ᤋᤡᤋᤛ 2 - LIFOTNT

ᤏᤛᤠᤏᤡᤒᤠᤜᤠ᤹ ᤏᤢᤒᤠ ᤏᤡᤛᤠᤶ ᤜᤢ᤹ᤔᤠᤛᤡ

¹ ᤁᤖ ᤂᤧᤏᤧ᤹ᤃ ᤛᤧᤰᤂᤠᤒᤠ ᤏᤢᤒᤠ ᤏᤡᤛᤠᤶᤒᤢᤱ ᤗᤠ᤹ᤖᤢᤒᤠ ᤏᤡᤛᤠᤶ ᤜᤢ᤹ᤖᤧᤛᤧ᤹ᤀᤥ॥

² ᤂᤍᤠᤰᤔᤡᤜᤠ᤹ᤃ ᤗᤢᤶᤗᤢᤶᤒᤠ ᤐᤥᤱᤔᤠ. ᤋᤢᤶᤔᤩᤠᤜᤠᤱ ᤐᤥᤱᤔᤠ ᤗᤠ᤹ᤖᤢᤛᤡᤒᤠ. ᤀᤡᤱᤎᤠᤱᤛᤠᤒᤠ. ᤏᤡᤱᤘᤠ᤹ ᤜᤠᤱᤃᤧᤶᤛᤡᤱ ᤁᤧᤈᤥ᤺ᤰᤐᤠ ᤐᤥᤱᤔᤠ. ᤛᤧᤰᤂᤠᤒᤠ ᤏᤛᤠᤴ ᤁᤧᤃᤵᤐᤠ. ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠ ᤜᤧᤰᤁᤩᤠᤱ ᤏᤠᤛᤡ ᤁᤧᤎ᤺ᤵᤐᤠ ᤐᤥᤱᤔᤠ ᤐᤥᤱ ᤔᤧᤳᤋᤧᤛᤧ᤹ᤀᤥ॥

³ ᤜᤧᤰᤁᤣᤗ᤹ᤖᤡᤰᤁᤣ ᤂᤍᤠᤰᤔᤡ ᤔᤧᤴᤇᤢᤔᤠᤜᤠ᤹ ᤛᤠᤶᤏᤡᤔᤠ ᤔᤧᤴᤇᤢᤔᤠ᤹. ᤗᤠ᤹ᤖᤢᤛᤡᤔᤠ ᤏᤢ ᤆᤠ᤺ᤳᤌᤡᤀᤡᤱᤎᤠᤱᤛᤠᤔᤠ ᤐᤥᤱᤔᤠ ᤐᤥᤱ ᤔᤧᤳᤋᤧᤛᤧ᤹ᤀᤥ॥ ᤂᤧᤱᤜᤠ᤹ᤃ ᤔᤏᤠ ᤔᤧᤴᤈᤧᤱᤔᤏᤠᤔᤠ ᤏᤢ ᤆᤧ᤹ᤕᤠ ᤔᤧᤶᤒᤱᤔᤏᤠᤔᤠ ᤔᤧᤒᤥᤱᤗ ᤐᤥᤱ. ᤌᤡ᤺ ᤔᤛᤠᤱ ᤐᤥᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤃ ᤘᤣ᤹ᤜᤠ᤹ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤜᤢ᤹ᤔᤠᤛᤡ ᤐᤥᤱᤗᤥ॥

⁴ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ᤏᤢ᤺ᤸᤗᤧ ᤐᤠ᤺ᤰᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤏᤡ᤹ ᤕᤧᤶᤒᤠᤜᤠ᤹ ᤏᤢ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤡ᤺ᤶᤈᤡ ᤔᤧᤵᤔᤠᤛᤡ.

