DANIELI 6 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Danieli Yali mu Vwina vwi Tsisimba

¹ Mwami Dario yaviritsa khurovola vagavana imia indala na makhomi kavili khusinjilila muhinzilu shia havundu hosi mu shivala shieshie shia yamihanga.

² Yarovola khandi vimilili vavaka khusinjilila mihinzilu chia vagavana vakholanga, Danieli nali mulala khuvo khusinjilila makhuva koosi khulondokhana khu vwamihi vwevwe, khuvula khukoyana mulikhola mihinzilu chiechie.

³ Danieli yamanyinya havulavu ndi anyala khukhola muhinzilu mulahi khuvira vandi voosi nende vagavana. Khulwa yako, Mwami Dario yaloshitsa khumukhola khuva mwimilili wi shivala shieshie shiosi, shichila yali wacheliha mu muhinzilu khuvira vandu vandi voosi.

⁴ Vimililli vandi voosi nende vagavana vachelitsa khulola niiva shindu shitamanu shilikhuho khulondokhana khuli Danieli yakholanga muhinzilu mu vwami vwi shivala shienesho, navutswa vavulakhu shindu shitamanu shia vanyola; shichila Danieli yali musuuvilwa, khandi shindu shitamanu shivulakhuho shia yakhola inoho vukoyanu vwosi.

⁵ Nalwo lwa vandu venavo vavoola, “Shindu shivulakhuho shitamanu shinyala khukhukhola khuvoole Danieli nu mutamanu, nikakhali likhuva khulondokhana khu malako ka Nyasaye wewe.”

⁶ Vasimukha nivatsia khulola Mwami Dario. Vamuvavoolela, “Yivi Mwami Dario, uhindile!

⁷ Khutsi voosi, nu khuli vimilili vakholanga mihinzilu mu vwami vwi shivala shioshio -- vimilili, vagavana, halala na varumishi vandi voosi -- khuhuchilile ndi yivi Mwami Dario ulahaana lilako khandi likholwi shia havundu hosi. Uhaane lilako khumatukhu makhomi kavaka khwikalila shia mundu wosi khusaala khu nyasaye wosi, inoho khali khu mundu, nikakhali yivi Mwami Dario. Mundu uliitsa khwambakhana khulonda malako kenako, aliitsa khusiuvwa mu vwina vwitsulamu tsisimba.

⁸ Yivi Mwami Dario, nuyaanza uhaane lilako, khandi ure khu lilako lia wahandika lienelo kwokwo, khulu khuvula khukalukhanyinywa. Lilako lienelo lilalondokahan na malako ka Vamedi nende Vaperisia, khulu khuvula khuhinganyinywa.”

⁹ Khulwa yako, Mwami Dario yarakhu muhuli kwekwe nilikwa lilako.

¹⁰ Lwa Danieli yamanya ndi muhuli kumali khutuuywa khu lilako lienelo, yasimukha natsia ingo. Khwali na matirisha mu inzu yeye yi ikulu kali khuluveka lwa Yerusalemi. Yasikamaho imbeli wa matirisha kali nikikushi, manya lwa kwali mwiima kwekwe, khandi nasaala khu Nyasaye hali khavaka khulitukhu.

¹¹ Vandu vali nivaloshitsi khuli vanyala khukhola Danieli vinjilamu, nivamunyola nasaalanga khu Nyasaye wewe, amukholele ka yenyanga.

¹² Vasimukha nivatsia khu Mwami Dario khumuvoolela vindu vitamanu shichila Danieli khulondokhana khu lilako liali niliatuuywakhu muhuli. Vavoola, “Mwami Dario, nivi watuuya muhuuli kwokwo khu lilako ndi matukhu makhomi kavaka nikashili khuvwa, shia mundu wosi alivula khureevakhu vukhonyi khu nyasaye wewe, inoho khu mundu nikakhali khu yivi Mwami Dario; khandi ndi mundu uliitsa khwambakhana khulonda lilako lienelo, alasiuvwa mu vwina vwitsulamu tsisimba.”

¹³ Nalwo lwa vavoolela Mwami Dario, “Mulala khu vandu varula mu vuhaambe mu Yuda ulaangwangwa Danieli wayambakhana khukhuha yivi Mwami Dario luyali, inoho khulonda lilako lia watuuyakhu muhuli. Navutswa wamenya nasaalanga hali khavaka khulitukhu.”

