Ñwaè' Táèsaèlonikaè Ce Embenjïì 3 - Limbum New Testament

¹ Bfʉr wâ, wèr ce làa nè wèe àlʉ̀simbùu enɛ wèe loo nè wèr. Loo nè enɛ blàa àmbò Tata vi du à ŋgòŋ cɛrcɛr tɛ bèe a byemi ce yu'ni nè Nyʉ̀ àmbò wèe à m byemi a ce yu'ni nà.

² Loo nè foŋ enɛ Nyʉ̀ fʉr wèr embà mmbo ŋgǎa bsàrbuu. Wèr ce làa wa' njobè' bèe wɛɛwɛ a ce byemi blàa ca ka'.

³ Ka' yi yu wa'a, Tata Jisòs yu ŋwɛ̀ mini. E be fa wèe ŋger, kè'ni wèe ese Satàn ce e yu ŋwɛ̀ bsàrbuu.

⁴ À ka' ba njo' yì mini ca wèr à byemi enɛ wèe ce gèe buu ce wèr à suŋ wèe, kù ce gèe ba vi à nfè' wɛɛwɛ.

⁵ Tata Nyʉ̀ beesi wee mntee tɛ wèe riŋ njɛ̀ɛ rkòŋnì ce e tʉr nè wèe, kèr rìŋ njɛ̀ɛ ŋkur ntee ce Jisos Krǎis tʉr.

⁶ Bfʉr wâ, wèr ce cìisi nè wèe à rlii Tata Jisos Krǎis enɛ nfʉr mò' ka' ba a wěe mʉ ce e ce kòŋ à rfà' ka', a ce cu àmbò wèr à m yɛ'ni wèe enɛ wèe cu nà ka', wèe wowèe fa kar ka'.

⁷ Wee wèe rìŋ enɛ wèe à ba gèe ba ŋgèe ce wèr à m ce gèe. Wèr à m ba a wěe mʉ a ce koosi bbor ka'.

⁸ Wèr à m ye yuu mo' a buu efa rlà' ka'. Wèr à m ce fà' ce lì'mi nètʉ' ba nèmootì fà dì' wèr bo ba ntɛ̀r nè ŋwɛ̀ mò' ka'.

⁹ Wèr à m ce gèe wa'a yi ke' ba enɛ wèr à m buu ŋger à rlàa enɛ wèe ja' wèr ka'. Wèr à m gèe wa'a tɛ wèe bo yɛ'ni, ce fà' àmbò wèr à m ce fà'.

¹⁰ Wèr à m làa nè wèe à nfè' ce sèe à m ba nà wɛɛ enɛ ŋwɛ̀ ka' tɛ fà' ka', e fa ye ka'.

¹¹ Wèr ce làa wa'a, njobè' wèr à yu' enɛ bèe mò' efa wèe a yu bbor. Wowèe a kòŋ à rfà' ka' a ce kar a ce jepsi ba ntà'tè bèe mò'.

¹² Wèr ce cìisi a ker ce bu' mmbo nè bèe anà à rlii Tata Jisòs Krǎis enɛ wowèe a cu à nshè ce fa' tɛ a bo tʉr yuu ye.

¹³ Bfʉr wâ, wèe fa sɛ̀ à rgèe yuu bòŋboŋ ka'.

¹⁴ Ŋwɛ̀ mò' ka' kani à rgèe yuu ce wèr à saŋ nè wèe na, wèe fyɛ' ŋgàŋ bòŋboŋ. Wèe fa tʉr yuu mo' à rgèe wèe ŋwɛ̀ anà wèe ka' tɛ e bo ghàani.

¹⁵ Ka' yi yu wa'a, wèe fa lòr ne ye à ŋwɛ̀ bbàa ka'. Cep nè ye ba àmbò nfʉr wèe.

¹⁶ Tata ce e ke fa sèe cumʉnyaŋ, fa wèe cumʉnyaŋ ca à nfè' wɛɛwɛ, ka' à ba koni kɛ koni wèe ɛ̀. Tata ba a ŋwɛ̀ wɛɛwɛ efa wěe mʉ.

¹⁷ Rcà'nì ca à saŋ mɛ̌ Pol nè ya bo. Mɛ̀ ku saŋ àmbò mɛ ke saŋ mbe wa mŋwà' wɛɛwɛ nà, tɛ wèe bo rìŋ enɛ à saŋ mɛ̀.

¹⁸ M ce loo mɛnɛ Tata Jisos Krǎis tʉr wèe à ntee bòŋboŋ.