YOELI 3 - IBIBILIA INDAKATIFU MU LUTIRICHI LWITAKHO NENDE LWISUKHA

Nyasaye Alakhalachila Vandu vi Tsimbia Tsindi

¹ Mwami Nyasaye avoolanga, “Khulitukhu lienelo, mu tsinyinga tsienetso, niitsa khukalushitsila Yuda nende Yerusalemi miandu chiavo.

² Niitsa khulaanga halala vandu vi tsimbia tsiosi nu khuvahila mu Luhoongo lwa Yehoshafati. Niitsa khuvakhalachila nivaliyo, shichila ka vakholela vandu vaanje Israeli, nivali khuli miandu chianje, lwa va vasalanyinya mu vandu vi tsimbia tsindi, nivakavula shivala shianje,

³ nivavukhanyinya vandu vaanje khuvirila khu ikura, nivakhuva ikura khu vandu vaanje. Vakuulitsa vaana vi shiyayi khuli varukwa khulu khurunga vakhali vakholanga vulaaya, ni vakuulitsa vaana vi shikhana khu vaheelwi idivai ya vamali ni vang'wetsanga.

⁴ “Munyi mataala ka Tiro nende Sidoni nende tsisomo tsiosi tsia Filistia, ni shina shia mwenyanga khukhola? Munyala khuva muvanzanga ka nakhola? Niiva munyala khuva muvanzanga, niitsa khumusalilitsa khuvanzila vikholwa vienyu via mwakhola.

⁵ Mwavukula ifetsa yanje nende itsahabu, numurulitsa mu livishilu lianje liu vuhinda numuhila mu matempeli kenyu.

⁶ Mwakuulitsa vandu va Yuda nende Yerusalemi khu Vaguriki, khuvahila ihale wene khurula mu shivala shiavo.

⁷ Navutswa niitsa khuvwanyinya mulilu muvo khu valirula shia havundu hosi ha mwa vakuulitsa; khuvanzila ka munyi vene mwakhola.

⁸ Niitsa khukuulitsila vandu va Yuda vaana venyu vi shiyayi nende vi shikhana; navo valiitsa khukuulitsila Vasebia, nivali vandu vamenyanga ihale wene muno. Inzi Mwami Nyasaye mali khuvoola.

⁹ “Vooleli vandu vi tsimbia tsindi likhuva yili, Mwirecheshele liihe! Vwanyinyi mulilu mu vasikali venyu! Laanji halala vasikali khuroonjela khukwana.

¹⁰ Mwiraanyinyi machembe kenyu ki tsichilishi tsilimilanga khukwa vivavi; tsilutwa tsienyu tsiu khutsolela khukwa marimu. Mundu muteteshele aliitsa khuvoola, ‘Ninzi musikali.’

¹¹ Munyi vandu vi tsimbia tsia ha himbi, hambi vwangu, Mwakaniliyo. Mwami Nyasaye, kholomoshitsa vasikali vovo!

¹² “Vandu vi tsimbia tsindi virecheshe nivitsa mu Luhoongo lwa Yehoshafati; shichila naho ha inzi Mwami Nyasaye niitsa khwikhala khukhalachila vandu vi tsimbia tsindi tsiosi tsia hahimbi.

¹³ Nzitsanga khulunjishitsa ikhoni yanje, shichila litukhu liu khuchesa limali khutukha. Hambi vwangu! Vatuuvachi khuli matunda ki misabibu kaminwangwa; shichila vwina vwa vaminilamu vwa yitsula; vwina vwenovo vwasumeela, idivai isuundukhanga ilwanyi, shichila vutamanu vwavo nu vunyishi muno.

¹⁴ Vituma ni vituma via vandu vanyishi vali mu luhoongo lukhukhalachilwamu! Shichila litukhu liu Mwami Nyasaye aliitsa khukhalachila vandu lili himbi khutukha mu luhoongo lu khukhalachilwamu.

¹⁵ Liuva nende mweli via mwaminywa, tsinyining'ini tsialekha khwakha.

Nyasaye Aliitsa Khukasitsa Vandu Veve

¹⁶ Mwami Nyasaye ahuma humilanga khu Shikulu shia Sayoni; mwoyo kwekwe kuhulilikhananga Yerusalemi; likulu nende lilova vitechelanga. Navutswa Mwami Nyasaye ali khuli shivisilu shia vandu veve, khuli imbinga ya Vaisraeli.

¹⁷ “Nalwo lwa muliitsa khumanya ndi ninzi Mwami Nyasaye, uli Nyasaye wenyu; wumenyanga mu Sayoni, shili shikulu shianje shitakatifu. Litaala likali lia Yerusalemi liliitsa khuva litakatifu; vacheni valiitsa khuvula khukhalakanyila khandi mulio.

¹⁸ “Mumatukhu kenako, misala chi misabibu chiliitsa khumeela khu vikulu, tsing'ombe tsiliitsa khunyolekha khu shia rukulu rwosi; matsi kaliitsa khwitsula mu michela chiosi chia Yuda. Shirula shia matsi shiliitsa khurundukha mu Litempeli liu Mwami Nyasaye, khali Luhoongo lwi Minyenye luliitsa khwitsula matsi.

¹⁹ “Shivala shia Misri shiliitsa khukwa shiangalangwi, shivala shia Edomu shihangalale, shichila vandu vamenyayo vakwana shivala shia Yuda nivasuundula shisahi shia vandu vavula vutamanu vwosi mu shivala shiavo.

²⁰ Navutswa vandu valiitsa khumenya mu shivala shia Yuda mihika ni mihika, mu Yerusalemi khumatukhu koosi.

²¹ Niitsa khuvanzila shisahi shia vandu viirwa, shimbelela vandu vakhola vutamanu tawe; shichila inzi Mwami Nyasaye menyanga khu Shikulu shia Sayoni.”