Daniyeli 3 - IBAYIBOLO 2024

Nizya chifwani icha golide

¹ U mwene u Nebukadineza akapanga ichifwani icha golide, ubutali chikaba amamita 27, sona mububaba chikaba amamita matatu. Po akachisimika mwikombe ilya Dula muchisu icha Babiloni.

² Po u mwene u Nebukadineza akabitizya abalaghili na balongozi aba muvigaba na makambala nabamanyisya amahala nabasunga ichuma sona na balongi abasongo na balongi abanandi sona na makambala ghosi agha muvigaba ukuti bize ku lusekelo ulwa kuchipaghulila ichifwani chila.

³ Po abalaghili na bimilili aba muvigaba na makambala, abantu abamanyisya amahala na basunga indalama na balongi na balongi aba mutwaya sona na balongozi bosi aba muvigaba bakiza kulusekelo ulwakuchipaghula ichifwani chicho u mwene u Nebukadineza akachisimika nukwimilila pantazi pa chifwani chilachila.

⁴ Intumi yikafumusya yikati, “Mwee bantu bosi, naba inko zyosi nuluko sona na baneno izyakulekanalekana!

⁵ Nanti mwivwa bulo ukulila ukwa lipati na malongi na mapango ni vinanda ni ng'oma ni visekeseke sona ni vyakwimbila vyosi ivyakulekanalekana, mufughamaye pasi pakuchiputa ichifwani icha golide, chicho u mwene u Nebukadineza akachisimika.

⁶ Nanti umuntu yumo atakufughama pasi nukuchiputa ichifwani chinichi, akwiza pakusumbiwa mumoto uwa muvuno.”

⁷ Po bo bivwa bulo ukulila ukwa lipati na malongi na mapango ni vinanda ni ng'oma ni visekeseke sona ni vyakwimbila vyosi ivyakulekanalekana abantu bosi naba inko zyosi nuluko losi sona na baneno izyakulekanalekana, bakafughama pasi nukuchiputa ichifwani icha golide chila, chicho u mwene u Nebukadineza akachisimika.

⁸ Pakabalilo kalakala abantu bamo aba mu Babiloni bakalwaghilapo ulusako ulwakubasamulila aba Yuda.

⁹ Bakamubuzya u mwene u Nebukadineza bakati, “Wee mwene tukukulondela ubumi ubutali!

¹⁰ Wee mwene, wabika ululaghilo ulwakuti nanti umuntu wesi ivwa bulo ukulila ukwa lipati na malongi na mapango ni vinanda ni ng'oma ni visekeseke sona ni vyakwimbila vyosi ivyakulekanalekana afughamaye pasi pakuchiputa ichifwani icha golide

¹¹ sona nukuti nanti umuntu wesi atakufughama pakuchiputa akwiza pakusumbiwa mumoto uwa muvuno.

¹² Loli balipo aba Yuda bamo, babo ukabasala ukuti babanje balaghili aba muchisu icha Babiloni, kokuti u Shadilaki nu Meshaki sona nu Abedinego. Wee mwene, abantu banaba batakulukonka ululaghilo lwako, sona batakubabombela abachala bako pamo ukuchiputa ichifwani icha golide, chicho ukachisimika.”

¹³ U mwene yula akakalala nkani umwakuti akamwitizya u Shadilaki nu Meshaki, sona nu Abedinego, po bakiza pamaso pa mwene.

¹⁴ U Nebukadineza akabalalusya akati, “Nkimba momumo ukuti we Shadilaki nu Meshaki, sona nu Abedinego mutakubabombela abachala bane, pamo ukuchiputa ichifwani icha golide chicho nkachisimika?

¹⁵ Losi ulu nanti mwivwa bulo ukulila ukwa lipati na malongi na mapango ni vinanda ni ng'oma ni visekeseke sona ni vyakwimbila vyosi ivyakulekanalekana, chingaba chiza nkani ukuti mufughamaye pasi pakuchiputa ichifwani chicho nkapanga. Loli nanti mutakuchiputa, mukwiza pakusumbiwa lubilolubilo mumoto uwa muvuno. Po nkimba chala wenu yuyo akwiza pakubapoka munyobe zyane?”