⁵ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱ ᤁᤧᤈᤥ᤺ᤰᤔᤠ ᤐᤥᤱᤔᤠ ᤏᤢ ᤛᤣᤛᤣ ᤁᤧᤘᤠ᤹ᤔᤠ. ᤏᤢ᤺ᤖᤡᤰᤁᤠᤱ ᤜᤡᤶᤎᤠ᤺ᤱ ᤁᤧᤍᤰᤔᤠ ᤐᤥᤱᤔᤠ. ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤔᤠ ᤜᤧᤰᤁᤩᤠᤱ ᤂᤢᤏᤡ᤹ ᤕᤧᤶᤒᤠᤜᤠ᤹ᤖᤧ ᤕᤢᤰᤁᤥ ᤘᤠ᤹ᤔᤠ ᤐᤥᤱ ᤑᤠ᤹ᤀᤠᤱ ᤜᤢ᤹ᤔᤠᤛᤡ ᤐᤥᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤜᤡᤏᤠ᤺ᤶ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤗᤥ॥

⁶ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤌᤠᤱᤒᤧᤴᤜᤠ᤹ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱ ᤁᤧᤈᤥ᤺ᤰᤐᤠ ᤐᤥᤱᤔᤠ ᤐᤥᤱ ᤑᤠ᤹ᤀᤠᤱ ᤂᤠᤜᤢᤴ ᤐᤡᤔᤠᤛᤡ ᤐᤥᤱᤗᤥ॥

⁷ ᤂᤧᤏᤧ᤹ ᤀᤠᤵᤑᤣᤰᤁᤠᤱ ᤏᤢᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤒᤡ ᤐᤥ᤺ᤰᤂᤧ᤹. ᤜᤧᤰᤁᤩᤠᤱ ᤁᤧᤏᤡᤛᤠᤶᤔᤥ ᤏᤥᤏᤡᤱᤘᤠ᤹ᤛᤠᤒᤠ ᤏᤢ ᤋᤠ᤺ᤰᤐᤥᤛᤠᤒᤠ ᤐᤥ᤺ᤰᤂᤧ᤹ᤀᤥ॥

⁸ ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤧᤈᤠ᤺ᤳᤌᤡ ᤔᤧᤴᤍᤣ᤺ᤛᤢᤴᤗ ᤑᤠ᤹ᤀᤠᤱ ᤏᤢᤒᤠ ᤐᤠᤴ ᤐᤠᤖᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤒᤡᤑᤩᤢᤱᤒᤠᤜᤠ᤹ᤖᤧᤀᤠᤱ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤐᤠᤴ ᤐᤠ᤺ᤵᤔᤠ ᤔᤧᤴᤇᤢᤰᤋᤢᤴᤏᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤎᤠᤖᤥ॥

⁹ ᤛᤧᤘᤠᤖᤥᤒᤠᤜᤠ᤹ ᤂᤢᤏᤡ᤹ ᤜᤡᤶᤍᤠᤱᤒᤠᤜᤠ᤹ᤖᤧᤴ ᤀᤡᤱᤈᤠᤱᤃᤧᤶᤒᤠ ᤐᤥᤱᤔᤠ. ᤁᤠᤰ ᤐᤠ᤺ᤴᤏᤥ ᤂᤢᤏᤡ᤹ ᤏᤡᤱᤘᤠ᤹ ᤁᤧᤍᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ. ᤕᤠᤱᤏᤠ ᤔᤢᤖᤠᤍᤥᤔᤠ ᤔᤧᤏᤢ᤹ᤏᤧᤴ ᤑᤠ᤹ᤀᤠᤱ ᤜᤢ᤹ᤖᤧᤛᤧ᤹ᤀᤥ॥

¹⁰ ᤂᤧᤱᤜᤠ᤹ ᤔᤧᤴᤄᤢ᤺ᤴᤏᤧᤴᤗ ᤁᤖ ᤁᤧᤖᤧᤰ ᤐᤠ᤺ᤴᤏᤥ ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤛᤡᤒᤠ ᤔᤧᤒᤥᤱᤗ. ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤠᤰ ᤕᤠ᤺ᤶᤒᤰᤁᤥᤗᤠᤶ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤏᤡᤛᤠᤶᤔᤡᤸᤗᤧᤴ ᤔᤡᤱᤛᤥᤎᤠᤱᤛᤥ ᤐᤥᤖᤖᤥ॥

