Matayo 25 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Dra mataya bu adea kadre kianji mudri tala dolepi dii tini, aii dre afozo ago toko molepi di kusu.

² Kianji nji azaza, kianji nji dre adrezo togi be.

³ Kianji azalepi azaza dii aii doki aiiki tala di, tala‐do dozo aii dreka ko:

⁴ kianji togi be dii dre tala‐do dozo aiiki malangina tala be.

⁵ Ago toko molepi dii dre alira’a vovoravo, aii oei adre aiyiko.

⁶ Ngaci ketogona tai ngole di be, ki di, Mi no ka, ago toko molepi di are alile! Mi kafo akodi kusu.

⁷ Dra kianji nii ngadre oei, dreki aiiki tala ledezo.

⁸ Kianji azaza dii dreki tazo kianji togi be diidre, ki di, Mi kafe amiki tala‐do aruka amadre; amaki tala o tai adrazo.

⁹ Kianji togi be dii ako ta dre, ki di, Ngale tala‐do kicoa amadre mi be di ko: amba tai nidi ami koli dia tala‐do gilepi dii vuna, kogiro amidre.

¹⁰ Aii dre lira’a do gi, ago toko molepi dii acadre: dia ledelepi dii dreki sizo adi be ta nga ñazo dia toko molepi di jona dise: i dre lati tabozo.

¹¹ Velero kianji azi dii alidre, dre tazo, ki di, Miri, Miri, mi konji lati amadre.

¹² Adi dre ta akozo, ki di, Ma ta amidre pati, ma ni ami ko.

¹³ Tandu nidise, mi kolama ta wa, mi dreki kitu nile ko dise, dreki saa nile ko dise.

¹⁴ Tai dre adrele ago lilepi la’u azi na di tini dise, i kozi ai adremakandrae di, dre ai ngae fezo aiidre.

¹⁵ I dre talenta nji dii fezo dia alo didre, dia azinadre talenta iri dii fezo, dia azinadre talenta alo di fezo; tai fezo dia oei diidre aii dre ole di tini; adi dre ai lati dozo lizo.

¹⁶ Drañano akodi talenta nji dii dolepi di lidre dre ta ozo talentase, dre talenta azi di ozo nji.

¹⁷ Dia talenta iri dii dolepi di o tai nitini, dre talenta ozo iri.

¹⁸ Akodi talenta alo di dolepi di, dre njizo dre kini dizo buro, dre ai mirini parata zuzo.

¹⁹ Vese we velero dise, miri adremakandra adea dre cazo, dre talenta aii dreka dii lazo.

²⁰ Akodi talenta nji dii dolepi didre alizo, dre talenta nji azina adozo, dre tazo, Miri mi fe talenta nji dii dre madre: mi no ka, ma dre talenta azi nji dii ozo.

²¹ Akodi miri ta adidre, Mi odre tani, adremakandra tani togo trotro di be di: mi adre togo trotro di be nga ca dii se, ma koba ami mi lanjilanji ngae bi diise: ari ko’o ami ni ami miri be iriti.

²² Akodi talenta iri dii dolepi di dre alizo, dre tazo, Miri, mi fe talenta iri dii dre madre: mi no ka dre talenta azi dii ozo iri.

²³ Akodi miri ta adidre, Mi odre tani, adremakandra tani, togo trotro di be di; mi odre tai ca dii togo trotro dise, ma koba ami mi lanjilanji tai bi diise; ari ko’o ami ni ami miri be iriti.

²⁴ Akodi talenta alo di dolepi di dre alizo indi, dre tazo, Miri, ma ni mi, mi adre ago togo mbamba di be, laña lora’a mi dre rile ko di, nga lomvora a vo mi dre lajazo ko di:

²⁵ ma dre rozo roro, dre njizo, dre ami talenta zuzo kinina: mi no ka, nga mina be mi dreka.

²⁶ Akodi miri dre ta akozo, dre tazo adidre, ki di, Mi adremakandra konji tovoro di, mi ni ma lo laña vo ma dre rile ko di, dre nga lomvozo vo ma dre lajazo ko di;

²⁷ Tai nidise, mi kicoa ama parata fe dia parata likilepi diidre, ama alialise ma kodoro ngae mana, faranka azi di be.

²⁸ Tai nidise mi kodo talenta akodi drekase, dre fezo akodi adrelepi talenta mudri be didre.

²⁹ I dre ngae fele dia adrelepi nga be didre dise, adi adre ngae be ambani: akodi adrelepi ngae be ko di a kodo akodi nga drekase.

³⁰ Mi dre adremakandra tako di bezo tinimva amvele di na: tai ngozo a’ose di kadre nale, tai dia si cizo di be.

³¹ Adamuni Mva kali ai utukufuna di, malaika o̱ei dii dre alizo akodi be, dra adi koliri kiti‐mokonzi utukufuro di dri:

³² I dre dia‐suru oei atonazo adi kandra: dre aiiki kuzo, ngoro kabiliki‐likilepi di ku ai kabiliki ndri ase di tini.

³³ Adi koba ai kabiliki drigulese, ba ndri lijilese.

³⁴ Dra mokonzi kota dia ai drigulese diidre, ki di, Dia ama Ata dre beneditu bazo aii ru dii, mi kali, mi kodo mataya i dre ledele kiono i dre vo bara’a di amise.

³⁵ Tebiri dre ma ole dise, mi dreki nga fezo madre ñale: yi lovo o madre, mi dre yi fezo mvule madre: ma adre ditoaro, mi dre ama drizo:

³⁶ ma adre riru, mi dre bongo asozo ama ru: ma adre dra be, mi dre ama limvuzo: ma liri bagojona, mi dre alizo ma vuna.

³⁷ Dra dia ta olepi piri dii kako ta tale adidre, ki di, Miri ama no mi adre tebirise, ma nga ñale di fe midre angutu ya? ama no yi lovo adre ami o, ma dre yi fezo midre mvule angutu ya?

³⁸ Ama no mi ditoaro, ma dre mi drizo angutu ya? Ama no mi riru ma dre bongo asozo ami ru angutu ya?

³⁹ Ama dre ami nozo dra be, ma dre ami nozo bagojona, ma dre alizo mi vuna angutu ya?

⁴⁰ Mokonzi kako ta tale, dre tazo aiidre, ki di, Ma ta amidre pati, mi dre tai nidi ole alo ama adrupiiki ketona dise, mi dre tai nidi ole madre.

⁴¹ Dra adi kota aii adrelepi lijilese diidre indi, ki di, Mi koli ma vulese, mi dia litrile dii, aci adrelepi kona vuse kolia di na, i dre ledele teri konji murungu di e, ai malaika dre dise:

⁴² tebiri dre ma ole dise, mi dre nga fezo madre ñale ko: yi lovo dre ma ole dise, mi dre yi fezo madre mvule ko:

⁴³ ma adre ditoaro, mi dre ma drizo ko; ma adre riru, mi dre bongo asozo ama ru ko; ma adre dra be, bagojona di, mi dre alizo ma vuna ko.

⁴⁴ Dra aii kako ta tale indi dre tazo, Miri, ama no tebiri adre ami o, yi lovo adre ami o, ma no mi ditoaro, riru, dra be, bagojona, dre tai ozo midre ko angutu ya?

⁴⁵ Dra adi kako tale aiidre, ki di, Ma ta amidre pati, mi dre ta ozo alo dia cadi nii diiki ketona ko dise, mi odre madre ko.

⁴⁶ Dia nii konjiki tiza adrelepi dia o kona vuse kolia di na: dia ta olepi piri dii koliki lidri adrezo kona vuse kolia di na.