Ñwaè' Táèsaèlonikaè Ce Embenjïì 2 - Limbum New Testament

¹ Bfʉr wêr, à ka' ba àmbò rvʉ̀ Tata Jisos Krâis, ker ba nfè' ce sèe Jisòs wèe be tarte, wèr ce làa nè wèe enɛ,

² ntee yi fa yàŋse bu' wèe, kɛ̀ wèe fa yàŋse tù'te njobè' bèe mò' a ce làa enɛ nòŋ Tata anà yi yu àtʉtʉ ka'. Seemò' kɛ̀ à làa ŋwɛ̀ ce e ce suŋ bèe buu ce Yʉ' Rara yi gèe e riŋ ɛ̀, kɛ̀ ŋwɛ̀ ce e ce fè'shi ba blǎa Nyʉ̀ ɛ̀, kɛ̀ bèe mo' a ce làa enɛ wèr à saŋ ŋwà' ɛ̀,

³ wèe fa mà'shi tɛ ŋwɛ̀ mò' bo' wèe ka' à njɛ̌ɛ kɛ ka'. Tɛ nòŋ ca yi ka' ba, ntèetu ce àlʉ̀simbùu be ba, tɛ ŋwɛ̀ ce e bàa Krǎis vʉ̂. Ca yu ŋwɛ̀ ce e bʉ yi wɛɛ.

⁴ E be nàa tu enɛ e càa buu wɛɛwɛ ce bèe a ce gʉ'shi àgho enɛ a Nyʉ̀. E gèe wa'a, du niŋ mbe Ndàp Nyʉ̀, cu mbo, lor yi tu enɛ a ye Nyʉ̀.

⁵ Mbò wèe bii kuushi enɛ à m ba mbe nfè' ce sèe à m ba nà, mɛ̀ suŋ wèe buu ca a?

⁶ Wèe à rìŋ yuu ce yi gèe enɛ ŋwɛ̀ anà fa vʉ̀ sè'ni ka', tɛ e bo lò vʉ̀ ba à nfè' yì.

⁷ Bsàrbuu vi yu àgho wɛɛ, a ka' ba ba à bsʉ̀ti. Ŋwɛ̀ ce e gèe bsàrbuu anà vi ke' ce yɛɛti àwaŋ ka' yu àgho. Be ba à nfè' ce a fʉr ŋwɛ̀ anà,

⁸ tɛ ŋwɛ̀ bsàrbuu ca yɛɛti àwaŋ. E yɛɛti àwaŋ tɛ Tata Jisos Krǎis lo vʉ̀ nè ŋger-ŋwɛ̀, fyɛp ye nè mbɛp, tɛ e kwe, mìsi bʉ à nòŋ anà.

⁹ Ŋwɛ̀ bsàrbuu anà be vʉ̀ nè ŋger ce yi lò ese Satàn, gèe ku' mncòo ba buu bbɛ̀ɛ ce bo' bèe àgho enɛ a ku'si ye.

¹⁰ E be gèe ku' buu gòr se tɛ e bo bo' bèe ce a ce bʉ àgho. Wowèe a ce bʉ njobè' a m kani à rkòŋ mini ce e m ba gèe tɛ wowèe a lûŋ.

¹¹ À ka' ba njobè' wowèe a m kòŋ mini ca ka', Nyʉ̀ ce gèe wowèe a ce jep, a ce koŋ ba mnde'.

¹² Nyʉ̀ ce gèe wa'a, tɛ mnsa' mi bo koo bèe ce a byemi yuu mini ka', a ce yu' yap rbòŋ ba nè bsàrbuu.

¹³ À ka' ba yi àmbò wèe, bfʉr wêr, Tata Nyʉ̀ à kòŋ wèe. Yu yer dì' à ryòŋshi Nyʉ̀ à njɛ̀ɛ bèe ce wèe yu njobè' Nyʉ̀ à m ce wèe efa rkɛ̀' tɛ wèe bo koni ryòŋ. Wèe à m koni ryòŋ ca njì enjep yʉ' Nyʉ̀. Yi m gèe wèe à ba brara, ker byemi blǎa mini ce wèe à m byemi àgho.

¹⁴ Nyʉ̀ à m kɛ' wèe, wèe à konì ryòŋ ca à nfè' ce wèr à m fè'shi Nsuŋ Mbòŋmboŋ nè wèe nà. E m kɛ' wèe tɛ wèe bo sa' fòo ce yu fòo Tata Jisòs.

¹⁵ Yi ka' ba wa'a bfʉr wêr, tɛɛ nè tatap, ku lɛ ba ryɛ'nì ce wèr à m yɛ'ni wèe a ker saŋ nè wèe nà nje tù.

^16-17 Tata Jisos Krǎis ba Nyʉ̀ ce e yu yìsèe Tâ, fa wèe cumʉnyaŋ. Nyʉ̀ à m kòŋ sèe a fa sèe ŋger nfesè, a ker ka'ni sèe buu ce sèe à rìŋ enɛ vi be ba. E m gèe buu ca njo' yi ntee bòŋboŋ ce e m tʉr nè sèe. M ce loo mɛnɛ Nyʉ̀ ca fa wèe cumʉnyaŋ, gee tɛ wèe tɛɛ tatap, ce gèe ba buu bbòŋboŋ kèr ce làa ba buu bbòŋboŋ.