ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 55 - LIFOTNTᤀᤡᤱᤔᤧᤗᤧᤰᤋᤢᤒᤠ ᤔᤏᤠ᤺ᤸᤗᤧ ᤁᤢᤒᤣᤗᤡ ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤀᤴᤔᤣ ᤔᤢᤰᤗᤠᤜᤠ᤹ᤏᤢᤒᤠ ᤍᤠᤀᤢᤍᤖᤧ ᤔᤛ᤻ᤁᤡᤗ ᤁᤢᤛᤠᤶᤗᤥ 1 ᤏᤡᤱᤘᤠ᤹ᤑᤢᤔᤠᤱᤅᤣ. ᤆᤥᤃᤢᤱᤒᤠ ᤋᤢᤘᤠᤴ ᤂᤧᤵᤛᤠᤱ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤐᤣᤗᤡ ᤑᤠᤰᤏᤧᤒᤠᤴ ᤂᤧᤶᤔᤠ ᤔᤧᤏᤠ᤹ᤖᤧᤴᤏᤧ᤹ᤀᤥ॥ 2 ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤏᤢᤃᤵ ᤐᤡᤖᤠᤱᤅᤧ᤹ᤀᤥ. ᤀᤠᤏᤡᤱᤘᤠ᤹ᤒᤠᤸᤗᤧ ᤕᤧ᤺ᤱᤅᤠᤀᤠᤱ ᤏᤠᤛᤠᤱᤅᤠᤱ ᤘᤠ᤹ᤀᤠᤖᤥ॥ 3 ᤀᤠᤏᤡᤱᤔᤡᤜᤠ᤹ᤖᤧ ᤀᤠᤱᤃᤠ᤹ ᤕᤱᤔᤠ ᤔᤧᤛᤧᤳᤋᤠᤖᤥ ᤜᤧᤰᤁᤩᤠᤱ ᤁᤢᤀᤡᤃᤧᤓᤧᤶᤒᤠᤜᤠ᤹ᤖᤧ ᤋᤢᤰᤂᤣ ᤔᤧᤈᤠ᤺ᤳᤋᤠᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤕᤖᤠᤱᤅᤠᤱ ᤘᤠ᤹ᤀᤠᤖᤥ॥ ᤂᤧᤱᤜᤠ᤹ᤖᤧ ᤀᤠᤛᤶᤍᤠᤱ ᤋᤢᤰᤂᤣ ᤗᤠᤰᤂᤣ ᤔᤧᤍᤠᤖᤢᤖᤥ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤐᤥ᤺ᤰᤁᤠᤱ ᤔᤧᤈᤡ᤺ᤳᤋᤠᤖᤥ॥ 4 ᤀᤠᤱᤃᤠ᤹ ᤐᤃᤡᤁᤡᤀᤠᤖ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤀᤠᤛᤡ ᤑᤠ᤹ᤀᤠᤱ ᤁᤡᤔᤠᤖᤧ ᤕᤱᤅᤠᤖᤥ॥ 5 ᤁᤡᤔᤠ ᤏᤢ ᤕᤱᤔᤠᤸᤗᤧ ᤁᤒᤪᤡᤱ ᤁᤒᤠᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤣᤗ᤹ᤖᤡᤰ ᤕᤱᤔᤠ ᤁᤧᤵᤔᤠᤸᤗᤧ ᤀᤣ᤺ᤵᤋᤠᤱᤅᤠᤱ ᤘᤠ᤹ᤀᤠᤖᤥ॥ 