Marako 3 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Adi dre šizo todia sinagogona, ago adrelepi dale dri̱kana ’yo’yo.

² Aii adreki adini no adi kolede akodia dri̱ka kitu sabiti adease di; aii kolodzaro ta adiru.

³ Adi dre taza ago dri̱ka ’yo’yo di dri̱, Mi konga adrele kuru diaki kofulea.

⁴ Adi dre taza aiidri, Ado togi e ya kitu sabiti adease di ta tani ole di, ta konji ole di? dia tedrile dra‐ase di, dia fule di? Aii agi titi.

⁵ Adi ko lebe mi i lagase aiiki no kombase di, tiza adre adini o ni aiiki togo dre ta ozo mbale mbamba dise, adi dre taza agodri, Mi koteji ami dri̱ka. Akodi dre ai dri̱ka tejizo, dri̱kana lederuda.

⁶ Farusii dreki fozo, drañano ta ta adiru dia Erode adea be, aii kofuro adi angini ya.

⁷ Yesu dreki lizo dia ai tayilepi dii be yitapara laga, dialezolepi bi dii Galilayalese, dreki lizo adi vuse, Yudayalese,

⁸ Yerusalemilese, Edomelese, Yoradene ta’alese di be, Tura lagase di Sidona lagase di be, dialezolepi bi dii dre ta murungu adi dre ole dii yizo, aii ali adi vuna.

⁹ Adi dre taza dia ai tayilepi di dri̱ kaluṅba camva di kadre adi te, dialezolepi dise, aii kokipiro e ko:

¹⁰ adi dre dia bi ledele dise, kadre nitini dia adrelepi dra konji be dii kipiki adi, aii kotabero adi.

¹¹ Teri konji ko no adi di, aii de adi kandra, aii dre ngozo, ki di, Mi Nzambeni Mva e.

¹² Adi loga aiidri re kotada e ko.

¹³ Adi dre mbazo kiradrina, dre dia ai tandi dre lele dii zizo i vuna; aii dre lizo adi vuna.

¹⁴ Adi o dia mudri‐dri‐iri dii, aii kadrero i be, i komuro aii lile Nzambeni tandu ngi,

¹⁵ aii kadrero mi la̱njila̱nji be daimonaki ladrozo:

¹⁶ Simona, adi zi ru azina Petero:

¹⁷ Yakobo e mva Zebadayo adea, Yoane be adrupi Yakobo adea, adi zi aiiki ru Boanerege, ru nidi, Anjiago butadilepi di adea:

¹⁸ Andarea e, Pilipo e, Batolomayo e, Matayo e, Toma e, Yakobo e mva Alapayo adea, Tadayo e, Simona e dia Kananalese di,

¹⁹ Yudasi Keliota be, dia adini felepi di. Adi dre ašizo jona.

²⁰ Dialezolepi dii dreki rukebezo todia, kadre nitini aii kicoa tejia nga ña ko.

²¹ Adini arupii ko yiki di, aii liki adini ru, dre tale dise, ki di, Adi o tai tizitizadia tini.

²² Dia tatišilepi dii ašilepi Yerusalemilese dii, aii dreki taza, ki di, Balazebuba be akodi lena, ki di, Akodi ladro daimona miri daimonakiase.

²³ Adi dre aiiki zizo i vuna, dre ta tazo aiidri, tandu alale dise, ki di, Setani kicoa Setani dro angini ya?

²⁴ Mataya alo di dre rulanjizo di, mataya nidi kicoa adrele ko.

²⁵ Diani kiare’e dreki rulanjizo di, ai kiare’e kicoa adrele ko.

²⁶ Setani ko ngadre ta o iru di, i dre rulanjizo, i kicoa adrele ko, i akeake.

²⁷ Dia iriñi be di’a jona dia kicoa tejia šile ko akodi’a nga tiza, i lambe dia iriñi be di ka, i dre akodi’a nga tizazo ndo.

²⁸ Ma ta amidri pati, A kotiza diaki anjikia takonji o̱ei, dre aiiki ta tale šibale konjise dii tizazo.

²⁹ Dia angodi ya šibale konji talepi Teri Loloru di, ago akodia ta tiza ko, kona vuse kolia akodia tandu konji:

³⁰ aii dre tale dise, ki di, Akodi adre teri konji be.

³¹ Andrena adrupinae be dreki alizo, dre adrera’a amve, mu ta adi vuna, adini zi.

³² Dialezolepi dii dreki lirizo adi laga; aii dreki taza adidri, Mi no ka, ami andre e, ami adrupii be amvele di adreki ami nda.

³³ Adi dre ta akozo aii ti, dre taza, ama andre adi ya? ama adrupii adi ya?

³⁴ Dre mi lebera’a dia lirilepi i laga diiki no, i dre taza, Mi no ka, ama andre e ama adrupii be!

³⁵ Dia angodi ya dre ta ole Nzambe dre lele dise, akodi ama adrupi e, ama amvupi e, ama andre be.