Matayo 15 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Dra Farusii, dia ta‐tisilepi dii be aliki Yesu vuna Yerusalemilese, dre tazo, ki di,

² Dia ami tayilepi dii oki konji ta aku maligakia dre tale di ru adose ya? Aii koña nga di, aii dre aiiki dreka jile ko dise.

³ Adi dre ta akozo tale, dre tazo aiidre, Mi adre takonji o togi Nzambe adea ru indi amiki ta aku diise adose ya?

⁴ Nzambe dre tale dise, ki di, Mi koba atani kañi, ami andre be: ki di, Dia takonji talepi ataru, andreru di kodra pati.

⁵ Mi dre ta tazo, ki di, Dia kota atadre, andre dre di, ki di, Nga anda ma kicoa fe na amidre, mi dre adrezo tani ase di, a fe Nzambedre.

⁶ Akodi koba atani kañi ko. Mi dre ta Nzambe adea bazo tako amikia ta aku dise.

⁷ Mi dia togo iri dii, Yesaya adre nabita tara’a geagea amidre, ki di,

⁸ Dia nii adreki ama kañi ba tise, Aiiki togo voavoa ma ruse, kania.

⁹ Aii dreki ama kañi bazo tako, Dreki togi diakia dii tadara’a mandoro.

¹⁰ Adi dre dia lezolepi dii zizo i vuna, dre tazo aiidre, ki di, Mi koyi wa, dre yizo geagea:

¹¹ Nga silepi diaki sibalena di adre konji o dia ru ko, ta afolepi sibale ase di adre konji o dia ru.

¹² Dra dia tayilepi dii aliki, dre tazo adidre, ki di, Mi ni ko ya, aii koyi tai nidi di, Farusiiki togo adre asuale.

¹³ Adi dre ta akozo, dre tazo, ki di, Nga o̱ei kibiru ama Ata buna di dre tidile ko dii, a kaku.

¹⁴ Mi kota’i aii: aii dia dia drilepi mi akoro dii e, Dia mi akoro dii dre dia mi akoro dii drizo dí, aii iriti kode buna.

¹⁵ Petero dre ta akozo, dre tazo adidre, ki di, Mi kotada ta alale nidi amadre geagea.

¹⁶ Adi dre tazo, ki di, Ami koangia mi adre ta ni akoro nitini ya?

¹⁷ Mi atogia ko ya ado nga ya sile dia sibalena di, adre sile a kania, dre fozo amve zaro.

¹⁸ Ta afolepi dia lese dii, afo togo ase; tai nii dreki dia ozo konji

¹⁹ Tai dre afole diaki togo ase diise, ta konji tusule dii, ta dia fule drale dii, ta dia momo kamvole dii, ta dia mo ako di kamvole dii, ta nga kugule dii, ta tandu tale kinzose dia ru dii, ta ta konji tale diaru dii:

²⁰ Tai nii adreki dia o konji; nga ñale dreka ji akoro dii o dia konji ko.

²¹ Yesu dre afozo nalese, dre lizo vokia Tura e, Sidona be di a.

²² Mi no ka, toko Kanana adea afodre kufula nii lese, dre trezo, ki di, Mi koba ami togo kini maru, A Miri, mi Dawidini mva, teri konji di o ama mvatoko asuale asuasua we.

²³ Adi dre ta akozo akodi ti tejia ko, Dia adini tayilepi di dreki alizo adi vuna dreki adi ti zizo tawase, dre tazo, ki di, Mi komu adi; adi dre trele ama vuse dise.

²⁴ Adi dre ta akozo, dre tazo, ki di, A mu ma kabiliki avilepi jo Yisarele adea dii vuna alokodia.

²⁵ Akodi dre alizo, dre tandizo adi kandra, dre tazo, ki di, Miri, mi o ma be.

²⁶ Adi dre ta akozo, dre tazo, ki di, Ta anjiekia liña dozo bele kokia e dre su ko kania.

²⁷ Akodi dre tazo, Aizako, Miri, kokiae dreki koroña delepi aiiki bwanani misa drise dii ñale dise.

²⁸ Dra Yesu ako ta tale, dre tazo akodidre, ki di, A toko, ami tai ka’ile di adre murungu: a ko’o midre ngoro mi dre lele di tini. Akodi mvatoko lederuda saa nadise.

²⁹ Yesu dre lizo nalese, dre cazo yi murungu Galilaya na añi; adi dre mbazo kira drina, dre lirizo nale.

³⁰ Dia lezolepi we dii dre alizo adi vuna, dia sialepi siasia dii, dia mi akoro dii e, dia ladra trotro dii e, dia lilepi gadugadu dii e, dia azina bi dii aii be, aii dreki aiiki bezo adi pa laga, adi dre aiiki tedrizo.

³¹ Kadre nitini aii kono dia ladra trotro dii ta tara’a, dia lilepi gadugadu di lederuda, dia sialepi siasia dii tecira’a, dia mi ako dii nora’a, dia lezolepi diiki lindri gaga, aii dreki utukufu bazo Nzambe Yisarele adea di ru.

³² Yesu dre dia ai tayilepi dii zizo i vuna, dre tazo, Ama togo ti dia lezolepi diise, aii dre adrele ñanomvano ma be kitu na dise, aiiki nga ñale dii yokodo: ma le aii mule tebirise ko, ngale aii liki lati balese fonafona.

³³ Dia tayilepi dreki tazo adidre, ki di, Ambata bi kicoalepi dia lezolepi bi dii dreki ñale pizo di vo aṅboro di lena angualese ya?

³⁴ Yesu dre tazo aiidre, ki di, Ambata be angopi ya? Aii dreki tazo, ki di, Ambata nji‐dri‐iri, kosia bi ko, camva dii be.

³⁵ Adi dre tazo dia lezolepi diidre, aii koliri vudri;

³⁶ Adi dre ambata nji‐dri‐iri dii dozo, kosia be; adi dre merisi fezo, dre topizo, dre fezo dia tayilepi diidre, dia tayilepi dii dre fezo dia lezolepi diidre.

³⁷ Aii o̱ei ñadre, aii dreki pizo: nga koroña aii dreki ta’ile dii, aii kudu kanji nji‐dri‐iri.

³⁸ Dia nga ñalepi dii adreki ago kutu su, toko e, mva be.

³⁹ Adi dre dia lezolepi dii muzo lile, dre sizo kaluṅbana, dre cazo kofulae Magadena adea na.