¹⁶ U Shadilaki nu Meshaki, sona nu Abedinego bakamwamula u mwene yula bakati, “Wee mwene, tutabaghiye pakwiyimila twebene panongwa yiniyi.

¹⁷ Nanti twasumbiwa mumoto, u Chala yuyo tukumubombela angatupoka ku moto uwa muvuno, sona na munyobe zyako.

¹⁸ Loli nanti u Chala witu yunuyu atakutupoka, pope bulo uzimanye ukuti tutakwiza pakubabombela abachala bako pamo ukuchiputa ichifwani icha golide chicho ukachisimika.”

¹⁹ U mwene yula akamukalalila nkani u Shadiliki nu Meshaki nu Abedinego, sona akakalala nkani ukuchila pakwanda pala. Po akalamula ukuti bapembe umoto uwa muvuno akaseveni ukuchilapo,

²⁰ sona akabalamula abasilikali bache bamo abamaka nkani ukuti bamupinye u Shadiliki nu Meshaki nu Abedinego nukubasumbila mumoto uwa muvuno ghula.

²¹ Po abantu banaba bakapinyiwa, bo bavwalite inkazo zyabo, na mashati amatali, ni vipewa, sona na menda aghanji nukusumbiwa mumoto uwa muvuno ghula.

²² Ululaghilo ulwa mwene lukaba lwalubilolubilo, sona umoto uwa muvuno ghula ghukaba wakocha nkani, umwakuti indimi izya moto zikabaghogha abasilikali, babo bakamunyamula u Shadilaki nu Meshaki nu Abedinego.

²³ Po u Shadilaki nu Meshaki nu Abedinego bakawila mumoto uwa muvuno ghula bo bapinyiwe.

²⁴ Po u mwene u Nebukadineza akaswigha nkani, sona akanyamuka lubilolubilo nukughalalusya amakambala ghache ukuti, “Nkimba tutabapinyite abantu batatu bala nukubasumbila mumoto uwakulungulizya?” Bakamwamula bakati, “Wee mwene, momumo.”

²⁵ U mwene yula akati, “Ennya nkubennya abantu folo bakwendakwenda mumoto bo basatuliwe, sona batavulaye napo panandi. Umuntu wafolo akuboneka ngati po mwana uwa bachala.”

²⁶ Panapo na panapo u mwene u Nebukadineza akapalamila kumulyango ku moto uwa muvuno ghula nukwitizya ukuti, “Mwe babombi aba Chala uwakumwanya nkani, Shadiliki nu Meshaki nu Abedinego, epamo! Zagha kuno!” U Shadilaki nu Meshaki nu Abedinego bakepamo mu muvuno ghula.

²⁷ Po abalaghili na balongozi aba muvigaba, na makambala na babo bakamanyisyanga u mwene amahala bakabungana poka. Abantu bala bakennya ukuti umoto ghutaghavulazizye amabili ghabo pamo isisi zyabo pakuba ni chimanyilo chimo, zyope inkazo zyabo zitakapya, sona batakanunkapo ilyosi napo panandi.

²⁸ Po u Nebukadineza akati, “Apaliwanje u Chala uwa Shadiliki nu Meshaki nu Abedinego, yuyo amutuma uwantumi wache pakubapoka ababombi bache! Bakamusubila u Chala nukulusulannya ululaghilo ulwa mwene, sona bakiyannya pakwiyipa ubumi bwabo bosi ukuti bamubombelaye u Chala wabo nukusita ukuti bamubombelaye pamo ukumwiputa uchala uyunji.

²⁹ Polelo nkudumula ukuti nanti balipo abantu aba inko yimo nuluko pamo ineno iyakulekanalekana, yikumusamula u Chala uwa Shadiliki nu Meshaki, sona nu Abedinego, yidumuliwanje mutuvigaba, sona yope ni nyumba yabo yimongoliwanje, pakuti atalipo uchala uyunji yuyo angapoka ngati bunubu.”

³⁰ Po u mwene yula akamukwezya u Shadiliki nu Meshaki, sona nu Abedinego, pakuba bo basongo aba chisu icha Babiloni.