Markus 7 - Niu Testament 1956 (Manus PNG)

Su bo iil le ndro Jesu le nongen asu.

¹ Bersi su Pharisi e su ndremda bohernou ber Jerusalem su me ndro Jesu.

² Su ilndri su lao ad Jeus su da ian gan su de surhi nemesu hanu bui, su habai su.

³ Su Pharisi e su Juda masi su surhi nemesu sidesi be su gain gan, dogoro su hinen nongen asu labenen ber goru.

⁴ Dogoro su iao bah, su me lie su surhi su hanu, boen su ian gan. Dogoro su hinen longu mabosanged su surhi lumiandran, boged, lus ma geao asu.

⁵ Malabo su Pharisi e su ndremda bohernou su boi me ndro Jesu: Desa su lao adem su de hinen nongen asu labenen ber goru bui, su ian gan ansu, su ma de surhi nemesu?

⁶ Jesu i bode: Uomu ndremda bahilou, nongen ad Jesaia monen ge, i hondre dogoru: Su ndramed ogo su bamugueni io le bohosu ge, su hangaini io le bergolsu.

⁷ Longu asu e mburer asu molhege, su henunuen su lao le nongen asu ndramed ge, ad Jehova bui.

⁸ Uomu gin bieni nongen ad Jehova mu hinen nongen asu ndramed ge, a mu surhi longu ademu sidesi ma longu mabosanged dagara.

⁹ Boen i boi me ndro su lie: Ndangen uomu gin bieni nongen ad Jehova, boen mu ghinen nongen ademu lie.

¹⁰ Mose gin bai: Orgulue dam orgulue nanem, e: Homo i habai damen sor nanen, hian su daii, i na gmed ge.

¹¹ Uomu bode: Homo i gboi le ndro damen sor nanen: Korban, i vonei: Longu hendre ogo ademor, io dohor Jehova leri lie aga hian.

¹² Dagara mu henunuen su, su de gulue damsu e nanesu bui,

¹³ mu bieni nongen ad Jehova, mu surieni le nongen ademu, nongen molhege. Mu hinen longu mabosanged dege ogoro.

¹⁴ Boen Jesu i loh su masi beg henunuen su, i boi: Mu ghirong, mu ghanguruen nongen ogo:

¹⁵ Longu masi hom ndramed ieni, i de hinen ndramed momen bui, longu masi i meher mendi, aga i hinen ndramed momen.

¹⁶ Homo ma delegan, hian i ghirong nongen ordo!

¹⁷ Muren su gin me um su lao aden su ndemani i le nongen dohongein aden.

¹⁸ Jesu i boi me ndro su: Uomu hisa, danmu bui e? Mu de hirong bui, longu masi me le ndrne ndramed i danen de hinen i ndramed momen bui.

¹⁹ I de me la bergoln bui, le ge ndrnen, muren me lendi lie, le iao sal aden! Dagara i bosou gan masi hian ge.

²⁰ Longu masi meher le boho ndramed, i hinen i, i momen.

²¹ Bergoln i hangungrou longu masi momen, i beg sungsou, i beg rui bihin, i beg rii homou,

²² beg i behena, i meruan soln, i bahilou, i rodi i, ngongong.

²³ Longu masi momen meher bergoln, i hinen i ndramed momen.

Jesu ma hom bihin ber Tirus.

²⁴ Boen i dne i la gor asu Tirus e Sidon. Le um hom, i mbueren dansu i dari, i danen de gohoni bui.

²⁵ Hom bihin hirong le Jesu, ndurn, snel i da ndro i, i me godurhu le ngondrnegen.

²⁶ I bihin hom bihin Grek Sirovanisi, me ndemani i, a i robuldi snel ir ndro ndurn.

²⁷ Jesu i boi me ndro i: Hian su glug gan me ansu ndurn hanu su mosesu. I de monen bui su hur gan ansu ansu ndurn su bieni le ndro su mui.

²⁸ I bihin, i boi: Ndangen, Ndorlaben, gan ansu ndurn gsou, nogden ge i los le boan, ndurmui gieni.

²⁹ Jesu i boi me ndro i: Nongen adem hian, aiu al um aden, snel ad ndurm gineao.

³⁰ I la um aden i ilndri ndurn, i da medir berle, snel gineao.

Jesu sobani homo bohon ma delengan bui.

³¹ Muren Jesu i bieni gor asu Tirus e Sidon i mul le gor asu Galilea Degabolis.

³² Su la hur hom gamel me ndro i, delengan bui, danen nongen bui, su ndemani i, i regurdueni le hian.

³³ Jesu hedi i, sor la heb lendi, ilgi gobnemen le delengan, i rogumbunhi, i dori germen,

³⁴ i dendrai le belengan le ndro Jehova, i ngundr, i boi: Hevata! i vonei: Audi!

³⁵ Malabo delengan i deh, germen i ruai i danen nongen monen.

³⁶ Jesu sendraini su i boi: Mbue su gabsou gle ndro homo. Sidesi i sendraini su, sidesi su boharni le ndro su masi.

³⁷ Meluasu masi i ieb su boi: I hinen longu masi hian ge, delengasu bui su hirong lie, bohosu bui, dansu nongen.