Marako 6 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Adi dre fozo dalese, dre cazo ai tandini la’una; dia ai tayilepi dii dreki lizo adi vuse.

² Kitu sabiti adea kaca di, adi ba ta tadale sinagogona: dia bi adini tayilepi diiki lindri gaga, aii dreki taza, Ago nidi ni ta nii angualese ya? Adi fe tanini nidi ago nididri ni ya ta kokoroko nitini akodi dre ozoa i dreka niiki andu angini ya?

³ Akodi fe‐galepi di ko ya? akodi mva Maria adea, adrupi Yakobo adea e, Yose adea e, Yuda adea e, Simona adea be ko ya? akodia amvupii adreki konua ama be ko ya? Aiiki togo dre asuazo adiru.

⁴ Yesu dre taza aiidri, Nabi kañi bale la’u azidi lena di be, a ba akodia kañi akodia tandini la’una di ko, akodia tandini adrupie kofulaa di ko, akodia tandi bana ko.

⁵ Adi kicoa azi kokoroko o dale ko: i ba drika dia ca drafulepi diiru kodi’a, dre aiiki ledezo.

⁶ Adini lindri gada aiiki ta ka’ile ko dise. Adi dre tecizo ba‐ase kurukuru, dre ta tadazo.

⁷ Adi dre mudri‐dri‐iri niiki zizo i vuna, dre aiiki bazo mule iri iri, adi dre aiiki mi bazo lanjile lanjilanji teri konji dii dri;

⁸ adi dre ta tazo aiidri koliro latiase angia, kodi alo kutufa kodi’a; kodo ambata ko, komvo ko, kodo parata aiiki gofolona ko.

⁹ Aii košo kamaka aii pa, dre koti ašozo iri ko.

¹⁰ Adi dre taza aiidri, Ba angodi ya mì dre šizo jona, mì ayi dale mì dre adrera’a ba nidi lena di.

¹¹ Vo angodi ya aii kodri ami ko, aii koyi amiki ta ko, mì dre afora’a dalese, mì kotowa kini ami pagale‐ase tandu tadazo aiidri.

¹² Aii dreki fozo, dreki mando ngizo dia kalaro aiikia togo.

¹³ Aii dreki daimona bi dii ladrozo dia‐ase, dre dia bi dra‐fulepi dii tinizo dose, dre aiiki ledezo.

¹⁴ Maleke Erodi dre rubina yizo, runa dre la’ule dise: adi dre taza Yoane dia Batisilepi di ngadre dradra‐ase, ta nidise di tai kokoroko nii dre adi o ni lana.

¹⁵ Dia arukaba ki di, Akodi Eliya e, arukaba ki di, Akodi nabi e, Akodi nabi alo di tini.

¹⁶ Erodi ko ni rubina di, i ki di, Yoane, ma dre dri gale kiono di, akodi nga dradra‐ase dre.

¹⁷ Kiono Erodini tandi dre dia mule Yoaneni ru dise, dre akodia lambezo bagojona Erodiasini tase, ai adrupi Pilipoa toko e: i dre adini mole dise.

¹⁸ Yoane dre tale Erodidri dise, ki di, Nidi togi e ko mi dre ami adrupia toko mozo di.

¹⁹ Erodiasi dre adini ta letezo i lena, dre adini lezo fule drale, i kicoa ko kani’a.

²⁰ Erodi dre Yoane role roro dise, dre nizoa akodi dia ta olepi piri di e, akodi dia lolo e, i dre suzo akodi ru tani. Adi ko yi akodia tai di, i o ta bi dii, dre akodia tai lezo yile we.

²¹ Kitu alo kaca di, kitu adini tizo dise, Erodi dre ai miriiki zizo ai dia adrelepi tadriro diiki zizo, dia maligaro Galilayaa diiki zizo aii kaliro nga ña;

²² Erodiasini tandia mvatoko kaši aii kandra di, dre nga tozo, Erode e, dia lirilepi nga ña akodi be dii be aii lenzeki adise; maleke dre taza ajukumvadri, Mi kozi ado nga ya mi dre lele di ma ti, ma kofero midri.

²³ I dre ai pa wazo adidri, ki di, Ado nga ya mi kozi ma ti di, ma kofero midri, kadre nitini di ma kuku mataya mana di kofule midri.

²⁴ Akodi dre fozo, dre taza andreadri Ma kozi ado nga ya? Adi dre taza, Yoane dia Batisilepi dia dri.

²⁵ Drañano adi dre šizo mbele maleke vuna, dre zizo akodi ti, ki di, Ma le mi kofe madri ñanomvano Yoane dia Batisilepi dia dri ndakpana.

²⁶ Tiza adre malekeni o we; dre ai pa wale dise, dia lirilepi adi be diise, adi le ajukumva ndele ko.

²⁷ Drañano maleke dre tukutuku i laga di muzo, dre ta tazo kali adini dri be: adi dre lizo akodia dri li bagojona.

