Dokʉ̈ Timotë INTRO1 - Mbëtï Ndjapä: TÄFO MADƗ̈Ndöndö pö pâ Dokʉ̈ mbëtï ndə̂ Pôlo mbô rə̂ sə̈ Timotë Mbëtï âtə wätə̂ Dokʉ̈ mbëtï ndə̂ Pôlo mbô rə̂ sə̈ Timotë. Pôlo rö alême atə̂ Lîsetere losə̂ bïchuû wrʉ̂ ndə̂ yê ndə̂kə̂ mu Tchôtchô Pö. Tchâme kä ndə̂ Timotë mbô gö tâ. Tche gâmba pö ndə̂ Pôlo ânyë kə̈ zâ su yê sə̈ Krîsiti (Nyë dɨ̈ Abdj 16.1-3). Tche päla la tchë tə̂ gbölösə̂nə̈ lə̂kə̂ mu pö ndə̂ Krîsiti, ânyë kə̈ mbô ndjë kua balë la tchë. Ndə̂ Pôlo la Timotë mbô ngâ wrʉ̂ balë atə̂ Ëfêze, andjë wûn rə̂ pä apö kä lə̂ a-Egilîze tə̂ gbölösə̂nə̈. Angâ a-earə̂ kə̂ nyisə̂ rə kä lakə̂ nyisə̂ angbongbo apö ndə̂ âwâ ngbî tə̂ Tchôtchô Pö. Ädə̈ käko ânyë Pôlo jî azü bïchuû ndə̂ andjë sə̂ tə̂ küma azü ndə̂ andjë nyisə̂ ngbongbo pö lâme lə̂ Egilîze nə̈-ê, kə̈ gbôtə̂ Timotë tchâme ânyë kə̈ ê atə̂ Mäsëdöâne. Pôlo sə̈ bhâ Mäsëdöâne ânyë kə̈ mbô mbëtï âtə sə̈ Timotë ndə̂kə̂ kä za gbôgbô tə̂ su yê, ndjë la azü ndə̂ Krîsiti ndə̂ andjë sə̂ bhâye. Pôlo tö rə̂ sə̈ Timotë ndə̂kə̂ pa tche kitə̂ köbo tə̂ azü ndə̂ andjë nyisə̂ angbongbo pö, ndjë tche wä ndə̂kə̂ kra tü azü ndə̂ Krîsiti, ânyë la andjê gbo tə̂ azü käko ndə̂ andjë nyisə̂ rə ndə̂ âwâ ngbî tə̂ Tchôtchô Pö. Tche tö ndjë rə̂ sə̈ tchë ndə̂kə̂ pa tche nyisə̂ nə̈ sə̈ azü ndə̂ Krîsiti, köbo ndə̂kə̂ mbotə̂ andjê lə̂ a-Egilîze, ndjë la köbo ndə̂ andjë rʉa tchə̂lə̂ a-earə̂ kə̂ sə tə̂ küma a-Egilîze ndə̂ andjê. Pôlo zä ndjë wängö sə̈ Timotë ndə̂kə̂ pa tche kpokpo tə̂ yê, kə̂ sə kpôtə̂ kua ndə̂ Ndjapä zâ rə̂ sə̈ tchë lâme. Mbëtï âtə krʉ̈ tchə̂lə̂ tə̂ yê kâkë: Kə̂ po ndə̂ azü: (1.1-2) Dju kə̂ mbo mbëtï nə̈: Kə̂ kitə̂ köbo tə̂ angbongbo a-earə̂ kə̂ nyisə̂ rə (1.3-20) Köbo ndə̂kə̂ sə ndə̂ azü ndə̂ Krîsiti: (2.1—4.5) Pôlo zä wängö sə̈ Timotë: (4.6—6.21) |
© Wycliffe Bible Translators, Inc.
Wycliffe Bible Translators, Inc.