko’o: mi no ka, ma adre ami be kolia, vese nga akezo di dre acazo.