²⁸ Dre akodia dri adozo ndakpana, dre feza ajukumvadri, ajukumva dre feza andreadri.

²⁹ Dia adini tayilepi dii ko yi ta nidi di, aii dreki alizo adini avo, do bale buna.

³⁰ Dia mule dii dreki rukebezo Yesu vuna dreki ta tepezo o̱ei adidri, ado ta ya aii dre ole di, ado ta ya aii dre tadale di.

³¹ Adi dre taza aiidri, Amiki tandi mì kali ami taiya vo aṅboro di drina lovole ca. Dia bi diise, arukaba bi dii dreki alizo, arukaba bi dii dreki njizo, lokia aiidri lovozo nga ña tejia yokodo.

³² Aii dreki njizo kaluṅba‐ase lile vo aṅboro di drina aii taiya.

³³ Dia dreki aiiki lira nozo, dia bi dii dreki aiiki nizo, aii dreki razo zia cale ni.

³⁴ Adi dre afozo, dre dialezolepi bi dii nozo, ai togo dre ti̱zo aiise, aii dreki adrele kabilikia tini dise, kabilikia‐likilepi di dayokodo: adi dre ta bi dii andu bazo tale aiidri.

³⁵ Kitu ko o ta ndizo di, dia adini tayilepi dii aliki adi vuna, dreki taza, Vo nidi aṅboro, kitu o ta ndizo ñanomvano;

³⁶ mi komu dia aii koliro la’u‐ase, ba‐ase kurukuru nga gi aiidri ñale.

³⁷ Adi ako ta tale, dre taza aiidri, Mi kofe nga aiidri ñale. Aii dreki taza adidri, Mà koli nga gi mokuta kama iri diise, nga fezo aiidri ñale ya?

³⁸ Adi dre taza aiidri, Ambata be ami drika angopi ya? Mì li noa. Aii ko ni di aii dreki taza, Ambata nji, kosia iri.

³⁹ Adi dre ta tazo aiidri, dia o̱ei dii koliri mbi solisoli di dri ti̱ri̱ro.

⁴⁰ Aii dreki lirizo ti̱ri̱, arukaba ñadinji ñadinji, arukaba ñadiri‐dri‐mudri, ñadiri‐dri‐mudri.

⁴¹ Adi dre ambata nji dii dozo kosia iri dii be, dre mi dora‐a kuruna i ba beneditu ngaru, dre ambata tupizo, dre fezoa dia ai tayilepi dii dri̱ bale aii kandra; adi dre kosia iri dii lanjizo aiidri o̱ei.

⁴² Aii ñadre o̱ei, aii dre pizo.

⁴³ Aii dre ambata koroño kuduzo kanji mudri‐dri‐iri dii‐a tukuda, kosia iri diikia be.

⁴⁴ Ago ambata ñalepi dii kutu nji.

⁴⁵ Drañano adi o dia ai tayilepi dii šile kaluṅbana, aii dreki ziazo dridri ta’ana Betesedana, adi tandi dre dialezolepi dii muzo lile.

⁴⁶ Tako adi ta ta aiidri njira’a, i dre ngazo mbale kiradrina ngole Nzambedri.

⁴⁷ Nga kani dre di kaluṅba adre yi ketogona, adi adre ta’ana kaloma.

⁴⁸ Adi dre aiiki nozo, aii dre adrera kaluṅba lagu sole di‐a, lia dre vile aii mi dise, ngale ta lamazo vese su nga̱cise ya di, adi ali tecibe aii vuna yi drise; adi o ta lavuzo aii lagase.

⁴⁹ Aii ko no akodi tecira’a yi drise di, aii ta ase akodi teri e, dreki trezo.

⁵⁰ Aii o̱ei aii dreki akodia nole dise, aiiki togo dre ta ozo kuku. Drañano akodi adre ta ta aii be, dre taza aiidri, Amiki togo kadre kedrikedri: nidi ma e: mì kororo ko.

⁵¹ Adi dre šizo aii vuna kaluṅbana; lia dre akezo: aiiki lindri dre gazo aii lena gaga we;

⁵² aii dreki ambatani ta nile ko dise, aiiki togo mbamba.

⁵³ Aii kozia yiase di aii dreki cazo ta’ana Genesaretana, dre kaluṅba ’izo siñadri.

⁵⁴ Aii kafo kaluṅba‐ase di, drañano dia dre adini nizo,

⁵⁵ aii dreki razo la’u‐ase kurukuru o̱ei, aii dreki dia dra‐fulepi dii anduna bazo dole aiikia langadri, vo anda lena aii dreki yizoa akodi be.

⁵⁶ Vo angodi ya adi dre šizo di, bana, ba murungu di‐a, la’u‐a aii lala dia dra‐fulepi dii libongo vura’a, dre ngozo akodiru aii kotabero teji akodi bongoti: dia akodia tabelepi dii lederuda.