Marako 7 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Farusii dreki rukebezo adi vuna, dia tatišilepi dii arukaba be, acale Yerusalemilese dii,

² aii dre dia adini tayilepi diiki arukaba nozo kiono aii adreki aiiki nga ña aiiki drika ketekete ko, drika ji akoro.

³ Kadre nitini Farusii e, Yudaa dii be o̱ei aii ko ji aiiki drika tawase ko di, aii ña nga ko, dreki ta aku maligakia tale di yira’a:

⁴ aii kanji libongolese di, aii koji aiiki ruba ko di, aii ña nga ko: tai bi azina aii dre rule ole dii, tai kega jizo di, tai ledri jizo di, tai ledri aiyaro dii jizo di.

⁵ Farusii e dia tatišilepi dii be, aii dre ta lizizo adi ti, ki di, Dia ami tayilepi dii teci ta aku maligakia tale di vuse ko adose ya? aii dre aiiki nga ña aiiki drika ketekete ko.

⁶ Adi dre taza aiidri, Yesaya adre nebita ta geagea amise dia togo iri dii, ngoro ta tišile di tini, ki di, Dia nii adreki ama kañi ba aiiki tise, Aiiki togo voavoa ma ruse kani’a.

⁷ Aii adreki ama kañi ba tako, Dreki togi diakia dii tadara’a mandoro.

⁸ Mì ta’i togi Nzambe adea, dre togi diaki di ruzo ṅbi.

⁹ Adi dre taza aiidri, Mì kuku togi Nzambe adea vele, mì ko’oro amiki ta aku di.

¹⁰ Mose dre tale dise, ki di, Mi koba ami atani kañi, ami andre be; ki di, Dia ta konji talepi ataru andreru di kodra pati:

¹¹ mì adre ta ta, ki di, Dia ko ta di ataadri andreadri, ki di, Nga anda ma kicoa fe na ami dri, mi dre adrezo tani asa, adre Korobono, ta nidi adre ta, Afe Nzambedri di;

¹² mì kota ta dria, kota’i ta o o atanadri di, andrenadri di o̱ei;

¹³ dre ta Nzambe adea bara’a tako amikia ta aku mì dre fele dise: mì adre ta bi niitini di o ami.

¹⁴ Adi dre dialezolepi dii zizo todia i vuna, dre taza aiidri, Ami o̱ei mì koyi ta ma dre tale di, mì koyi geagea:

¹⁵ nga alo amve di šilepi dia lena kicoalepi dia o konji di yokodo: ta afolepi dia lese dii, ta nii adreki dia o konji ni.

¹⁶ Ngale dia alo adrelepi bibale be ta yi di, koyi wa.

¹⁷ Adi ko nga šile jona dialezolepi dii kofulese di, dia ai tayilepi dii adreki ta lizi adi ti ta ni andu alale dise.

¹⁸ Adi dre taza aiidri, Ami koangia mì adre ta ni akoro nitini ya? Mì atogia ko ya, ado nga ya o šile dia lena amvelese kicoa akodia o konji ko;

¹⁹ nga dre šile akodia togona ko dise, adre šile akodi a kani’a, dre fozo amve zero, nga ñale dii o̱ei ledezoa ketekete.

²⁰ Adi dre taza, Ta afolepi dia lese dii, ta nii adreki dia o konji.

²¹ Tai dre afole diaki togoase dise, ta konji tušule dii, ta dia mo ako di kamvole dii,

²² ta nga kugule dii, ta konjilepi we dii, ta kinzo ole di, ta ta konji lavo bale di, ta mi bazo konji diaru di, ta ta konji tale diaru di, ta buṅa ole di, ta ta tobizo di:

²³ ta o̱ei konji nii afoki dia lese, dreki dia ozo konji.

²⁴ Adi dre ngazo dalese, dre njizo kofule Tura adea Sidona be di‐a. I dre šizo jona, dre lezoa dia alo di ko ni nidi ko: i kicoa i zu ko.

²⁵ Drañano toko alo, akodia mvatoko camva adre teri konji be, akodi dre adini rubi yizo, dre alizo dele adi pa.

²⁶ Toko nidi Giriki e akodia šuru Suria‐foinike. I dre ngozo adiru, adi kodroro daimona ai mvatoko‐ase.

²⁷ Adi dre taza akodidri, Anjia kopi dridri: ta anjiekia liña dozo bele kokiae dri̱ su ko kani’a.

²⁸ Akodi dre ta akozo, dre taza adidri, Aizako, Miri: kokiae mesa zona dreki anjiekia koroño ñazo kani’a.

²⁹ Adi dre taza akodidri, Ta nidise mi do ami lati lizo; daimona nga ami mvatoko‐ase dre.

³⁰ Akodi dre lizo jona, dre mva kušuzo ayida langadri, daimona nga asa dre.

³¹ Adi dre fozo todia kofule Tura‐ase dre lavuzo Sidona‐ase, dre acazo yitapara Galilaya adea laga, kofula Dekapoli adea‐ase.

³² Aii dreki dia adrizo adi vuna, bibalena azudre, kuli lugbalugba; aii dreki ngozo adiru, adi koba drika akodiru.

³³ Adi dre akodia drizo dialezolepi dii ketolese kaloma, dre drikamva sozo akodi bibalena, dre tušu fuzo, dre akodia ladra tabezo:

³⁴ dre mi dora’a buna, dre la’azo katu, dre taza akodidri, Epata, ta nidi ta, Ami bibale konjiru.

³⁵ Akodi bibale njiruda, bago akodia ladra adea trida, akodi dre ta tazo geagea.

³⁶ Adi dre logazoa aiidri re aii kotaro diadri tejia ko: ngoro adini ta logale di aiidri re di tini, ngoro aiiki ta bazo la’ule la’ula’u we di tini.

³⁷ Aiiki lindri ga amba ni, aii ki di, Akodi o tai o̱ei tani: i adre dia bibale azulepi di lede ta yi, dre dia kuli ako di ledezo tai ta.