¹⁴ Lwa Mwami Dario yahulila ndio, yanyakhana mu mwoyo, khandi nachelitsa khukhava khuli anyala khuhonyinya Danieli. Yatsililila khuchelitsa khuli anyala khumuhonyinya khutukha lwa liuva liali niliyeelanga.

¹⁵ Khulwa yako, vandi vali nivaloshitsi khuli vakhola Danieli vakalukha khu Mwami Dario. Vamuvoolela, “Mwami Dario, nivi wamanya ndi malako ka Vamedi nende Vaperisia kavoolanga ndi lilako liosi livulakhuho linyala khukalukhanyinywa, liu mwami avetsanga namali khuhaana.”

¹⁶ Nalwo lwa Mwami Dario yahaana lilako ndi Danieli akumilwi nu khusiuvwa mu vwina vwitsula tsisimba. Mwami Dario yavoolela Danieli, “Lekha Nyasaye wowo, wa wurumishilanga mu vusuuvilwa, akhuhonyinyi!”

¹⁷ Lichina lialerwa khandi nivakhunikha mu vwinjililu vu vwina. Mwami Dario yatuuya khulio muhuuli kwekwe ku vwami nende mihuuli chia vimilili vamukhonyanga muhinzilu mu shivala shieshie, khulu khwenya mundu khuvula khuhonyinyakhu Danieli.

¹⁸ Mwami Dario yakalukha mu inzu yeye yu vwami, nahonga mu vutukhu vwosi vuchila khulia; shiyikhoyelakhu shindu shiosi tawe. Khali tsindolo tsiakora mu tsimoni mwemwe.

¹⁹ Lwa vwali nuvwakhashia mu mavwevwe, Mwami Dario yavukha mu tsindolo, natsia vwangu ha vwina vwenovo.

²⁰ Lwa yatukha himbi khu vwina vwenovo, yalaanga nu mwoyo ku vuveleli, navoola, “Yivi Danieli, murumishi wa Nyasaye uli mwoyo! Nyasaye, wa wurumishilanga mu vusuuvilwa, ali nu vunyali vu khukhuhonyinya khurula mu tsisimba?”

²¹ Danieli yachipa, “Yivi Mwami Dario, uhindile!

²² Nyasaye yaruma injelosi yeye khwikalila minwa chi tsisimba; nitsivula khunumaka. Yakhola ndio, shichila yali wamanya ndi mbulakhu vutamanu vwosi imbeli wewe; khandi nali nishili khukhukholelakhu yivi Mwami Dario shindu shiosi shitamanu.”

²³ Khulwa yako, Mwami Dario yasangala khushila muno. Yahaana lilako ndi Danieli akhweseswi khurula mu vwina vwenovo. Lwa Danieli yakhweseswa khurula mu vwina vwenovo, imbala ivulakhuho yanyolekha khuye; shichila yali musuuvilwa khu Nyasaye wewe.

²⁴ Mwami Dario yahaana lilako; khandi vandu voosi vali nivalolela Danieli mwoyo mutamanu vakumilwa, nivasiuvwa mu vwina vwi tsisimba. Vo vasiuvwa mu vwina vwenovo, vaana vavo nende vakhali vavo. Khali nivashili khutukha mukari hasi mu vwina vwenovo, tsisimba tsiakwa khuvo, ni tsivalumaka.

²⁵ Mwami Dario yahandika tsibarwa khu vandu vi tsimbia tsiosi, vandu va makondo lukanu, khandi khu vandu valomolomanga tsinomonomo tsiosi lukanu. Yavavoolela, “Nyoli milembe minyishi!

²⁶ Mbananga lilako ndi shia mundu wosi mu vwami vwi shivala shianje khutukha ave naritsanga, khandi nahaananga luyali khu Nyasaye wa Danieli. Neye Nyasaye uli mwoyo, utsilililanga khuvaho mihika ni mihika. Vwami vwevwe shiuvutivitswa khali hati hene tawe. Liamiha lielie liliho khumatukhu koosi.

²⁷ Nyasaye arulitsanga mundu mu vutiinyu nu khumuhonyinya; akholanga viloleshitsu nende vindu viu khuchenyinya mwikulu nende khulilova, shichila neye wahonyinya Danieli khurula mu tsisimba.”

²⁸ Khulwa yako, Danieli yali muhinda mumatukhu ku Mwami Dario nende Mwami Kureeshi wa Perisia vamihanga.