Matayo 24 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Yesu dre afozo yekalu ase; dre lati dora’a, lizo, dia ai tayilepi dii dre alizo adi vuna nga‐sile yekalu a di tada adidre.

² Adi dre ta akozo aii ti, dre tazo aiidre, Mi no nga nii o̱ei ko ya? Ma ta amidre pati, A kota’i kira alo di kira azina dri ko, i dre bele vudri dise.

³ Adi dre lirira’a kira Bilatadri, dia tayilepi dii aliki adi vuna liaro, dre tazo, Mi kota amadre tai nii dii kaca angutu ya? ta tadale mi dre alira’a di, vese nga dre akezo di ado e ya?

⁴ Yesu dre ta akozo dre tazo aiidre, Mi kosu ami ru dia alo di ko’o ami avile latia ko.

⁵ Dia bi dreki alile ama ruse dise, ta tara’a, ki di, Ma Kristu e; aii ko’o dia bi dii avile latia.

⁶ Mi koyi ta dia dreki adrezo rubu dii, ta rubi rubuzo di; mi kolama ta: amiki togo ko’o ta kuku ko: su tai nii dii dre acale dise; nga akezo di acadre ko.

⁷ Amvutu dia‐suru azidi dreki ngale rubu dia‐suru azidi be dise, mataya azidi dre ngazo rubu mataya azina be; karabo e, kidikidi kokaiya vo la’u nii ase.

⁸ Ta lizazo di andu ba acale ta niiru.

⁹ Dra aii kofe ami ta lizazo dise, dreki ami fuzo drale: dia‐suru o̱ei koze ami zeze ama ruse.

¹⁰ Dra dia bi ko’o dele, dreki aiiki fezo, dre aiiki lezo ko.

¹¹ Nabi kinzoro bi dii dreki ngazo, dreki dia bi ozo avile latia.

¹² Takonji dre lezole dise, male dia bi adea kogo adrele yokodo.

¹³ Dia togo trotro di ta nii dre akezo di, a kotedri akodi.

¹⁴ A kongi tandu tani nidi adea la’uni ase o̱ei ta‐tadazo di dia‐suru dre o̱ei, dra ta akezo di kali.

¹⁵ Kadre nitini mi kono di takonji olepi to di ta nga dre rutizazo di adea, tai nidi Danyele, nabi e, tandu dre tale di, adrera’a vo lolo di a (dia ta nalepi di koni geagea wa).

¹⁶ Dra dia adrelepi Yudana dii e kolapaki kiranae vuna:

¹⁷ Dia adrelepi jodrina di kasi vudri ko ngae do ai joase ko;

¹⁸ Dia adrelepi amvuna di kago ai bongo kacua di do ko.

¹⁹ Tiza ko’o toko adrelepi a be dii, toko ba felepi ndrole dii dre kitu na’ese!

²⁰ Mi kongo Nzambedre amiki tai lapazo di cale yiguna ko, kitu sabiti adease ko:

²¹ kitu na’ese tiza adre buako, atu kiono kayu vo bazo di dia no tiza nitini ko, go acale todia ko.

²² A koki kitu nii tali ko di, a pa dia ko: a ki kitu nii tali dia i drile diise.

²³ Dra dia alo di kota amidre di, ki di, Mi no ka, Kristu be konua, Mi no ka, Kristu be konua; mi koka’i ko.

²⁴ Kristu kinzoro dii, nabi kinzoro dii dreki afole dise, aii kotada ta‐tadale murungu dii, ta diaki lindri dre gazo gaga dii be, Kadre nitini dia kicoa tai nidi o di, aii kicoa dia Nzambe dre drile dii o avile latia.

²⁵ Mi no ka, ma ta amidre dridri.

²⁶ Kadre nitini aii ta amidre di, ki di, Mi no ka, adi adre aṅbodrina; mi kofo ko; ki di, mi no ka, adi adre jona di, mi koka’i ko.

²⁷ Ngoro bu dre lagulepi kurulese di tini, i dre nozo tabule dise; Adamuni Mvani alira ditini.

²⁸ Vo avo dre adrezo di, giri atonaro nale.

²⁹ Drañano tiza murungu nadi ni vudri a di kitu kadre tinimvaro, mba kadre tinimvaro, bibiñae kadre adele buase, nga kokoroko buna dii kadreki bukose;

³⁰ Dra ta‐tadazo di Adamuni Mva kaga buna: dra dia‐suru o̱ei dii dreki lulu gazo, aii dreki Adamuni Mva alilepi nduruku bu adea a nozo iriñi be di utukufu be we.

³¹ Adi dre ai malaika muzo lile, ngunga i dre vozo iriñise di be, aii dreki dia i dre drile diiki kebezo lia su dii ase, voase di mvu ambani, buase di mvu ambani.

³² Mi koni tandu malobi adea alale ñano di: akodia fekola kogo adrele aruro di, biña dre afozo, mi ni kona o ta a’uzo;

³³ Ami koangia di tini, mi kono ta nii dii o̱ei, mi koni adi adre añi, aizako, adre jotile.

³⁴ Ma ta amidre pati, Biro nidi kolavu ko, ta nii kake ka.

³⁵ Bu kolavu, vo be, ta mana dii kolavu ko kani’a.

³⁶ Kitu andase, saa andase, dia alo di ni ko, malaika buna dii niki tejia ko, Mva ni ko, alo Ata ni ni.

³⁷ Ngoro kitu Noa adea tini adre alile Adamuni Mva tini.

³⁸ Kitu na’ese yi dre tizo dridri di tini aii dre nga ñazo, dre nga mvuzo, aii dre dia mole, dre dia fezo mole, kitu Noa dre sizo masua na dridri di tini;

³⁹ aii dre nizo ko, tai yi dre tizo di aca ka, dre aiiki dozo o̱ei; ngoro nitini Adamuni Mvani alira.

⁴⁰ Dra ago iri kadre amvuna; a do alo di, a ta’i alo di.

⁴¹ Toko iri dii kadre nga i kira dri di; a do alo di, a ta’i alo di.

⁴² Mi kosu ami ru tandu nidise: mi dre nile ko dise, kitu angodi se ya ami Miri adre alile.

⁴³ Mi koni wa, joliyi dre ta lamazo kugu dre alira’a di, ni di, adi lama ta dre kugu lezo sile ai jona ko.

⁴⁴ Tandu nidise mi kolede mi indi: saa mi dre tusule ko di, Adamuni Mva are alile.

⁴⁵ Tandu nidise, adi adremakandra anda togo trotro di, togi be di e ya, akodia mi ai Miri ba lanjile lalanji adremakandrae azi dii ruse, aiiki nga fele aiidre ñale lokia dre acale di se?

⁴⁶ Ari adre adremakandra anda o ni miri kali di, dre kusuzo tai ora’a nitini.

⁴⁷ Ma ta amidre pati adi koba akodia mi lanjile lalanji nga oei ai dreka dise.

⁴⁸ Adremakandra anda konji di, kisu ai togona dí, ki di, Ama Miri o tai alizo vovoravo;

⁴⁹ dre ai adremakandrae arupiro dii andu bazo adrele coale, dre nga ñazo, dre nga mvuzo mundia wa dre cile dii be dise;

⁵⁰ miri adremakandra nadi adea kali kitu akodi dre ai mi bazo adi vo ko di, adi dre saa na di nizo ko,

⁵¹ dre akodi gazo, dre akodia nga fezo akodidre dia togo iri dii e be: tai ngole a’ose di kadre nale tai diaki si cizo dii be.