Matayo 20 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Mataya bu adea dre adrele joliyi tini dise, akodi afozo dribikiono azi olepi dii zi frankase ai biño‐amvuna.

² Adi koka’i aiidre franka alo dise kituse di, i mu aii ai amvuna.

³ Adi dre afozo saa na añi dise, dre dia azina nozo vo nga gizo di a adrera’a tako;

⁴ Adi dre tazo aiidre, ki di, Mi koli biño‐amvuna indi, ado kafuta ya tani di, ma kofe amidre. Aii dreki aiiki lati dozo lizo.

⁵ Adi dre afozo todia saa njikasia añi dise, saa nji‐dri‐su añi dise, dre tai ozo ngoro dridri di tini.

⁶ Saa mudri‐dri‐alo añi dise, adi dre afozo, dre dia azina kusuzo adrera’a; adi dre tazo aiidre, ki di, Mi adre nole tako kitu kpacia adose ya?

⁷ Aii dreki tazo adidre, Dia alo di dre ama zile azi o frankase tejia ko dise. Adi ta aiidre, Mi koli biño‐amvuna indi.

⁸ Kitu kondi di, miri biño‐amvu adea ta dia ai nga likilepi diidre, ki di, Mi kozi azi olepi dii, dre aiiki kafuta fezo aiidre, dre ta andu bara’a dia velero di dre adrezo dia dridri diiro.

⁹ Dia zile frankase saa mudri‐dri‐alo dise dii kaliki dre di, aii doki franka alo alo kalomakaloma.

¹⁰ Dia dridri dii kaliki dre dii, aii tusuki, aii kodo ambani franka alo di ruse, kadre nitini aii oei di e do franka alo di indi.

¹¹ Aii kodo franka alo dre di, aii o muṅa tai joliyiru.

¹² Dre tazo, ki di, Dia nii oki azi dre saa alo dise kodia, mi dre ta ozo ama be kitu kalepi, lanjilepi dii aii be dada.

¹³ Adi dre ta akozo, dre tazo, dia alo aiiki kofulena di dre, ki di, Arupi, ma o takonji miru ko: mi ka’i madre franka alo dise ko ya?

¹⁴ Mi kotinga nga mina, mi dre ami lati dozo lizo; ama tai lele di e fele dia nidi velero di dre, ngoro midre di tini.

¹⁵ Togi e ko ya ma o nga mana ngoro ma dre lele di tini? Ami mi adre konji, ma dre adrele tani dise ya?

¹⁶ Ngoro nitini dia velero di kadre dia dridri diro, dia dridri di kadre dia velero diro.

¹⁷ Yesu dre mbara’a Yerusalemina, adi do dia tayilepi dii, aii dre lizo aii taiya adi dre tazo aiidre lati bale’a, ki di,

¹⁸ Mi no ka, ama are mbale Yerusalemina; a kofe Adamuni Mva koani dridri diidre, dia ta‐tisilepi diidre be; aii kota adini tavo kodraro.

¹⁹ Dra adini fezo dia‐šurudre, aii kotabi adi, dre bezo kinise, dre kipazo; kitu velero na dise a kotinga akodi todia.

²⁰ Dra andre Zebedayoni anjia adea alidre adi vuna, ai mva‐agoro dii be, dre tandira’a adi kandra dre tai anda zira’a adi ti.

²¹ Adi dre tazo adidre, ki di, Mi le ado ya? Akodi ta adidre, mi kota togi anjia iri nii mana dii koliriro, alo ami drigulese, alo ami lijilese, ami matayana.

²² Yesu dre ta akozo, dre tazo, Tai mi dre zile ma ti di mi ni ko kania. Mi kicoa kega ma dre ole mvule ñano di mvu ya? Aii ta adidre, ki di, Mà kicoa kania.

²³ Adi ta aiidre, ki di, Kega ma dre mvule di, mi komvu vele: ta lirizo ama drigulese ama lijilese di, ama ta ma dre fele di ko, tai nidi aiikia di ama Ata lededre aiidre.

²⁴ Dia mudri koyi tai nidi dre di, aii o kumba adrupii iri diiru.

²⁵ Yesu dre aiiki zizo i vuna, dre tazo, ki di, Mi ni miri dia‐suru adea adreki ta o miri tini aiidre, aiiki dia murungu dii dreki ta ozo mi lanjilanji se aiidre.

²⁶ Kadre nitini tai kadre amiki kofule ko: ta adrezo murungu di lovo ru dia angodi ya amiki kofule kadre dia ta olepi amidre di:

²⁷ ta adrezo dridri di lovo ru dia angodi ya amiki kofule a di, akodi kadre amidre adremakandraro.

²⁸ Ngoro Adamuni Mva alida dia ko’oro tai ise ko tini, dre ai lidri fezo dia bi logozo.

²⁹ Aii dre afora’a Yeriko ase, dia lezolepi bi dii liki adi vuse.

³⁰ Mi no ka, dia iri mi ako dii dre lirira’a lati laga, aii koyi Yesu dre lavura’a dre di, tre dre tazo, Miri, mi koba ami togo kini ama ru, mi Dawidini mva.

³¹ Dia lezolepi dii dreki aiiki ndrizo, kagiro titi: aii dreki trezo ambani, dre tazo, ki di, Miri, mi koba ami togo kini amaru, mi Dawidini mva.

³² Yesu dre adrezo kiri, dre aiiki zizo, dre tazo, ki di, Mi le ma ko’o amidre ado ta ya?

³³ Aii taki adidre, ki di, Miri amaki mi konjiro.

³⁴ Yesuni togo dre tira’a, dre aiiki mi tabezo; drañano aii no nga dre, dre lizo i vuse.