Marako 11 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Aii kali añi Yerusalemia di Betepagea, Betaniaa di be, kira Bilaya palese, adi dre dia iri ai tayilepi dii muzo,

² Dre taza aiidri, Mì do lati lizo ba ami lagana di lena: drañano mì dre cazo bana, dongemva lile di mì ni kušu, dia mba teji drina dre ko; mì kotri, mì kali aba.

³ Dia kota amidri di, ki di, Mì o nidi adose ya? Mì kota, Miri adre lavona be: drañano akodi kamu agole nole.

⁴ Aii dreki njizo, dreki dongemva kušuzo a’i jotile amvelese lati balea; aii dre triza.

⁵ Dia arukaba adrelepi nale dii dreki taza aiidri, Mì adre ado o ya dongemva trira’a?

⁶ Aii dreki taza aiidri, ngoro Yesu adre tale di tini: aii dreki lati fezo aiidri.

⁷ Aii dreki alizo dongemva be Yesu vuna; dre aikia bongo bazo amvona’a; adi dre lirizo drina.

⁸ Dia bi adreki aiiki bongo tajazo lati balea; arukaba dreki fekola toṅozo amvuase bale.

⁹ Dia lilepi dridri dii, dia lilepi velero dii, dreki lenzezo, ki di, Osana, beneditu kadre dia alilepi Mirini ruse di dri̱.

¹⁰ Beneditu kadre mataya alilepi amaki ata Dawidi adea dri̱: Osana, buna kuruna ambani.

¹¹ Adi dre šizo Yerusalemina, yekaluna, i kolebe mi i lagase di nga no o̱ei, kitu dre ndira’a ñanomvano adi dre fozo lile Betaniana mudri‐dri‐iri nii be.

¹² Kitu tudru dise, aii kafoki Betanialese di, tebiri o adini.

¹³ Dre malobia nora’a rararo febi be, adi ali, ngale i kokušuru malobilo’wa drina’a ya di; adi kali fendu di i kušu cere febie, lokia malobia dre ’azo di acadre ko.

¹⁴ Adi dre ta akozo, dre taza fedri; Ñano dia alo di koña ami lo’wa kona vuse kolia ko. Dia adi tayilepi dii dreki yiza.

¹⁵ Aii dreki acazo Yerusalemina: adi dre šizo yekaluna, dre dia adrelepi ngagi dii bazo ladrole, dia alilepi ngagi yekaluna dii be, dre mesa dia parata tifolepi diikia lizizo vudri, nga lirizo dii dia kobola gilepi diikia be;

¹⁶ adi le dia kodoro ledri Yekaluase ko.

¹⁷ Adi dre ta tadazo, dre taza aiidri, A tiši ta dre ko ya, ki di, A kozi ama jo jo ta ngozo Nzambe kandra di dia o̱ei diiki šuru. Mì adre o na jo kugukia rukebezo diro.

¹⁸ Koani dridri dii e dia tatišilepi dii be dreki yiza, dreki ta ndazo adini kizazo: aii dreki adini role roro dise, dialezolepi diiki lindri dre gale gaga dise adini ta tadale dise.

¹⁹ Kitu ko ndi di adi fo ba murungu diase kolia.

²⁰ Aii dreki lavura’a dribise aii noki malobia ’yodre komvualese.

²¹ Ta dre agazo Petero a, akodi dre taza adidri, Rabbi, mi no ka, malobia mi dre litrile di ’yodre.

²² Yesu dre ta akozo tale aiidri, ki di, Mì koka’i Nzambedri.

²³ Ma ta amidri pati dia angodi ya kota ta kira nidi dri̱, ki di, A tinga mi bele yi murunguna, akodi koka’i ta nidi ka̱ika̱i ai togona ko, koka’i ta i dre tale di kacaro; akodi kado ta nidi vele.

²⁴ Kadre nitini ma ta amidri pati, Tai o̱ei dii ado ta ya mì dre Nzambe ti zizo ngozo di, mì koka’i mì do ta nidi dre, mì kodoro ta nidi vele.

²⁵ Angutu ya mì dre adrezo ngole Nzambe kandra di, ta be amiki togona dia ru di, mì kotiza: amikia Ata adrelepi buna di kotizaro amikia takonji indi.

²⁶ Mì kotiza ko di, amiki Ata adrelepi buna di kotiza amiki ta konji ko.

²⁷ Aii dreki alizo todia Yerusalemina: adi dre tecira’a yekaluna koani dridri dii e, dia tatišilepi dii e, maligae be aii aliki adi vuna.

²⁸ Aii dreki taza adidri, Mi o ta nii mi la̱njila̱nji angodise ya? Adi ba ami mi la̱njile la̱njila̱nji ta nii o ya?

²⁹ Yesu dre taza aiidri, Ma lizi ami ta alo nise, mì kako ta tale ma ti, ma dre tazo amidri mi la̱njila̱nji angodise ya ma adre ta nii o di.

³⁰ Ta batisimo Yoane adea aši kurulese ya? ta diakia di ya? Mi kako ta tale ma ti.

³¹ Aii dreki ta lizizo aiki kofulease, ki di, Mà kota aši kurulese di adi kotaro, Mì ka’i adidri ko adose ya?

³² Mà kotaro, Ta diakia di e; aii ro dia nii roro, dia o̱ei pati aii dreki Yoaneni zile nabiro dise.

³³ Aii dreki ta akozo Yesu ti, dre taza, Mà ni ko. Yesu dre taza aiidri, Mi la̱njila̱nji angodise ya ma adre ta nii o di, ma ta amidri ko kani’a.