6 ᤐᤢᤳᤋᤢ᤺ᤰᤁᤣ ᤜᤧᤰᤁᤣ ᤀᤠᤗᤠᤵ ᤐᤳᤇᤧᤸᤗᤧᤃ ᤀᤠᤱᤃᤠ᤹ ᤐᤧᤖᤠᤱ ᤐᤣᤃᤠᤱᤒᤠ ᤘᤕᤧᤔᤧᤴᤗᤥ ᤜᤧᤰᤁᤩᤠᤱ ᤏᤠ᤺ᤶᤛᤡᤱᤅᤠᤒᤠ ᤘᤕᤧᤔᤧᤴᤗᤥ॥ 7 ᤜᤧᤰᤁᤣᤗ᤹ᤖᤡᤰ ᤔᤠ᤺ᤱᤄᤠ ᤐᤧᤖᤠᤱ ᤐᤣᤃᤠᤱᤒᤠ ᤘᤕᤧᤔᤧᤴᤗᤥ. ᤜᤧᤰᤁᤩᤠᤱ ᤔᤢᤖᤧ᤺ᤰ ᤂᤧᤖᤧ᤺ᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤀᤠᤱᤃᤠ᤹ ᤘᤕᤠᤱᤔᤧᤴᤗᤥ॥ ᤛᤣᤗᤠ 8 ᤁᤡᤵᤔᤠ ᤁᤧᤄᤢᤒᤠ ᤛᤢᤖᤡᤳ ᤁᤣᤈᤱᤗᤠᤶ ᤔᤠ᤺ᤱᤄᤠ. ᤛᤧ᤺ᤵᤛᤡᤱᤔᤠ ᤋᤧᤴᤏᤥ ᤜᤠᤖᤠ ᤆᤠᤳᤋᤠᤱᤗ ᤐᤣᤃᤠᤱᤒᤠ ᤘᤕᤧᤔᤧᤴᤗᤥ॥ 9 ᤕᤜᤘᤣ ᤍᤠᤱᤒᤠᤀᤣ. ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢᤒᤠ ᤕᤠ᤺ᤶᤒᤰᤜᤠ᤹ ᤑᤧᤳᤗᤠ᤺ᤴᤍᤧ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤍᤠᤱᤜᤠ᤹ᤀᤠᤱ ᤑᤥ᤺ᤳᤋᤧ ᤐᤡᤖᤧᤛᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤕᤧᤰᤕᤰᤁᤥ ᤂᤧᤔᤠ᤹ ᤏᤢ ᤛᤧᤳᤇᤡᤱᤔᤠ ᤐᤥ᤺ᤰᤂᤧᤒᤠ ᤏᤡᤛᤢᤱᤗᤥ॥ 10 ᤛᤧᤴᤍᤡᤰ ᤗᤧᤴᤍᤡᤰ ᤂᤧᤱᤜᤠ᤹ᤖᤧ ᤕᤧᤰᤕᤰ ᤂᤡᤖᤡᤒᤠ ᤗᤢᤱᤎᤠᤰᤁᤡᤴ ᤔᤧᤗᤡᤅᤢᤀᤠᤱ ᤁᤶᤒᤪᤠᤱ ᤔᤧᤔᤧᤳᤋᤢᤖᤥ ᤁᤖ ᤂᤧᤴ ᤕᤧᤰᤕᤰᤁᤡᤱᤃ ᤗᤠᤕᤥ ᤗᤠᤛᤥᤳ ᤏᤢ ᤑᤧᤴᤕᤠ᤺ᤶᤒᤰ ᤀᤡᤛᤣ᤺ᤱᤒᤠ ᤆᤥᤰᤗᤥ॥ 11 ᤁᤧᤖᤧᤰ ᤐᤡᤛᤠᤱ ᤔᤧᤰᤔᤠᤛᤡᤔᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤕᤱᤔᤠ ᤛᤧᤳᤇᤡᤱᤔᤠ ᤏᤢ ᤀᤡᤱᤗᤧᤰ ᤔᤧᤳᤇᤡᤱᤔᤠ ᤐᤠ᤺ᤴᤜᤠ᤹ᤖᤧ ᤂᤧᤵᤔᤥᤒᤠ ᤗᤠᤶᤜᤠ᤹ ᤋᤡᤶᤛᤧᤀᤠᤱ ᤏᤧᤖᤥ॥ 12 ᤀᤠᤏᤡᤱᤔᤡᤜᤠ᤹ᤖᤧ ᤀᤠᤈᤠ᤺ᤳᤌᤡ ᤔᤧᤍᤣᤛᤢᤒᤠ ᤘᤕᤧᤸᤗᤧᤃ ᤀᤠᤱᤃᤠ᤹ ᤀᤠᤛᤡᤰ ᤏ᤺ᤶᤏ᤺ᤶ ᤔᤧᤳᤋᤢᤱᤒᤠ ᤘᤕᤧᤔᤧᤴᤗᤥ॥ ᤀᤠᤏᤡᤱᤔᤡᤜᤠ᤹ᤖᤧ ᤔᤧᤓᤳᤋᤠᤱᤅᤡᤸᤗᤧᤃ ᤀᤠᤱᤃᤠ᤹ ᤆᤡᤱᤛᤡᤱᤔᤠ ᤛᤢᤰᤋᤠᤱᤒᤠ ᤘᤕᤧᤔᤧᤴᤗᤥ॥ 13 ᤁᤖ ᤂᤧᤱᤃ ᤀᤠᤱᤃᤠ᤹ᤏᤢᤀᤣ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ᤏᤢ ᤁᤧᤍᤱᤒᤠ ᤀᤠᤴᤍᤣᤱᤒᤠᤴᤗᤥ॥ 14 ᤁᤢᤓᤠ ᤕᤧᤶᤔᤥ ᤂᤧᤴᤏᤢ ᤀᤠᤴᤇᤡᤃᤣ ᤛᤠ᤹ᤖᤡᤰ ᤏᤢᤖᤡᤰ ᤋᤅᤧᤛᤡᤃᤧᤀᤠᤱ ᤘᤕᤧᤛᤡᤃᤧᤖᤥ. ᤜᤧᤰᤁᤩᤠᤱ ᤔᤠᤱᤜᤡᤶᤔᤥ ᤗᤳᤇᤠ ᤐᤥ᤺ᤰᤂᤧᤛᤡᤃᤧᤀᤠᤱ ᤛᤧᤘᤠ ᤆᤥᤃᤧᤛᤡᤃᤧᤖᤥ॥ 15 ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ ᤔᤧᤛᤡᤖᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤢᤜᤡᤱᤘᤧᤳᤋᤣ ᤂᤧᤔᤠ ᤕᤱᤛᤱᤅᤥ ᤔᤧᤗᤠ᤺ᤳᤗᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤑᤧᤴ ᤐᤠ᤺ᤴᤏᤡᤴ ᤕᤠᤱᤎᤥ᤺ᤰᤋᤧᤀᤠᤱ ᤘᤠ᤹ᤖᤥ॥ 16 ᤁᤖ ᤀᤠᤱᤃᤠ᤹ᤃ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤑᤠ᤹ᤖᤠᤱᤅᤧ᤹ ᤑᤠ᤹ᤀᤠᤱ ᤔᤧᤳᤋᤢᤱᤗᤥ ᤜᤧᤰᤁᤩᤠᤱ ᤂᤢᤏᤧ᤹ ᤋᤠᤱᤛᤧ᤺ᤵᤐᤠᤖᤥ॥ 17 ᤀᤠᤱᤃᤠ᤹ ᤀᤠᤍᤢᤰᤂᤣᤀᤥ ᤋᤠᤏᤠᤶ. ᤗᤧᤴᤍᤡᤰ ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤂᤢᤏᤧ᤹ ᤐᤣᤗᤡ ᤑᤠᤰᤋᤢᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤀᤠᤀᤡᤰᤗᤠᤴ ᤂᤧᤵᤛᤢᤖᤥ॥ 18 ᤀᤠᤱᤃᤠ᤹ ᤌᤱᤌᤰᤁᤠᤒᤠ ᤋᤧᤴᤏᤥ ᤔᤧᤴᤈᤥ᤺ᤴᤏᤣ ᤔᤧᤱᤃᤠ᤺ᤴᤏᤣ ᤂᤢᤏᤧ᤹ ᤛᤧ᤺ᤵᤐᤠᤖᤥ. ᤜᤧᤰᤁᤣᤛᤠᤱ ᤕᤖᤡᤰᤗᤧ ᤔᤧᤀᤳᤋᤠᤖᤥ॥ 19 ᤀᤢᤏᤠᤜᤢᤖᤡᤀᤠᤱᤎᤥ ᤜᤠᤱᤃᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤐᤣᤗᤡ ᤑᤠᤰᤋᤢᤱᤒᤠᤴ ᤂᤧᤵᤛᤢᤀᤠᤱ ᤀᤠᤏᤡᤱᤔᤡᤜᤠ᤹ ᤜᤠᤖᤡ ᤆᤠ᤺ᤳᤋᤢᤛᤡᤖᤥ॥ ᤛᤣᤗᤠ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤶᤔᤡᤴ ᤋᤥ᤺ᤶᤔᤠ ᤏᤡᤱᤘᤠ᤹ ᤔᤧᤴᤈᤥᤃᤢᤴᤗᤥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤱᤃᤡᤖᤢᤴᤗᤥ॥ 20 ᤀᤠᤴᤍᤣᤱᤒᤠᤸᤗᤧ ᤀᤠᤒᤠᤅᤣ ᤁᤢᤴᤈᤢᤶᤜᤠ᤹ ᤜᤡᤵᤋᤢᤛᤡ ᤑᤳᤋᤢᤛᤡᤖᤥ. ᤜᤧᤰᤁᤣᤗ᤹ᤖᤡᤰ ᤂᤧᤸᤗᤧ ᤆᤥᤃᤢᤒᤠ ᤁᤢᤔᤠᤱᤜᤢᤵᤐᤡᤴ ᤑᤣ᤺ᤴᤍᤢᤀᤠᤱ ᤘᤠ᤹ᤖᤥ॥ 21 ᤂᤧᤸᤗᤧ ᤁᤢᤒᤠ᤺ᤴᤏᤡᤱᤃ ᤁᤢᤄᤧᤶ ᤁᤧᤏᤢ᤹ᤒᤠ ᤆᤥ᤺ᤰᤛᤠᤱ ᤁᤢᤏᤡᤱᤘᤠ᤹ᤀᤡᤴᤃ ᤋᤠᤵᤑᤧ᤺ᤶᤒᤠ ᤆᤥᤰᤗᤥ॥ ᤂᤧᤸᤗᤧ ᤁᤢᤒᤠ᤺ᤴᤏᤡᤴ ᤆᤢᤴᤈᤢᤶᤒᤠ ᤆᤥ᤺ᤰᤛᤠᤱ ᤂᤧᤱᤃ ᤂᤠᤃᤧᤛᤢᤰᤐᤠ ᤋᤠᤓᤣ ᤁᤢᤀᤡᤛᤡᤰ ᤆᤥᤰᤗᤥ॥ 22 ᤁᤧᤍᤢᤰᤂᤣ ᤁᤧᤗᤠᤰᤂᤣᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤕᤢᤰᤂᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤥᤃᤧᤔᤧᤳᤗᤥ॥ ᤂᤢᤏᤧ᤹ᤃ ᤛᤠᤶᤕᤥᤒᤠ ᤔᤏᤠᤜᤠ᤹ ᤀᤠᤓᤧᤸᤗᤧᤀᤠᤱ ᤕᤥ ᤔᤧᤎᤠᤛᤢᤛᤡᤴᤗᤥ॥ 23 ᤁᤖ ᤕᤜᤘᤣ ᤍᤠᤱᤒᤠᤀᤣ. ᤁᤢᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤃ ᤔᤧᤰᤔᤠᤛᤡᤔᤠ ᤗᤢᤶᤒᤠ᤺ᤳᤋᤥ ᤗᤠᤵᤁᤧᤓᤢᤛᤢᤛᤡᤖᤥ॥ ᤔᤏᤠ ᤁᤧᤛᤧᤵᤐᤠᤜᤠ᤹ ᤏᤢ ᤀᤡᤱᤗᤧᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤂᤢᤏᤡ᤹ ᤌᤠ᤺ᤰ ᤛ᤹ᤀᤠᤱ ᤀᤡᤖᤡᤰ ᤔᤧᤴᤜᤡᤱᤏᤧᤸᤗᤥ. ᤁᤖ ᤀᤠᤱᤃᤠ᤹ᤃ ᤂᤧᤏᤧ᤹ᤀᤥ ᤋᤠ᤺ᤰᤐᤥ ᤕᤢᤰᤂᤢᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.