Ñwaè' Mfaè' Ñgaâa Ntuu Jisoès 9 - Limbum New Testament

¹ Sol à m ku bii ce wɛpsi bèe ce a m ce dù àmbùu Tata Jisòs enɛ e be yʉshi wowèe. E m dù a yɛ tu nè ŋgǎa taŋshi taŋshì,

² a laa enɛ e fa ye ŋwà' tɛ e bo dù fa nè btu embe mndap mlǒo à rla' Dàmaskòs, e ka' dù yɛ bèe ce a ce jɛ̀r njep nduunjì Krâis, kɛ̀ yu mmbaŋrù ɛ, kɛ̀ yu bbyèŋge ɛ̀, e bo kur wowèe vʉ̀ àgho à rla' Jɛ̀rusalɛ̀m tɛ a bo sa' wowèe.

³ E ka' koni ŋwà' ce dù àgho dǔ bà' àtʉtʉ, rraa li ku lo a bap embe bùu a suu mbe yě ndù.

⁴ E gwe à nshè a yu' àmbò njèndoŋ ce làa nè ye enɛ̂, “Sôl, Sôl, à ce jar nè mɛ̀ njokɛ?”

⁵ E beesì enɛ̂, “Tatâ, a wɛ̀ nda?” E laa enɛ̂, “A mɛ̀ Jisòs ce à ce jar nè mɛ̀ nà.

⁶ Nàti mbekì du à mʉ̀ rla', tɛ a bo suŋ wɛ̀ yuu ce à be gèe.”

⁷ Bèe ce a wowèe a m ce dù, a m tɛɛ, a tʉr yuu làa ka'. Wowèe a m yu' àmbò njèndoŋ ce làa, a ke' ce yɛ ŋwɛ̀ ka'.

⁸ Sol à natì enjep nshè, a ka' mʉ̀'shi mmir, a ker ce yɛ buu ka'. A m koo ye à rkoo a du àgho à rla' Dàmaskòs.

⁹ E m cu à mnǒŋ btaar, a yɛ yuu ka', a ye yuu ka', a no yuu ka'.

¹⁰ Ŋwɛ̀ mò' ce e m ce dù àmbùu Jisòs à m ba à rla' Dàmaskòs, li rlii li ba enɛ Ànàniyàs. Tata Jisòs à m làa nè ye à rloo enɛ̂, “Ànàniyàs.” E beesì enɛ̂, “Tatâ, a mɛ̀ na.”

¹¹ Tata Jisòs à laa nè ye enɛ̂, “Nàti du njep nduunjì ce a too enɛ Kùyɛɛ nà, du mbe ndàp mbe Judàs, laa enɛ wɛ̌ kòŋ à ryɛ ŋwɛ̌ à rla' Tasòs ce li rlii li yu enɛ Sol nà. E ce gèe rloo sè'ni na.

¹² E ce gèe rloo wa'a, Nyʉ̀ à gee e yɛ ŋwɛ̀ mò' ce li rlii li yu enɛ Ànàniyàs àmbò e vʉ̀ a niŋ mbe ndàp a lɛ mmbo mbe yě ndù tɛ e bo yɛ buu.”

¹³ Ànàniyàs à beesì enɛ̂, “Tatâ, mɛ̀ yu' bèe a làa buu magòr se àmbò ŋwɛ̀ ca. Bèe a làa àmbò ku' buu bbebep ce e gèe nè yò běe à rla' Jɛ̀rusalɛ̀m.

¹⁴ E yu àfa sè'ni na wa'a, bèe ce a yu btu nè ŋgǎa taŋshi taŋshì a banì fa ye ŋger wɛɛ enɛ e vʉ koo bèe ce a ce loo nè wɛ̀, kur du àgho, fa mbe shaŋ.”

¹⁵ Tata Jisòs à laa nè ye enɛ̂, “Dù yo yu. E yu yà ŋwɛ̀ ce mɛ̀ ce tɛ e bo suŋ àmbò la rlii nè bèe enje jɛɛ, ba bkʉʉ, ker ba boo Isrɛ̀l.

