Matayo 17 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Kitu njikazia velero diise, Yesu dri Petero e, Yakobo e, Yoane adrupia be i be, dre mbazo kira kacua di drina aii taiya:

² adini lasu dre ai alazo aii mise: adini mibale dre laguzo kitu tini, adini bongo go adrele kemve ngadra tini.

³ Mi no ka, Mose, Eliya be dreki agazo aii mise: aii dre ta tara’a adi be.

⁴ Petero dre ta akozo dre tazo, Yesudre, ki di, Miri, nini amadre tani ama konua; mi le di, ma kosi mvorogo na wa; alo di mise, alo di Mosese, alo di Eliyase.

⁵ Adi dre ta tara’a, mi no ka, nduruku kañakaña ali lindriro aii drile dre: mi no ka, kuli ndurukulese di dre tazo, ki di, Nidi ama mva tasila di, ma adre lenzele adise we: mì koyi akodi tai.

⁶ Dia tayilepi dii koyi dre di, aii dreki dezo aiiki mibale bazo vudri, dre rozo roro we.

⁷ Yesu dre alizo, dre aii tabezo, dre tazo, Mi konga, mi koro nga ko.

⁸ Dre aii mi dora’a, aii noki dia ko Yesu alokodia.

⁹ Aii dreki asira’a kira drise Yesu fe tai aiidre, dre tazo, ki di, Mi kota diadre tejia ko, Adamuni Mva nga dradra ase ka.

¹⁰ Dia ai tayilepi dii dreki adini ti zizo, dre tazo, Kadre nitini dia ta‐tisilepi dii taki su Eliya dre alizo dridri adose ya?

¹¹ Adi dre ta akozo, dre tazo, ki di, Eliya dre alile kania, dre nga ledezo oei todi:

¹² Ma dre tazo amidre, Eliya alidre kania, aii dreki adini nizo ko, aii dreki ta ozo akodidre ngoro aii dreki lele di tini, Adamuni Mva koliza aii drekase ngoro nitini.

¹³ Dra dia tayilepi dii nidre geagea, adi ta aiidre Yoane dia Batisilepi dia tandu.

¹⁴ Dra aii dreki alizo dia lezolepi di vuna di, ago alidre adi vuna dre kayati tizo adi kandra, dre tazo ki di,

¹⁵ Miri, mi koba ami togo kini ama mvaru; agilili dre adini ole dise, dre lizazo we: adi dre dele acina kolia dise, adi dre dele yina kolia dise.

¹⁶ Ma dre akodi drizo dia ami tayilepi dii vuna, aii kicoa akodi lede ko.

¹⁷ Yesu dre ta akozo dre tazo, ki di, A biro tai ka’ilepi ko di, togo alalepi ko di. Ma kadre ami be vese angopi ya? ma koliza amiki tase vese angopi ya? Mi kaji akodi ma vuna nole.

¹⁸ Yesu dre adini ndrizo; teri konji dre afozo akodi ase: Mva lederuda saa nadise.

¹⁹ Dra dia tayilepi dii dreki alizo Yesu vuna aii taiya, dre tazo, ki di, Mà kicoa dro na ko adose ya?

²⁰ Adi dre tazo aiidre ki di, Amiki ta ka’ile ca dise: Ma dre tale amidre pati dise ta ka’ile mutadikisia tini di kadre ami dreka be di, mi ko ta kira nididre, ki di, Mi koli nolese vo nadi na; kira koli; tai alo di dre mi pizo ko.

²¹ Suru nidi kicoa afo tako ko, afo alo ta ngozo Nzambe kandra dise, ta nga ñale di gazo re dise.

²² Aii dreki adrera’a Galilayana Yesu dre tazo aiidre, ki di, A kofe Adamuni Mva mundia dreka;

²³ Aii kofuki adi drale, kitu velero na diise a kotinga akodi todia. Tiza adre aiiki o ni we.

²⁴ Aii kaliki Kaparanaumana di mundia shekeli‐mo dolepi dii alidre Petero vuna, dre tazo, ki di, Dia ami ta‐tadalepi di fe shekeli‐mo ya?

²⁵ Akodi ta, Ai’i. Akodi kali jona di, Yesu ta dridri akodidre, dre tazo, Mi tusu angini ya, Simona? Mokonzi vo adea, aii doki franka bidaiya adea adi drekase ya, aiiki mva drekase ya? Aii doki ditoa drekase ya?

²⁶ Akodi kota di, ki di, Aii doki ditoa drekase, Yesu ta adidre, Tai nidise mva‐ago fe ko.

²⁷ Mi koli yi murunguna, dre kodza bezo, dre kosia afolepi dridri di bezo; mi konji adini sibale di, mi kokusu shekeli: mi kodo, dre fezo aiidre amase, amise, ama ko’oro aii dele ko.