DANIELI 5 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Belishazari Yakhola Mulukhu Kwililia kwekwe

¹ Litukhu lindi mu vutukhu, Mwami Belishazari yalombela vimilili veve iheelefu indala mulukha mukali kwi lilia; khandi nang'wa idivai navo.

² Lwa Belishazari yatsanzamakhu idivai, yahaana lilako ndi vindu vialombwa khu itsahabu nende ifetsa, via tata wewe Nebukadineza yali niyarulitsa mu Litempeli mu Yerusalemi vilerwi. Ye mwene nende vimilili veve, vakhali veve, halala na vakhali veve vamenyinywa vang'wele mu vindu vienevo.

³ Valeramu vindu vialombwa khu itsahabu nende ifetsa, viali niviarulitswa mu Litempeli lia Nyasaye mu Yerusalemi. Mwami Belishazari nende vimilili veve, vakhali veve, halala na vakhali veve vamenyinywa vang'welela mu vikombe vienevo.

⁴ Vang'wa idivai, khandi nivitsominya vanyasaye valombwa khu itsahabu, ifetsa, mukasa, shivia, musala, nende lichina.

⁵ Nonoho lwa vitere viu mukhono ku mundu vialolekha khandi nivaraanga khuhandika makhuva khwi lisisi li inzu yu vwami, khuluveka lundi lwi shikuru shi itaaha. Mwami Belishazari yalola mukhono kwenoko nu kuhandikanga.

⁶ Yakalukhana mumoni, navelela mu mwoyo, naraanga khutechela.

⁷ Yalaanjilila nu mwoyo mukali khulu khwenya vamulaanjile vakhumu, Vababilonia, valoochi, nende vacheli. Lwa vali nivakhinjilamu, Mwami Belishazari yavavoolela, “Mundu unyala khusoma mahandiko yaka khandi ambolele shia kavoolanga aliitsa khufwala tsikaanzu tsiu vwami tsia sambarau, yifwale matongolo kalombwa khu itsahabu mwing'ori mwemwe khulu khuheelwa luyali, khandi ave wa khavaka mu vwimilili vwi shivala shinu.”

⁸ Khulwa yako, vandu vu Mwami Nebukadineza vali nu vusitsa vitsa imbeli, navutswa shivali vanyala khusoma mahandiko kenako inoho khwivaalila Mwami Belishazari shia kavoolanga tawe.

⁹ Mwami Belishazari yahenda mwoyo muno khandi nakalukhana mumoni; khali vimilili veve vakoyana muno.

¹⁰ Lwa Muruchi wi shikhali yahulila makhuva ku Mwami Belishazari yalomoloma halala na vimilili veve, yinjila havundu ha vakholelanga mulukha kwi lilia. Yavoola, “Yivi Mwami Belishazari, uhindile! Shichila shina tsinganakani tsikhusalilitsanga, khali ni tsikhumwaminya?

¹¹ Mundu wamenya mu shivala shioshio shia wamihanga, wa roho wa vanyasaye vatakatifu yinjila muye. Lwa tata wowo Nebukadineza yamihanga, mundu mwenoyo yamumanyinya vindu vilahi viu khukhola, namuha vucheli, khandi namuha vusitsa khuli vusitsa vwa vanyasaye. Tata wowo Nebukadineza yamukhola khuva mwimilili wa valakuli, vakhumu, valoochi nende Vababilonia.

¹² Mundu walaangwangwa Danieli, wa Mwami Nebukadineza yakulikha lira Beletishazari, yali wamanyikhana khuva nu mwoyo kwi likhola muhinzilu, vucheli nende limanya, khandi yali ni shihanwa shiu khuvoola shia malooro kavoolanga, khwivaala makhuva ki tsinganu tsivoolanga, nu khukhonyana khumala vutiinyu. Nuyaanza ruma nunundi mundu atsi khulaanga Danieli, naye alakhuvoolela shia kavoolanga.”

Danieli Yamuvoolela shia Makhuva Kenako Kavoolanga

¹³ Khulwa yako, vasimukha nivatsia khulera Danieli khumuhila khu Mwami Belishazari; ma Mwami Belishazari namureeva, “Nivi Danieli, mulala khu Vayahudi vali nivahilwa mu vuhaambe, wa tata wanje Mwami Nebukadineza yarulitsa Yuda?

¹⁴ Mali khuvoolelwa makhuva ndi roho wa vanyasaye wayinjila mu yivi, khandi ndi uli ni limanya, wacheliha khandi uli nu vusitsa vu khuchenyinya.

