Marako 1 - Tandu tani adea ngoro ta tišile Marako tini. Tandu tani adea ngoro ta tišile Matayo tini.

¹ Ta kayu tandu tani adea Yesu Kristu Nzambeni Mva adea.

² Ngoro ta tišile nabi Yesayani bukua di tini, ki di, Mì no ka, ma mu dia maña, ma dre ta la̱zizo adi ti, Adi li dridri mi kandrale koledero ami lati lizo di.

³ Dia alo di ni kuli angalepi aṅbodrina di, ki di, Mì kolede Mirini lati lizo di, Mi ko’o akodia latii geagea.

⁴ Yoane ali akodi diaki abatisilepi aṅbodrina di, dre mando batisimo diaki togo alazo di adea ngizo, takonji tizazo dise.

⁵ Dia dreki afozo la’u Yudaya’a di ase o̱ei lile adi vuna, dia Yerusalemilese o̱ei dii be, adi dre abatisizo o̱ei yiandre Yoradenena, aiikia takonji a’ura’a.

⁶ Yoane dre kamelibi ašozo, dre kini izo i kipi, dre tombi ñazo apešu be.

⁷ I dre mando ngizo ki di, Dia alilepi ma vuse di amba ma ruse, ma su ta̱ndile akodia kamuka bago tri ko.

⁸ Ma abatisi ami yise dre; akodi kabatisi ami Teri Lolose.

⁹ Kadre nitini kitu na’etu di Yesu ali Nazaretalese Galilayana, Yoane dre adini abatisizo Yoradenena.

¹⁰ Drañano adi dre afora’a yialese i no bu šidre, Teri kobola tini dre ašizo adi dri:

¹¹ kuli dre afozo bualese, ki di, Mi ama Mva tašila di, Ma adre lenzele mi’a we.

¹² Drañano Teri dre adini drozo aṅbodrina.

¹³ Adi dre ayizo aṅbodrina kitu ñadiri; Setani dre adini litizo, adi dre adrezo kawa atra dii be, malaika adreki ta ozo adidri.

¹⁴ Tako aru Yoane dre di’a, Yesu dre alizo Galilayana Nzambeni tandu tani ngira’a,

¹⁵ dre taza, Lokia acadre, Nzambeni mataya o tai alizo, mì kala amiki togo, mì koka’i tandu tani di dri.

¹⁶ Dre lavura’a yitapara Galilayana’a di lagase, adi no Simona e adrupina Andarea be kimba bera’a yina, aii dre adrele kosia belepi diiro dise.

¹⁷ Yesu are taza aiidri, Mi kali ma vuse, ma kalaro ami dia belepi diiro.

¹⁸ Drañano aii dre kimbaniiki ta’izo, dreki lizo adi vuse.

¹⁹ Dre lira’a dridri ca, adi no Yakobo mva Zebedayo adea, Yoane adrupia be, aii liriki kaluṅbana kimbami be.

²⁰ Drañano adi dre aiiki zizo aii dre atana Zebedayoni ta’izo kaluṅbana adremakandrae be, aii dreki lizo adi vuse.

²¹ Aii dre lizo Kaparanaumana; drañano kitu sabiti adease adi dre šizo sinagogona, dre ta tadazo.

²² Aiiki lindri gaga adini ta tadale dise: adi dre ta tadale aiidri dise dia mi la̱njila̱nji di tini, dia tatišilepi dii tini ko.

²³ Drañano ago adrelepi sinagogona teri konji be di, dre trezo,

²⁴ ki di, Ma adre ado ta o mi be ya, mi Yesu Nazaretalese di? Mi ali amaki kiza ya? Ma ni mi, mi adi e, mi Dia lolo Nzambe adea e.

²⁵ Yesu dre adini ndrizo, ki di, Mi kagi, mi konga akodiase.

²⁶ Teri konji dre akodia ozo totrole kpekpe, dre trezo dradra, dre afozo akodi ase.

²⁷ Aiiki lindri dre gazo gaga o̱ei, kadre nitini aii adre aiiki ti lizi aiiki kofulese, dre taza, Nidi ado ya? Ta tadale todi di! Adi adre ta fe mi la̱njila̱njise teri konji dii dri̱, aii dreki akodia ta ozo.

²⁸ Drañano adi rubi dre la’uzo voase o̱ei, la’u Galilaya adease kuru.

²⁹ Drañano aii dre afozo sinagogoase aii dreki šizo jo Simonakia Andarea be di lena, Yakobo be, Yoane be.

³⁰ Adra Simona adea ayi dra be, rubana veve, drañano aii dreki tana taza adidri:

³¹ adi dre alizo, dre akodia ruzo dri̱kase, tingale kuru; rubana velepi veve di dre akezo akodi ruse, akodi dre ta ozo aiidri.

³² Yendrose, kitu ko ndi di, aii aliki dia dra fulepi dii be o̱ei adi vuna, dia daimona dreki rule dii be.

³³ Dia o̱ei ba murungu diase dreki rukebezo jotile.

³⁴ Adi dre dia bi dii tedrizo dra toa dii ase, dre daimona bi diiki ladrozo dia‐ase, dre ta logazo daimonadri ta akora, aii dre adini nile dise.

³⁵ Dribileti adi nga, dre afozo njile aṅbodrina, dre ngozo Nzambedri nale.

³⁶ Simona e, dia adrelepi akodi be dii be dreki lizo adi vuse.

³⁷ Aii dre adini kušuzo, dre taza adidri, Dia o̱ei adre ami nda.

³⁸ Adi dre taza aiidri, Mà koli ba azidii‐ase kuru, ma kongiro mando nale be: ma dre afole ta nidise dise.

³⁹ Adi dre šizo sinagogo aiikia dii lena la’u Galilayaa diase o̱ei, mando ngira’a, daimonaki ladrora’a.

⁴⁰ Karidia dre alizo adi vuna, dre ngozo adidri, dre kaya̱ti tizo adi kandra, dre taza adidri, Mi ko le di, mi kicoa ama lede.

⁴¹ Yesuni togo dre ti̱zo akodise, teji dri̱ka, dre akodia tabezo, dre taza akodidri, Ma le, a kolede mi wa.

⁴² Drañano kari dre akezo akodi ruse; akodia ruba lederu dre.

⁴³ Adi dre ta fezo akodidri, drañano dre akodia muzo lile.

⁴⁴ Dre taza akodidri, Mi kota tejia diadri ko, mi kodo lati lizo di, mi kotada mi koanidri, dre nga Mose dre togia tale di tefezo ami ruba ledele dise, tandu tadazo aiidri di.

⁴⁵ Akodi dre fozo, dre ta ni andu ngizo, dre taza la’ule we, kadre nitini Yesu kicoa šile ba murungu di‐a dia mise ko, adi adre amve vo aṅboro dii lena: aii dreki alizo adi vuna la’uase o̱ei.