Matayo 12 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Lokia nadise Yesu lidre monduna kitu sabiti adease; tebiri adre dia ai tayilepi diiki o ni, aii dreki mondu bazo sile, dre bazo.

² Farusii, aii kono tai nidi dre di, dreki tazo adidre, ki di, Mi no ka dia ami tayilepi dii oki togi kitu sabiti adease ko.

³ Adi dre tazo aiidre ki di, Mi ni tai teji Dawidi dre ole kiono di ko ya, tebiri kadre akodi o di, dia adrelepi akodi be dii indi;

⁴ tandu akodi dre sile Nzambeni jona di, dre mapa tadazo di ñazo, mapa nidi adi koñaro togise ko, dia adrelepi akodi be dii koñaro togise ko indi, alo koani koñaro togise ni?

⁵ Mi la toratina ko ya, tandu koani yekaluna dii oki a̱zi kitu sabiti adease di, dreki adrezo takonji akoro?

⁶ Ma dre tazo amidre, ki di, Dia alo be nole amba yekalu di ruse.

⁷ Mi koni di, adre nidi ado tai tada ya, ki di, Ma le tai lele kini di, ma le ta za tufuzo Nzambe ledezo di ko, mi kota tavo dia ta olepi konji ko dii dre ko.

⁸ Adamuni Mva dre adrele kitu sabiti adea Miriro dise.

⁹ Adi dre njizo nalese, dre sizo aiiki sinagogona:

¹⁰ mi no ka, ago dreka ’yolepi ’yo’yo di. Aii dre adi ti zizo, dre tazo, ki di, A tedri mundia kitu sabiti adease togise ya? aii kolodzaro ta adiru.

¹¹ Adi dre tazo aiidre, ki di, Ado ago e ya amiki ketona adrelepi kabiliki alo di be di, kabiliki nidi dre dezo buna kitu sabiti adease, adi ru tingale drekase ko ya?

¹² Kadre nitini lagi ago adea lavu amba lagi kabiliki adea di ruse angopi ya? Tandu nidise ta tani ole kitu sabiti adease togi e.

¹³ Dra adi ta agodre, ki di, Mi koteji dreka. Akodi dre drekana tejizo; drekana lederuda ngoro dreka azi di tini.

¹⁴ Farusii dreki fozo ta ta adiru aii kofuro adi.

¹⁵ Yesu dre ta nidi atogiara’a, dre lizo nalese, dia bi dreki lizo adi vuse; adi dre aiiki tedrizo o̱ei,

¹⁶ dre tazo aiidre aii ko’oro adini rubi la’ule ko:

¹⁷ Yesaya, nabi e, a ko’oro akodi tai akele tara’a, ki di,

¹⁸ Mi no ka ama adremakandra ma dre zile di; Dia ama tasila di akodi tai se ama lindri adre lenzele: Ma koba ama Teri akodidri, Adi ko tada tavo tale di Dia‐šuru.

¹⁹ Adi kolawa ko, adi kotre ko; Dia alo di koyi adi ti latii a tejia ko.

²⁰ Lomi aṅwa, adi koṅo ko, Bongolika acikase, adi kotedra ko, Adi mu tavo tale di lavule ka.

²¹ Dia‐šuru koba aiiki mi adini ru vo.

²² Dra i dre ago teri konji dre rule, mi ako di, ladra trotro di be di, ajizo adi vuna: adi dre akodi tedrizo, kadre nitini di ago ladra trotro di ta ta, dre nga nozo.

²³ Dia lezolepi o̱ei diiki lindri are gale, dre tazo, ki di, Ago nidi Dawidini Mva e ko ya?

²⁴ Farusii koyi tai nidi di, aii ta, ki di, Ago nidi dro daimonae Balazebuba miri daimonakia dise kodia.

²⁵ Aiiki ta tusule dii nira’a, adi dre tazo aiidre, ki di, Mataya alo di dre rulanjizo di kadre tandroro; ba murungu di dre rulanjizo di kadre ko; diani kiare dre rulanjizo di kadre ko:

²⁶ Setani kodro Setani di, adre rulanjizo, kadre nitini adini mataya kadre ngini ya?

²⁷ Ma dre daimona drozo Balazebuba se di, amiki mva adre aiiki dro adise ya? Tandu nidise aii kadre amiki tavo talepi dii.

²⁸ Ma dre daimona drozo Teri Nzambe adease di, dra mataya Nzambe adea ali amidre.