¹⁶ Ku ba mɛ̀ ce m be dùŋshi ye ku' ŋgɛ' ce e be yɛ njo' la rlii.”

¹⁷ E ka' làa wa' mìsi, Ànàniyàs à natì a du a niŋ mbe ndàp, a lɛ mi mmbo mbendù Sôl, a laa enɛ̂, “Nfʉrǎ Sôl, Tata Jisòs ce e m yɛɛti à nduunjì ce wɛ̀ m vʉ̀ njo, à tuu mɛ̀ enɛ m vʉ gee tɛ à ker yɛ buu, ruusi nè Yʉ' Rara.”

¹⁸ E ka' làa wa' mìsi, yuu mo' ce yi m ba àmbò bbap nyor wa'a vi gweŋgèr ye enjep mmìr njà' mò'sir, e ker kɛ' a ce yɛ buu. E m nàti mbekì, a baptìr ye.

¹⁹ E ka' ye byee mìsi, yi ŋger yi kʉtì njo. E m cu à rla' Dàmaskòs a bèe ce a m ce dù àmbùu Jisòs nà à mʉ mnòŋ mo'.

²⁰ E m càasi nfè' ka'. E m niŋ à mndap mloo a ce fè'shi àmbò Jisòs, a ce làa enɛ̂, “E yu muu Nyʉ̀.”

²¹ Bèe wɛɛwɛ ce a m yu', a m bɛ̀ɛŋger sê, a laa enɛ̂, “Mbò ŋwɛ̀ ca yu ŋwɛ̀ ce e m ce ghèter à ryʉshi bèe ce a m ce loo nè Jisòs à rla' Jɛ̀rusalɛ̀m nà a? Mbò e vʉ̀ àfa tɛ e bo kèr koshi ŋgǎa rloo ca kur dù àgho dù fa nè bèe ce a yu btu nè ŋgǎa taŋshi taŋshì a?”

²² À ka' ba yi àmbò Sôl, e m ker misi a tap, a ce nàshi enɛ Jisòs à m ba Krǎis anà. Cena yi gee bfee vi jep Jus ce a m ce cu à rla' Dàmaskòs.

²³ Mnòŋ vi ka' càa àŋgoo, Jus a cutè, a fa mntaŋ a kɛ' a ce ròo mi mkùu.

²⁴ Bèe mo' a m suŋ Sol enɛ bèe a ce ròo mi mkùu. Wowèe a m ce kè'ni bcǔu ŋka' nèmootì ba nètʉ', tɛ a bo koo Sol yʉ.

²⁵ Yi ka' ba wa'a, yì bèe ce a m ce dù a yě mbùu a lor ye nètʉ', a lɛ njep ma ŋkàa mò', a torsi njǐ à wendù ŋka', a suusi njep nshè.

²⁶ E ka' dǔ bà' à rla' Jɛ̀rusalɛ̀m a koŋ à rba a bèe ce a m ce dù àmbùu Jisòs nà àbee. Wowèe wɛɛwɛ a m wɛp ye, njobè' wowèe a m byemi enɛ e yu mò' efa mʉ̀ bèe ce a m ce dù àmbùu Jisòs ka'.

²⁷ Geewa'a, Bànabàs à m lòr ye a du àgho mbe mʉ̀ ŋgǎa ntuu Jisòs. E m suŋ nè wowèe enɛ Sol à yɛ Tata Jisòs à nduunjì, Tata à laa nè ye. E m ker suŋ wowèe enɛ Sol à m fè'shi à rlii Jisòs, nè ntee-ŋwɛ̀ à rla' Dàmaskòs

²⁸ Sol à m ku ba àbee a wowèe, a ce jɛ̀r a wowèe à rla' Jɛ̀rusalɛ̀m.

