Markus 9 - Niu Testament 1956 (Manus PNG)

¹ Boen i boi le ndro su: Ndangen io boi me ndro mu: Su holel ademu gorbo, su de mad bui, su ilndri hanu longu ad Jehova meher ndoun.

Engerang Jesu ndre bahali.

² Manono muren Jesu hedi Petrus, Jakobus e Johanes, su iao la bahali manden su ge; i beg henunuen su, i sie.

³ Salo aden beren dege mernal i hengerang; su ndramed dansu de hinen dagara bui.

⁴ Elias sor Mose sor me ndro Jesu, su vong.

⁵ Petrus i boi le ndro Jesu: Ndorlaben, gor ogo hian, du ge mengseni bandrol madiluum, hom adem, hom ad Mose, hom ad Elias.

⁶ Petrus i danen nongen aden bui, meluan gin iab, ir vong ge molhe.

⁷ Gondrhun lang si i meher, Jehova i dari i boi: Ogo Nduro, io mugueni i, mu ghirong nongen aden.

⁸ Nongen boen su lele, su de ilndri heb sa bui, Jesu ge i da ndro su.

⁹ Su la ndogun lie, Jesu i sendraini su ar su de vong de la ndro su masou le longu ogo su ilndri, Ndurndramed ginemad hanu, boen i dne lie.

¹⁰ Su hirong nongen ogo su hanguruen i, su vong le goure su bode: Aga sa, ndramed i ginemad boen i dne lie?

¹¹ Boen su ndemani Jesu su bode: Hisa su ndremda bohernou, su bode Elias i meher hanu.

¹² Jesu i boi: Ndangen, Elias i meher hanu hinen longu masigane monen, boen su hinen Ndurndramed momen ge, su bieni dege su hondre goru.

¹³ Io boi me ndro mu: Elias gin meher, su de hirong i bui, su gin bieni ge, dege su hondre goru.

Jesu regurdueni ndurgamel homo.

¹⁴ Boen su me ndogun, ndro su lao aden, su ndramed mabosanged su da ndro su, su vong le ndro su ndremda bohernou.

¹⁵ Malabo su ndramed su ilndri Jesu, meluasu i ieb su hilou la ndro i.

¹⁶ I ndemani su ndremda bohernou: Uomu vong sa le ndro su lao ordo?

¹⁷ Hom ndramed meher, i boi: Ndorlaben, io le huri nduro gme ndro uo, ngongong i da ndrnen, i danen nongen bui.

¹⁸ Ngongong i rii i, i robieni le boan, i nunumui lehen, dorngon i muh, boen i gmed. Io vong le ndro su lao adem a su gorbuldi i, dansu bui.

¹⁹ Jesu i boi le ndro su: Uru masehe io or ndro mu gorgulue mu? Mu ghedi gme ndro io.

²⁰ Su huri me ndro i. Malabo ngongong i ilndri Jesu, i bieni ndurn le boan i ndrindrghal, dorngon i muh.

²¹ Jesu i ndemani damen: Gehere i med dege ogoro? I bode: i mamemei.

²² Sidesi ngongong i bieni le moan, i bieni le ndran ar i gmed. Gle uo danem, hian golmgisden iouor e regurdueni i gle hian.

²³ Jesu i boi: I da ge ndro uo. Uo danem io gndoa io regurdueni? Longu masi heb ndoun bui le ad homo i hirong nongen ordo.

²⁴ Malabo dam mbunana i reng i boi: Io dono, uo Ndorlaben, hian, osbani io.

²⁵ Jesu i ilndri su ndramed masi su me baghege, i boii i ngongong, i boi: Uo ngongong, bohom bui, delengan bui, io boi me adem: Aiu, mbue de am lie.

²⁶ Ngongong i rosni ndurn momen ge, i loholo i iao. I dege i ginemad su mabosanged su bode, i ginemad.

²⁷ Jesu ibdi le nemen sori, i dne.

²⁸ Muren su la um asu lie su lao ad Jesu ge su ndemani i: Desa iou dandu robulda ngongong bui ie?

²⁹ Jesu i boi: Ngongong ndoun, su robuldi ge le ndoui, le raring ma le bandri.

Heb nongen le ngendian ad Jesu lie.

³⁰ Muren su lao mulden gor lie su irgai le Galilea, Jesu i mbueren su dansu i gina i oho.

³¹ I henunuen su lao aden i boi: Bersi su bien Ndurndramed le nemesu ndramed, su garii i na gmed, su gin daii, madolo i gedne lie.

³² Su hirong i, dansu nongen aden bui, su noh a su de ndemani i bui.

Nongen Jesu le ndro su lao aden.

³³ Boen su me Kapernaum su me um asu lie, i ndemani su: Mu do da vong sa da sal?

³⁴ Su simge, su gin vong le sal, sie i hian asu?

³⁵ Jesu i lugdo im boan, i loh su masongul e rumou i boi me ndro su: Homo be voaniso gle hian ademu, hian i lao dandendegei asu masi.

³⁶ Hedi hom mbunana ilgi le molengasu i bogarni i, i boi:

³⁷ Homo ghedi hom mbunana dege ogoro i ghengeni, i hengen io, homo i hengen io, i de hengen io bui, i hengen Jehova i rendegien io.

³⁸ Boen Johanes i boi me ndro i: Ndorlaben, iou ilndri homo i robuldi beld le ngarm de do ndrbom bui, iou habaii, i hom lao adem bui.

³⁹ Jesu i bode: Mbue mu ga sendraini i, homo i hinen longu hian le ngoro, i de habai io roud bui.

⁴⁰ Hom de habai io bui i gous ordo.

⁴¹ Homo i hengen mu lao ordo le ndran hebe le ngoro, i bode: Uomu lao ad Kristo, ndangen io boi be ndro mu, Jehova i gi surieni.

⁴² Homo i boii i hom mbunana ordo, hian su gob si bad gir bergoln su ge bieni giao gle ndas manan.

⁴³ Nemem hagi i beg hinen longu momen hian e sindrdi giao. I hian nemem hagi ge, uo me ndro Jehova de nemem marge uo al moan manden.

⁴⁴ Ngendiasu de so hengang bui, moan de so mad bui.

⁴⁵ Ndegem hagi i beg hinen longu momen hian e sindrdi giao. I hian ndegem hagi ge, uo me ndro Jehova de ndegem marge uo al moan manden,

⁴⁶ ngendiasu de so hengang bui, moan de so mad bui.

⁴⁷ Begmarm si i beg hinen longu momen, hian ede i giao. I hian begmarm si ge uo me ndro Jehova de begmarm maruo uo al moan manden.

⁴⁸ Ngendiasu de so hengang bui, moan de so mad bui.

⁴⁹ Su le seslaini ndramed masi le moan.

⁵⁰ Ndas horuan. Ndas gina nouun, su ghinen ngahan le derbe lie? Mu do da goure hian ge, mu de bo iil bui.