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶ

¹¹ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤛᤧᤴᤗᤵ ᤔᤧᤄᤥᤛᤢᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤀᤥᤛᤣ᤺ᤴᤎᤠᤰᤋᤢᤛᤡᤀᤠᤱ ᤘᤠ᤹ᤖᤥ॥

¹² ᤂᤧᤴ ᤁᤢᤗᤢᤱᤃᤢᤶᤗᤠᤶᤒᤠ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤕᤥᤒᤠ ᤜᤡᤱᤔᤴ ᤏᤢ ᤀᤡᤰᤛᤠᤍᤡᤱᤒᤠ ᤕᤧᤶᤏᤡᤱᤘᤠ᤹ ᤋᤠᤍᤠᤒᤠ ᤐᤠ᤺ᤴᤜᤠ᤹ ᤗᤧᤵᤔᤠᤍᤣ᤺ᤔᤠ ᤐᤥᤱ ᤑᤠ᤹ᤀᤠᤱ ᤀᤠᤜᤢ᤹ᤛᤡᤱᤅᤠᤱ ᤁᤴ ᤜᤡᤱᤔᤴᤏᤥ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠ. ᤁᤢᤍᤥ᤺ᤵᤔᤠ ᤏᤢ ᤛᤠᤶᤕᤥᤒᤠ ᤜᤡᤱᤔᤴᤏᤥ ᤜᤡᤱᤔᤠ ᤑᤠ᤹ᤀᤠᤱ ᤀᤥ᤺ᤴᤎᤠᤰ ᤀᤠᤈᤥ᤺ᤰᤗᤥ॥

¹³ ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤐᤕᤶ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤛᤧᤴᤗᤵᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤔᤡᤔᤡᤍᤡᤱᤏᤢ ᤁᤢᤕᤢᤔᤧᤴ ᤀᤠᤜᤠᤱᤄᤢᤶᤗ ᤀᤠᤘᤠ᤹ᤀᤡᤸᤗᤧ ᤀᤠᤏᤡ᤹ ᤜᤠᤱᤜᤠᤱᤒᤠ ᤏᤡᤱᤛᤠᤱᤅᤡᤸᤗᤧ ᤁᤢᤎᤡᤶ ᤀᤠᤘᤠ᤹ᤖᤥ॥

¹⁴ ᤀᤠᤏᤡ᤹ ᤁᤠᤰ ᤗᤠᤕᤥᤗᤠᤶ ᤌᤧ᤹ᤔᤠᤛᤡ. ᤀᤠᤒᤠᤅᤣ ᤛᤣᤛᤣ ᤁᤢᤔᤏᤠ ᤆᤥ᤺ᤰᤔᤠᤛᤡ ᤜᤧᤰᤁᤩᤠᤱ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤢᤛᤡᤰ ᤁᤧᤛᤶᤒᤠ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤀᤠᤏᤡ᤹ ᤗᤠᤃᤡ ᤂᤢᤏᤧ᤹ ᤀᤠᤒᤠᤅᤣ ᤛᤡᤍᤢᤱᤈᤓᤠ ᤐᤥᤱᤛᤧ ᤐᤡᤛᤡᤱᤗᤥ॥

¹⁵ ᤁᤠᤰ ᤕᤢᤰᤏᤢ ᤁᤴ ᤐᤠ᤺ᤴᤜᤠ᤹ ᤜᤢ᤹ᤖᤧᤛᤧ᤹. ᤜᤠᤱᤜᤠᤱ ᤔᤧᤳᤋᤧᤛᤧ᤹. ᤜᤧᤰᤁᤩᤠᤱ ᤑᤧ᤺ᤰᤋᤧᤛᤧ᤹॥ ᤜᤧᤰᤁᤣᤗ᤹ᤖᤡᤰ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤧᤏᤧ᤹ ᤁᤢᤏᤠᤔᤧᤴᤇᤠ᤹ ᤁᤧᤔᤧᤴᤔᤧᤳᤏᤧᤴᤗᤖᤥ॥