LEVI 2 - IBIBILIA INDAKATIFU MU LUTIRICHI LWITAKHO NENDE LWISUKHA

Vihanwa vi Imu

¹ “Lwa mundu aliitsa khulera shihanwa shi imu khu Mwami Nyasaye, aliitsa khulera shihanwa shieshie shiu vusi vunyukhu. Aliitsa khutsukha khu shihanwa shienesho makura ku musayituni, nu khurakhu vubani.

² Namali khukhola kenako, aliitsa khushihila khu vaana va Haruni varumikhanga mu muhinzilu ku vusalisi. Musalisi aliitsa khuvukula vusi vunyukhu mu mukhono kwekwe, halala na makura nende vubani vwosi nu khuvusambila khu vwaali, khuli shihanwa shiu khusambwa khu Mwami Nyasaye. Mwayu kuhuunyanga nu kurula khu shihanwa khuli shienesho, kuyaanzitsanga Mwami Nyasaye.

³ Imu yindi yosi iliitsa khuva nirikale khu shihanwa shi imu, iliitsa khuva ya Haruni nende vaana veve vi shiyayi. Ni shitonye shitakatifu muno khu vihanwa vi viukhulia, via vahaananga khu Mwami Nyasaye.

⁴ “Niiva mundu aliitsa khurela shihanwa shiu mukati kwakandwa mulijiko liu mulilu, kuliitsa khuva mu vusi, kwalombwa vuchila mamela khandi shia tsukanyinywa makura; inoho khuva mukati mutinyu kwalombwa khu vusi vwa tsukanywa makura ku musayituni inoho visikuti viavekhwa makura ku musayituni.

⁵ “Niiva shihanwa shienesho shialombwa khu luchio, shilitsa khulombwa khu vusi vunyukhu vwa tsukanywa makura ku musayituni; navutswa vuchila mamela koosi.

⁶ Muliitsa khutong'ola mukati kwenoko mu vitonye, nu khusuundulakhu makura, lwa muliitsa khuhaana khuli shihanwa shi imu.

⁷ “Niiva shihanwa shienesho shiliitsa khuva mukati kwakandwa khu luchio, kuliitsa khuva nu kwalombwa khu vusi vunyukhu nende makura ku musayituni.

⁸ Muliitsa khulera mukati kwenoko, khuva khuli shihanwa khu Mwami Nyasaye. Muliitsa khuhila khu musalisi, naye aliitsa khukuvikha khu vwaali.

⁹ Musalisi aliitsa khuvukula shitonye shilala shiu mukati kwenoko, khuli shihanwa shimanyinyanga ndi kwosi kwahaanwa khu Mwami Nyasaye. Musalisi aliitsa khukusambila khu vwaali. Mwayu kuhuunyanga nu kurula khu shihanwa shi shiukhulia shienesho, kuyaanzitsanga Mwami Nyasaye.

¹⁰ Shihanwa shindi shiosi shiliitsa khurikala shiliitsa khuva shia vasalisi. Ni shihanwa shitakatifu shiene muno, shichila shiavukulwa khu shiukhulia shiali ni shiahaanwa khu Mwami Nyasaye khuvirila khu mulilu.

¹¹ “Shia shihanwa shiosi shi imu, shia muliitsa khulera khwinzi Mwami Nyasaye, shilitsa khuvula khulombwakhu na mamela koosi; shichila muvula vunyali vu khusambakhu nu mulilu mamela koosi inoho vushi vwi tsinzushi, khuva khuli shihanwa khu Mwami Nyasaye.

¹² Shihanwa shi shiraakwa shiukhuraanga khucheswa shia muhika kwosi, nikanyalikha shilitsa khuhilwa khu Mwami Nyasaye; navutswa shilitsa khuvula khusambwa khu vwaali, khuli mwayu kuhuunyanga nu kumuyaanzitsa.

¹³ Muliitsa khuviritsila mu munyu vihanwa vienyu vi imu viosi; shichila munyu nakwo shimanyilu shi lilakano hakari henyu nende Nyasaye. (Muliitsa khuvikha munyu khu vihanwa vienyu viosi.)

¹⁴ Lwa muliitsa khulera khu Mwami Nyasaye shihanwa shi shiraakwa shiukhuraanga khucheswa, muliitsa khuhaana imu yasihilwa nu mulilu inoho shiukhulia shiasielwa khu lichina.

¹⁵ Muliitsa khumeetakhu makura ku musayituni nu khurakhu vubani. Nashio shihanwa shi imu.

¹⁶ Musalisi aliitsa khusamba nu mulilu shiukhulia shienesho nende makura karumikha, khuli shihanwa shiu khwitsushitswa, khali vubani vwosi, khuli shihanwa shi shiukhulia khu Mwami Nyasaye.