Ñwaè' Beâe Koreèn Ce Embenjïì 9 - Limbum New Testament

¹ Mbùu mò' ker ba àgho nè mɛ à rsaŋ nè wèe kuu rfa ce wèe à ba fa tɛ a bo jà' bèe Nyʉ̀ àgho nà ka'.

² Mɛ̀ rìŋ mɛnɛ wèe à tami nyor a ce lu'shi à rjà' wowèe. A mbùu ce m ce nàa tu nè wèe à bsii bèe Nyʉ̌ à ŋgǒŋ Mɛ̀sɛ̀donìyà mɛnɛ wèe ce běe à ŋgǒŋ Àkayà à m tami nyor à rfa kɛ' ha' ŋgàani. Ye ntee ce wèe à tʉr à rfa yuu yi gèe bèe magòr efa wǎp mʉ a koŋ à rfa foŋ.

³ M ku ce kòŋ à rtuu bfʉr ca nè wèe tɛ nàatu ce wèr ce nàa nè wèe nà bo bʉ à cicì ka'. M ce tuu wowèe tɛ wèe bo tami nyor àmbò mɛ̀ m làa nà,

⁴ njobè' m ka' vʉ wèr bèe mo' e à ŋgǒŋ Mɛ̀sɛ̀donìyà, wowèe a vʉ yɛ enɛ wèe à tami nyor ka', rìtu yi koo wèr. Rìtu yi ka' koo wèr, yi ba ekɛ àmbò wèe ce wèr à lɛ̀ ntee njep wèe.

⁵ A mbùu ce mɛ̀ m kwà'shi mɛnɛ m loo bfʉr ca tɛ wowèe a du entombì yɛ wèe, tɛ a bo baashi rfa ce wèe à m kà'ni à rfa na mbe dǐ' mo'sir tɛ m ka' vʉ̀. Wèe à ka' gee wa'a, yi duŋshì enɛ wèe à fa njobè' wèe à kòŋ à rfa ke' ba njobè' a tàa wèe tàa ka'.

⁶ Kuushi nè enɛ ŋwɛ̀ ce e ka' bye mʉcàr banɛ ŋgàŋ be kep mʉcàr, tɛ ŋwɛ̀ ce e byè gòr kep gòr.

⁷ Ŋwɛ̀ wɛɛwɛ fa àmbò e kwà'shi enjep yě ntee à rfa. E fa, e fa ce de'ŋger kɛ̀ fa njobè' a tàa ye tàa ka' njobè' Nyʉ̀ kòŋ ŋwɛ̀ ce e ce fa nè rlu'shì-ŋwɛ̀.

⁸ Nyʉ̀ tʉr ŋger à rghòni wèe gòr sê, tɛ wèe ke' buu yuu mo' à nfè' mò' ka', tɛ wèe bo lòr buu anà gèe mfǎ' mmbòŋmboŋ àgho.

⁹ Yi yu àmbò a saŋ mbe Ŋwǎ' Nyʉ̀ enɛ̂, “E lɛ̀ mi mmbo mtoo nè ŋgǎa fùp, yi ŋgěe bòŋboŋ yi ce kupse à nfè' mò' ka'.”

¹⁰ Nyʉ̀ ce e ke fa ŋgʉ̀ buu nè ŋwɛ̀ rbyè, ker fa yuu ye, be fa wèe ku' ŋgʉ̀ buu, gèe tɛ ye ŋgěe bòŋboŋ yi fa sɛ' gòr.

¹¹ E be gèe tɛ wèe tʉr buu gòr à nfè' wɛɛwɛ, ba mmbo mtoo a nfè' wɛɛwɛ tɛ bèe magòr a bo yòŋshi Nyʉ̀ njo' le rfa ce wowèe a ce koo ese wèr.

¹² Rfà' ce wèe ce gèe na li ce jà' bèe Nyʉ̀ ce a buu yuu, a ker ce gèe bèe magòr a ce yòŋshi Nyʉ̀.

¹³ Wèe à ka' gee njɛ̀ɛ rfà' ca, banɛ wèe ce dùŋshi bèe njɛ̀ɛ bèe ce wèe yu. Bèe a be yɛ, kù'si Nyʉ̀ njobè' wèe ku ce gèe ba buu ce wèe à làa àmbò Nsuŋ Mbòŋmboŋ kuu Jisos Krâis.

¹⁴ A be yòŋshi ye foŋ njobè' wèe yu mmbo mtoo nè wowèe, ker ba nè bèe wɛɛwɛ.

¹⁵ Sěe yòŋshi Nyʉ̀ à ku' li rfa ce àde' sèe tʉr cùu à rsuŋ ka' nà.