²⁹ E m fè'shi à rlii Jisòs nè ntee-ŋwɛ̀. E m de' a Jus ce a m ce làa li Grêk, a sɛr mnsɛr a wowèe. Wowèe a m ce ròo à ryʉ ye.

³⁰ Bfʉr ca a ka' rìŋ wa'a, a lor ye a du àgho à rla' Sisàriyà, a ma'shi ye, e natì a du à rla' Tasòs.

³¹ Yi ka' ba wa'a ŋgǎa cor ce e m ba à ŋgǒŋ Judà wɛɛwɛ, ker ba à ŋgǒŋ Galèle ba à ŋgǒŋ Sàmarìyà a m cu nè cumʉnyaŋ-ŋwɛ̀, a tap foŋ. Wowèe a ka' ce wɛp Tata Nyʉ̀, Yʉ' Rara yi ce fa wowèe ŋger foŋ, cor à ku' à bèe.

³² Pità à ka' jɛ̀r à mʉ bdì' jɛɛ jɛ̀ɛ jɛɛ, a nati a du à rla' Lidà foŋ, tɛ e bo yɛ bèe Nyʉ̀ ce a m ba àfo.

³³ E ka' bà', a yɛ ŋwɛ̀ mo' ce li rlii li m ba enɛ Àniyàs. Yì ŋgʉ̀' nyor mò' à m kwe, e noŋ njep kèŋ yaŋ à bfè' waami.

³⁴ Pità à laa nè ye enɛ̂, “Àniyàs, Jisos Krǎis ce gèe tɛ à bo lùŋ; nàti mbekì, kupshi wo bkuu.” E m nàti mbekì njà' mò'sir.

³⁵ Bèe wɛɛwɛ ce a m ce cu à rla' Lidà ba mbo' Sharòn wɛɛwɛ, a m yɛ ye, a beeŋger a byemi nè Tata Jisòs.

³⁶ Ŋwɛ̀ mò' ce e m ce dù àmbùu Jisòs à m ba à rla' Jopà. Li rlii li m ba enɛ Tàbità; mbùu efa rlii anà à ba enɛ Ŋgap. E m ce gèe buu bbòŋboŋ sê, a ba mmbo mtoo.

³⁷ E m lò a yaŋ, a kwe. A ka' sù'si ye, a lɛ mbe rum ndàp yì embekì.

³⁸ Rla' Jopà li ku ba àtʉtʉ rla' Lidà. Bèe ce a m ce dù àmbùu Jisòs a ka' yu' enɛ Pità yu à rla' Lidà, wowèe a tuu bèe a mmbaa enɛ a du laa nè ye enɛ̂, “Kyer wɛ̀, vʉ̀ cɛrcɛr, vʉ yɛ wèr.”

³⁹ Pità à natì a du a wowèe. E ka' dǔ bà', a lor ye a du àgho mbe rum ndap yì embekì nà. Byepkʉʉ wɛɛwɛ a m tɛɛ a yě geŋ, a ce war, a ce dùŋshi bcɛ̀' njɛ̀ɛ jɛɛ jɛ̀ɛ jɛɛ ce Dokàs à m tar à nfè' ce e m bii ntèe.

⁴⁰ Pità à m fʉr wowèe wɛɛwɛ njepmbè a gʉ'shi a loo; a karsi nyor a ke' gʉ̌ʉ ŋwɛ̀, a laa enɛ̂, “Tàbità, nàti mbekì.” E m mʉ̀' mi mmir a ka' yɛ Pità, a nati a cu mbekì.

⁴¹ Pità à ghashì ye à rkoo, a naa mbekì, a kɛ' bèe Nyʉ̀ ker ba byepkʉʉ, a fa ye nè wowèe ntèe.

⁴² Běe à rla' Jopà wɛɛwɛ a m yu', bèe magòr efa wǎp mʉ a byemì nè Tata Jisòs.

⁴³ E m cu à rla' Jopà à mnòŋ àŋgoo a Saimʉ̀n ŋwɛ̀ yaati mŋgǔp nyàa.