²⁹ A lambe dia iriñi be di dridri ko di, dia kicoa sile akodia jona akodi ngae tiza angini ya? A ko lambe ka, adi kotiza akodi nga ndo.

³⁰ Akodi adrelepi ama be ko di, adre tai o ma ru; akodi nga lomvolepi ama be ko di, adre labule.

³¹ Tandu nidise ma ta amidre, ki di, A kotiza diaki takonji o̱ei, dre aiiki ta tale sibale konjise dii tizazo; a kotiza ta tale sibale konjise di Teriru ko.

³² Dia angodi ya ta talepi Adamuni Mva ru di, a kotiza tai nidi akodi dre; dia angodi ya ta talepi Teri Loloru di, a kotiza tai nidi akodi dre ko, vese nadise ko, vese acalepi velero di ko indi.

³³ Mi ko’o fa tani di, mi ko’o fa‐lo’wa a di tani indi; mi ko’o fa ṅwaṅwa di, mi ko’o fa‐lo’wa ṅwaṅwa di indi, dre fa nile lo’wa na se dise.

³⁴ Mì anjia ni adea, mi adrelepi konji dii, mì kicoa ta tani ta angini ya? sibale dre ta tale togoni ambi murungu di ase dise.

³⁵ Ago tani di do nga tani dii, ai nga tani di ase: ago konji di dre nga konji dii dozo aii nga konji dii ase.

³⁶ Ma dre tazo amidre, ki di, Tai tako o̱ei mundia kota ni, aii kota tai nidi andu kitu tavo tazo di se.

³⁷ I dre mi tadale dia ta olepi piri di ami taise dise, i dre ami tavo tale di tazo miru ami taise.

³⁸ Velero dia arukaba ta‐tisile dii e, Farusii be, ako ta adi ti, dre tazo, ki di, Dia ta‐tadalepi di, ama le nga ta‐tadazo di nole mi dreka.

³⁹ Adi dre ta akozo, dre tazo aiidre, ki di, Biro konji di, muṅa olepi di be nda nga ta‐tadazo di; a kofe nga ta‐tadazo di Yona adea kodia biro nidi dre:

⁴⁰ Ngoro Yona adre kitu na diise, ngaci na diise kosia murungu a di tini; Adamuni Mva kadre kitu na diise, ngaci na diise vo ketona.

⁴¹ Ago Ninewe adea kongaki kuru tavo tale di se, biro nidi be, dre tavo tazo biro nidi dre: aii dreki aiiki togo alazo Yona ni tandu ngile di se; mi no ka dia adrelepi nole di amba Yona ruse.

⁴² Mokonzi tokoro la’u lalaṅburo di konga kuru tavo tale dise biro nidi be, dre tavo tazo biro nidi dre: adi dre alile la’u mvumvu di lese togi Solomo adea yile dise; mi no ka, dia adrelepi nole di amba Solomo ruse.

⁴³ Teri konji di, i kafo dia ase di, dre lizo vo adrelepi yi akoro dii ase, tai lovozo di ndara’a, dre kusuzo ko.

⁴⁴ Dra adi ta, ki di, Ma kogo ama jo ma dre afozo ase di lena; adi kali di, adi kusu jo dra, a au’wa dre, a lede dre tani.

⁴⁵ Dra adi li, dre teri nji‐dri‐iri amba i konji di ruse dii dozo, aii dreki sizo jona, dre mozo nale: tai velero dise di ago nidi go adrele konji amba akodia tai dridri di ruse. Tai ngoro nitini kaca biro nidi konji di vuna.

⁴⁶ Adi dre ta tara’a dia lezolepi diidre, mi no ka, andrena, adrupia be adreki amvele, aii dre lezo ta ta adidre.

⁴⁷ Dia alo di dre tazo adidre, ki di, Mi no ka, ami andre, ami adrupii be adreki amvele, aii le ta tale midre.

⁴⁸ Adi dre ta akozo, dre tazo dia ta nidi talepi idre di dre, ki di, Ama andre adi ya? ama adrupii adi ya?

⁴⁹ Adi dre ai dreka tejizo dia ai tayilepi dii vuna, dre tazo, Mi no ka, ama andre, ama adrupii be.

⁵⁰ Dia angodi ya dre ta ole ama Ata buna di dre lele dise, akodi ama adrupii e, ama amvupii e, ama andre be.