¹⁵ Vandu vu vusitsa, valakuli valerwa imbeli wanje khwitsa khusoma mahandiko yaka mavambolele shia kavoolanga, navutswa khali vakhaywa khwivaala shia kavoolanga.

¹⁶ Navutswa mbolelwi ndi uli nu vunyali vu khuvoola shia kavoolanga khandi khukhonyana khumala vutiinyu vulitoho. Niiva unyala khusoma mahandiko yaka ma umbolele shia kavoolanga, uliitsa khufwalwa tsinguvu tsia sambarau tsia vami vifwalanga nende matongolo kalombwa khu itsahabu mwing'ori mwomwo; nu khukholwa wa khavaka mu vwimilili vwi shivala shinu.”

¹⁷ Danieli yachipa, “Vikha vihanwa viovio mwene inoho uhe mundu wundi. Nzitsanga khukhusomela makhuva kahandikwa, khandi khuvoolele shia kavoolanga.

¹⁸ “Yivi Mwami Belishazari, Nyasaye Uli Ikulu khu Viosi yaha tata wowo Nebukadineza vwami, tsingulu, vukhumi, nende vunyali;

¹⁹ khandi khurulana khu tsingulu tsia yamuha, vandu voosi, vandu vi tsimbia tsiosi, vandu valomolomanga tsinomonomo lukanu vatechela; nivaria imbeli wewe. Yiira shia mundu wosi wa yali niyenyi khwiira; khandi nalekha khwiira woyo wa yenyanga ave mwoyo.

²⁰ Navutswa shichila yali nu vwiloli khandi nava muhaaka, yakwishitswa khurula khu shisoko shieshie shiu vwami; khandi narulitswa khu vukhumi vwevwe.

²¹ Yakhungwa mu vandu, khandi vwoongo vwevwe nu vuva khuli vwi inyama yumbulimu. Yamenya ni tsipunda tsiumbulimu, niyayitswa vunyasi khuli ihili, khandi nakona mushikuri vuchila shindu shiu khumushinga khurula khu imbula yakhuvanga. Khulwa yako, yahuchilila ndi Nyasaye Uli Ikulu khu Viosi neye wamihanga vwami vwa vandu, khandi ali nu vunyali vu khwamihitsa mundu wa yenyanga.

²² “Navutswa yivi mwana wewe Belishazari, khali niiva wamanya makhuva kenako koosi, wambakhane khwichehitsa.

²³ Navutswa yivi mwene wichinjilila imbeli wu Mwami Nyasaye wu mwikulu! Walerelwa vindu viarulitswa mu Litempeli lielie. Yivi mwene nende vandu va wamihanga navo, vakhali vovo, halala na vakhali vovo vamenyinywa mwarumishila vindu vienevo khung'welamu idivai. Munyi mwitsominya vanyasaye valombwa khu ifetsa, itsahabu, mukasa, shivia, musala, nende lichina, nivili vindu vivula tsimoni inoho maroyi inoho vwoongo; khandi nu wambakhana khuha Nyasaye uchilanga nuwesesa, khandi nuva mwoyo luyali.

²⁴ Nashio shivune shiachila ninduma mukhono khwitsa khuhandika makhuva kenako.

²⁵ “Makhuva kali ni kahandikwa kenako ni: ‘MENE, MENE, TEKELI, PERESINI.’

²⁶ Yaka nako ka makhuva kenako kavoolanga: Likhuva MENE livoolanga ndi Nyasaye umali khuvalitsa matukhu ka wamihanga, khandi wativitsa vwami vwovwo.

²⁷ Likhuva TEKELI livoolanga ndi yivi wavikhwa khu ilaatili umanyikhane vulitoho vwovwo, navutswa wanyolekha nuli mwangu.

²⁸ Likhuva PERESINI livoolanga ndi vwami vwovwo vwavukhanemu vumali khuheelwa Vamedi nende Vaperisia.”

²⁹ Nalwo lwa Mwami Belishazari yahaana vwangu lilako ndi Danieli afwali tsinguvu tsia sambarau, matongolo kalombwa khu itsahabu mwing'ori mwemwe. Likhuva lialanditswa shia havundu hosi ndi neye mwamihi wa khavaka mu vwimilili mu shivala shienesho.

³⁰ Mu vutukhu vulala vwenovo, Mwami Belishazari wa Babilonia yiirwa;

³¹ mundu walaangwangwa Dario warulanga mu shivala shia Mede, niyamiha shivala shienesho. Yamiha nali ni mihika makhomi sita na chivili.