Matayo 23 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Dra Yesu ta dia lezolepi diidre, dia ai tayilepi dii be,

² ki di, Dia ta‐tisilepi dii, Farusii be, liriki Mose ni vo lirizo di a:

³ tandu nidise tai o̱ei aii dreki tale amìdre dii ta nii mì ko’o, mì dre atogiazo: mì ko’o ngoro aiiki ta ole dii tini ko; aii dreki ta tale dise, dreki ta ozo ko.

⁴ Aii, aii lambe nga lanjilanji dii, aii dre bazo diaki tu’udri a asuasua, aii tandi dre nga kisizo aii drekanjise ko.

⁵ Aii dre aiiki ta ole dii ozo o̱ei mundia konoro: aii dreki aiiki popoko ozo Nzambeni taise wawa dise, dreki aiiki bongoti ozo murungu amba dridri di ruse,

⁶ Dreki vo dridri di lezo mokañase, vo lirizo dridri dii sinagogona be.

⁷ Aii dreki lezo mundia libongona kota aiidre “Mi be ya?” dreki lezo dia kozi aii “Rabbi.”

⁸ A kozi ami “Rabbi” ko, dia alo di dre adrele amiki ta‐tadalepi di e dise, ami o̱ei dre adrezo adrupiro.

⁹ Mi kozi ago alo di amiki ataro vudri tejia ko: dia alo di dre adrele amiki Ataro buna dise.

¹⁰ A kozi ami bwana ko: dia alo di amiki bwana e, akodi Kristu e.

¹¹ Dia adrelepi amba dia azina di ruse amiki ketona di kadre amiki adremakandraro.

¹² Dia angodi ya ai tandi tingalepi kuru di, a koba akodi diaki pagalero; dia angodi ya ai tandi balepi diaki pagalero di, a kotinga akodi.

¹³ Tiza ko’o ami wa, dia ta‐tisilepi dii nii, Farusii be, dia togo iri dii! mì dre lati mataya bu adea tabole mundia ruse dise: mì dre sile ami tandise ko dise, mì dre lati logazo, dia silepi mataya adea lena dii dre re, aii kosiro ko.

¹⁴ Tiza ko’o ami wa, dia ta‐tisilepi dii nii, Farusii be, dia togo iri dii! mi dre taitokokia nga ñale tako dise, mi dre ngole Nzambe kandra we kinzose dia konoro: tandu nidise mi kodo tavo tale di amba ami.

¹⁵ Tiza ko’o ami wa, dia ta‐tisilepi di Farusii be, Mi dreki lile yi murungu ase, la’u ase kurukuru mundia alo di ole alale dise, akodi kadre alale di, mi o akodi mva Geyena adea amba ami tandi ruse iri iri.

¹⁶ Tiza ko’o ami wa dia drilepi mi ako dii, ki di, Dia angodi ya kakiña i yelakuse, tai nidi tako; dia angodi ya kakiña i da’abu yekalu adea, mari adre akodi dreka.

¹⁷ Mì dia azaza dii e, mì dia mi ako dii e, amba ado murungu ya, da’abu murungu ya? yekalu da’abu olepi lolo di murungu ya?

¹⁸ Mi ta indi, Dia angodi ya kakiña i drakirase, tai nidi tako; dia angodi ya kakiña i ngafele drakiradri dise di, mari be akodi dreka.

¹⁹ Mi dia mi ako dii, amba murungu ya, ngafele di murungu ya? drakira ngafele di olepi lolo di murungu ya?

²⁰ Tandu nidise akodi akiña i drakirase, akiña i drakirase, ngae o̱ei adrelepi adidri dii e.

²¹ Dia angodi ya akodi dre i akiñazo yekalu dise, akiña i yekaluse akodi molepi lena dise.

²² Dia angodi ya akodi dre i akiñazo buse, akiña i kiti‐mokonzi Nzambe adease, akodi lirilepi kiti‐mokonzi dri dise.

²³ Tiza ko’o ami wa dia ta‐tisilepi dii, Farusii be, dia togo iri dii! mi dre mnaamna e, bizari nyepy e, bizari zianyeu be mudri be, mi dre alo di fele Nzambedre dise, dreki tavo tale di, tai lele kini di, ta ka’ile di be, amba tai nidi murungu di ruse toratise mi o dre ko: mi su tai nii o dreki tai azi dii ta’izo ko.

²⁴ Mì dia drilepi mi ako dii, ṅwaṅwa telepi ti dii, dre kamilo tezo.

²⁵ Tiza ko’o ami wa, dia ta‐tisilepi dii, Farusii be, mi dre kopo rumva, saani rumva jile dise, aii dre adrezo kugu tai, ta lovo konji dii be bi dise.

²⁶ Mi Farusii mi ako dii, dridri mi koji kopo a, saani a be tai amvele dii kadre ketekete indi.

²⁷ Tiza ko’o ami wa, dia ta‐tisilepi dii, Farusii be, dia togo iri dii! mi dreki adrele mogo adrelepi kemve dii tini dise, adrelepi avelepi aveavea di tini, fa dia dralepi dii adea, tai ketekete o̱ei ko dii be dre gazo lana bi.

²⁸ Ngoro nitini amiki amvele di adre dia mise piri, amiki togo ami lena iri amiki taise, takonji be ami lena bi.

²⁹ Tiza ko’o ami wa, dia ta‐tisilepi dii, Farusii be, dia togo iri dii! mi dre ba sile nabiki mogo dre dise, dre mogo dia ta olepi piri dii adea ozo avele aveave,

³⁰ dre tazo, Amà adre kitu amaki atakia se di, ama o tai aii be dre ko, kari nabi adea kutuzo.

³¹ Ngoro nitini mi tada tai ami tandidre, mi anjia dia nabi fulepi drale diikia e.

³² Tandu nidise mi koda amikia atakia nga tibizo di gale bi.

³³ Ami ni, mi mva ni adea, mi kolapa tavo Geyena adea tale di angini ya?

³⁴ Tandu nidise, mi no ka, ma mu nabi, togiliyi, dia ta‐tisilepi dii be ami vuna: arukaba mi kofu drale, dre kipazo; arukaba mi kobe kiñise amiki sinagogona, dreki aiiki mi fozo ba murungu di ase, ba murungu azi di lena:

³⁵ A kobaro dia ta olepi piri diiki kari kutulepi vudri o̱ei di amidri, kari Ebele, dia ta olepi piri di adea vulese cale kari Zekariya adea, mva‐ago Berekaya adea mi dre fule drale vo lolo kofule drakira be di a di.

³⁶ Ma ta amidre pati, tai oei dii kali biro nidi dri.

³⁷ A Yerusalemi, Yerusalemi nabi fulepi drale di dre dia mule ai vuna dii fuzo drale kirase, vese angopi ya ma le ami anjia atonale, ngoro ta’u dre ai mva atonale ai kufu unduna di tini, mi dre lezo ko.

³⁸ Mi no ka, a ta’i ami vo tandroro.

³⁹ Ma dre tale amidre dise, Mi kono ma ñanomvano velero di a be ko, mi kota ta ka, ki di, Beneditu kadre akodi alilepi Mirini ruse di dre.